امتیاز احمد / گوہاٹی

آسام ہمیشہ سے آبی کھیلوں، خاص طور پر تیراکی، میں ایک مضبوط مرکز رہا ہے۔ اس ریاست نے کئی بین الاقوامی معیار کے تیراک پیدا کیے ہیں جنہوں نے ملک کے لیے اعزازات حاصل کیے۔

لیکن 21ویں صدی کی  پہلی دہائی  میں ایک ایسا وقت بھی آیا جب ایک کمسن تیراک اسٹارٹ بلاک پر کھڑی تھی، مگر اسے بتایا گیا کہ وہ قومی مقابلوں میں حصہ لینے کے لیے اہل نہیں! وجہ یہ تھی کہ وہ آسام کی نمائندگی کر رہی تھی، جہاں منتظمین اور بااثر شخصیات کے درمیان اختلاف کے باعث دو متوازی ریاستی سوئمنگ ایسوسی ایشنز موجود تھیں۔ یہ صرف ایک بار نہیں بلکہ بار بار ہوا، جس نے اس نوجوان کھلاڑی کو اندر سے توڑ دیا۔ یہ باصلاحیت لڑکی کوئی اور نہیں بلکہ گوہاٹی کی فریحہ زمان تھیں، جو بعد میں “ہندوستان کی بیک اسٹروک کوئین” کے نام سے مشہور ہوئیں اور جن کے پاس آج بھی سات بین الاقوامی ریکارڈ موجود ہیں۔

پیدائشی تیراک

فریحہ زمان کو بچپن ہی سے پانی سے محبت تھی۔ ایک یا دو سال کی عمر میں ہی ان کا رجحان واضح ہو گیا تھا۔ تین سال کی عمر میں انہوں نے گوہاٹی کے تاریخی ڈیگھالی پکھوری میں پہلی بار تیراکی کی  بعد میں وہ آر جی بروواہ اسپورٹس کمپلیکس کے بی پی چالیہا سوئمنگ پول میں منتقل ہوئیں۔

ان کی ابتدائی کارکردگی نے کوچز کو متاثر کیا، جس کے بعد انہیں اسپورٹس اتھارٹی آف انڈیا کے کوچ ربندر مودک کی نگرانی میں ایڈوانس ٹریننگ دی گئی۔ صرف چھ سال کی عمر میں انہوں نے اسکول گیمز کے ذریعے قومی سطح پر قدم رکھا، اور پھر پیچھے مڑ کر نہیں دیکھا۔

مشکلات اور خطرات

فریحہ کا سفر آسان نہیں تھا۔ انہوں نے بتایا کہ جیسے ہی وہ اوسط سے بہتر کارکردگی دکھانے لگیں، کچھ لوگ ان سے حسد کرنے لگے۔ ان کی والدہ کو دھمکیاں تک دی گئیں۔ اس صورتحال نے فریحہ کو خوفزدہ کر دیا، یہاں تک کہ ایک وقت وہ پول جانے سے بھی گھبرانے لگیں۔ لیکن ان کی والدہ سلیمہ زمان نے انہیں ہر طرح سے محفوظ رکھا اور آخرکار انہیں پونے منتقل ہونا پڑا۔ان کی والدہ نے بیٹی کے کیریئر کے لیے بے مثال قربانیاں دیں، یہاں تک کہ وہ بنگلورو منتقل ہو گئیں تاکہ فریحہ کو بہتر مواقع مل سکیں۔

نااہلی کا صدمہ

سب سے بڑا دھچکا اس وقت لگا جب انہیں مقابلے کے دوران بلاک پر ہی نااہل قرار دے دیا گیا، صرف اس وجہ سے کہ آسام میں دو سوئمنگ تنظیمیں تھیں۔ فریحہ کے مطابق یہ لمحہ ان کے لیے انتہائی تکلیف دہ تھا کیونکہ ایک کھلاڑی اپنی پوری توجہ اور محنت کسی ہدف کے لیے کرتا ہے، اور اس طرح کی نااہلی اسے اندر سے توڑ دیتی ہے۔

کرناٹک سے عالمی سطح تک

ان مشکلات کے باعث فریحہ کو آسام چھوڑ کر کرناٹک سوئمنگ ایسوسی ایشن کے ساتھ رجسٹر ہونا پڑا۔ یہیں سے ان کے بین الاقوامی کیریئر کا آغاز ہوا، جہاں انہوں نے نو تمغے جیتے۔ انہوں نے قومی سطح پر قدم رکھنے کے فوراً بعد 50 میٹر بیک اسٹروک کا 12 سال پرانا ریکارڈ توڑ دیا، جو آج بھی برقرار ہے۔

فریحہ کے مطابق ان کی زندگی کا سب سے یادگار لمحہ 2007 میں گوہاٹی میں منعقد ہونے والے 33ویں نیشنل گیمز میں جیتا گیا بیک اسٹروک گولڈ میڈل تھا۔ اس موقع پر پورے آسام سے لوگ اسٹیڈیم میں جمع ہوئے اور ان کی حوصلہ افزائی کی۔ یہ منظر آج بھی انہیں جذباتی کر دیتا ہے۔

دباؤ سے بے نیاز

فریحہ کہتی ہیں کہ وہ ذہنی طور پر مختلف مزاج رکھتی ہیں اور کبھی دباؤ محسوس نہیں کرتیں۔ ان کے لیے مقابلہ صرف اپنی تیاری کا امتحان ہوتا تھا۔

اپنے کیریئر کے بعد فریحہ دبئی منتقل ہو گئیں جہاں انہوں نے کوچنگ کی تربیت حاصل کی۔ اب وہ واپس آسام آ چکی ہیں تاکہ اپنے وطن کو کچھ واپس دے سکیں۔ آسام حکومت نے انہیں اسپورٹس اتھارٹی آف آسام کے تحت سوئمنگ کنسلٹنٹ مقرر کیا ہے، جہاں وہ جدید سہولیات کے ساتھ نئے تیراکوں کو تربیت دے رہی ہیں۔فریحہ کہتی ہیں کہ آج کے تیراکوں کو سائنسی سہولیات اور جدید آلات میسر ہیں، اس لیے ان کا ہدف صرف اولمپکس ہونا چاہیے۔

اولمپکس کا خواب

جب ان سے پوچھا گیا کہ کیا انہیں اولمپکس نہ کھیلنے کا افسوس ہے، تو انہوں نے کہا کہ محدود وسائل کے باوجود انہوں نے بہت کچھ حاصل کیا، لیکن اگر انہیں نفسیاتی رہنمائی ملتی تو شاید وہ اولمپکس تک ضرور پہنچ جاتیں۔

مستقبل کا منصوبہ

فریحہ جلد ہی ایک “اسپلش پول” شروع کرنے جا رہی ہیں، جو دو سال کے بچوں اور پانی سے ڈرنے والوں کے لیے ہوگا۔ ان کا مقصد نئے اولمپئن تیار کرنا ہے۔اگرچہ آسام تیراکی میں مضبوط رہا ہے، لیکن اب تک یہاں سے کوئی اولمپک تیراک سامنے نہیں آیا۔ البتہ اس ریاست نے بیڈمنٹن، باکسنگ، تیر اندازی اور فٹبال میں اولمپئن ضرور پیدا کیے ہیں۔