نئی دہلی:: جے ای ای ایڈوانسڈ 2025 کے نتائج جاری ہو چکے ہیں، اور مدھیہ پردیش کے ضلع برہان پور سے تعلق رکھنے والے 17 سالہ ماجد مجاہد حسین نے اس ملک گیر امتحان میں نمایاں کامیابی حاصل کرتے ہوئے آل انڈیا رینک (AIR) 3 حاصل کی ہے۔ ماجد نے 360 میں سے 330 نمبر حاصل کیے اور 99.9992 پرسنٹائل کے ساتھ نمایاں مقام حاصل کیا۔جے ای ای ایڈوانسڈ کو بھارت کے معتبر ترین اداروں — آئی آئی ٹی اور دیگر اعلیٰ ٹیکنیکل انسٹیٹیوٹس — میں داخلے کے لیے ہونے والے سخت ترین امتحانات میں سے ایک سمجھا جاتا ہے۔

راجت گپتا نے آل انڈیا ٹاپر کا مقام حاصل کیا ہے، جبکہ مغربی بنگال کی دیودتتا ماجھی خواتین میں اول آئیں۔ اس امتحان میں مجموعی طور پر 54,378 امیدوار کامیاب ہوئے، جن میں 9,404 طالبات شامل ہیں۔ماجد کا تعلق آئی آئی ٹی بمبئی زون سے ہے، جہاں سے تین امیدوار ٹاپ 10 میں اور 31 امیدوار ٹاپ 100 میں شامل ہوئے۔

آئی آئی ٹی دہلی اور آئی آئی ٹی حیدرآباد زونز بھی بہتر کارکردگی کے ساتھ سامنے آئے ہیں۔

ماجد مجاہد حسین کا تعلیمی سفر

ماجد نے جے ای ای کی تیاری جماعت 11 سے شروع کی اور ایک کوچنگ انسٹیٹیوٹ میں داخلہ لیا۔ وہ پہلے ہی جے ای ای مین 2025 (سیشن 1) میں 296/300 نمبروں کے ساتھ مدھیہ پردیش ٹاپر رہ چکے ہیں۔

ان کی اسکولنگ برہان پور ہی میں ہوئی۔ اساتذہ کے مطابق وہ ابتدا سے ہی ایک ذہین، محنتی اور منظم طالب علم تھے۔
انہوں نے دسویں جماعت میں 95فیصد اور بارہویں جماعت میں 93فیصد نمبر حاصل کیے اور فزکس، کیمسٹری، اور میتھس میں ہمیشہ امتیازی کارکردگی دکھائی۔

انہوں نے نیشنل اولمپیاڈز میں بھی حصہ لیا اور میٹھس اولمپیاڈ، این ایس ای سی، آئی این پی ایف او، آئی او کیو ایم، این ایس ای پی، آئی این ایم او، آئی این سی ایچ او اور ایس او ایف جیسے مقابلوں میں انعامات حاصل کیے۔

کامیابی کا راز

ماجد روزانہ 8-10 گھنٹے خودمطالعہ کرتے تھے۔ انہوں نے سلیبس کو منظم انداز میں تقسیم کیا، سابقہ جے ای ای کے پرچے حل کیے، اور باقاعدگی سے ماک ٹیسٹ دیے۔
اگرچہ ابتدائی دنوں میں فزکس ان کا کمزور مضمون تھا، مگر مسلسل محنت اور اساتذہ کی رہنمائی سے اس میں مہارت حاصل کر لی۔تناؤ سے نجات کے لیے ماجد مراقبہ کرتے اور کتابیں پڑھتے تھے۔

انہوں نے جے ای ای مین کے دونوں سیشنز میں 296/300 اور 99.9992 پرسنٹائل حاصل کی، جو ان کی تیاری کے عزم اور منصوبہ بندی کا منہ بولتا ثبوت ہے۔

مستقبل کا خواب

ماجد آئی آئی ٹی بمبئی میں الیکٹریکل انجینئرنگ کی تعلیم حاصل کرنا چاہتے ہیں۔ ان کے والد مجاہد حسین خود روزگار سے منسلک ہیں اور بیٹے کی تعلیم کو اولین ترجیح دیتے رہے ہیں، جبکہ والدہ ایک گھریلو خاتون ہیں جنہوں نے ہمہ وقت حوصلہ افزائی کی۔

ماجد کا پیغام

ماجد کا کہنا ہے کہ کامیابی کا راز مسلسل مشق، درست منصوبہ بندی، کوچنگ میٹریل کا مؤثر استعمال، اور پرانے سوالات کو باقاعدگی سے حل کرنا ہے۔وہ تمام مضامین کو برابر وقت دینے اور غلطیوں سے سیکھنے پر زور دیتے ہیں۔

ان کا مشورہ ہے کہ "محنت کریں، توجہ مرکوز رکھیں، اور ہر ناکامی کو سیکھنے کا موقع سمجھیں۔ماجد مجاہد حسین آج ہندوستانی مسلم نوجوانوں کے لیے ایک روشن مثال بن چکے ہیں۔