علی گڑھ: علی گڑھ مسلم یونیورسٹی (اے ایم یو) کے خلیق احمد نظامی سینٹر برائے قرآنی علوم نے قرآنِ مجید کے انگریزی تراجم پر ایک اہم علمی تصنیف شائع کی ہے، جس کا عنوان "Abdul Raheem Kidwai’s Critique on English Translations of the Qur’an (1649–2024)" ہے۔

یہ کتاب معروف ماہرِ قرآنیات اور سینٹر کے اعزازی ڈائریکٹر پروفیسر عبد الرحیم قدوائی کی کئی دہائیوں پر محیط علمی تحقیق پر مبنی ہے، جبکہ اس کی تدوین شعبۂ اسلامک اسٹڈیز کے ڈاکٹر عادل حسین ملک نے انجام دی ہے۔ کتاب میں ہندوستان اور بیرونِ ملک کے ممتاز اہلِ علم کی تحقیقی تحریریں بھی شامل کی گئی ہیں۔

اس تصنیف میں سن 1649 سے 2024 تک شائع ہونے والے قرآنِ مجید کے انگریزی تراجم کا جامع اور تنقیدی جائزہ پیش کیا گیا ہے۔ اس کے علاوہ کتاب میں ترجمہ شناسی (Translation Studies)، علمِ تفسیر، قرآنی مطالعات میں صنفی نقطۂ نظر اور قرآنی علوم کی ڈیجیٹل اشاعت جیسے اہم علمی موضوعات پر بھی تفصیلی بحث کی گئی ہے۔

شعبۂ اسلامک اسٹڈیز کے سابق چیئرمین پروفیسر عبد الحمید فاضلی نے اس تصنیف کو قرآنی مطالعات کے میدان میں ایک قابلِ قدر علمی اضافہ قرار دیتے ہوئے اس کی تدوین کے لیے ڈاکٹر عادل حسین ملک کی تحقیقی اور اداراتی خدمات کو سراہا۔

شعبۂ اسلامک اسٹڈیز نے اس نئی اشاعت کو اپنی لائبریری کا حصہ بھی بنا لیا ہے۔ توقع ہے کہ یہ کتاب اسلامیات، قرآنی علوم اور ترجمہ شناسی کے طلبہ، اساتذہ اور محققین کے لیے ایک مستند حوالہ جاتی ماخذ ثابت ہوگی اور اس میدان میں نئی علمی تحقیقات کی راہ ہموار کرے گی۔