علی گڑھ: علی گڑھ مسلم یونیورسٹی (اے ایم یو) کے انٹرڈسپلینری نینو ٹیکنالوجی سینٹر کے ڈائریکٹر، پروفیسر ابصار احمد کو مائیکولوجیکل سوسائٹی آف انڈیا (ایم ایس آئی) نے سال 2026 کے لیے دو بڑے اعزازات—ایم ایس آئی لائف ٹائم اچیومنٹ ایوارڈ اور پروفیسر کے۔آر۔ انیجا لائف ٹائم اچیومنٹ ایوارڈ—کے لیے منتخب کیا ہے۔

یہ فیصلے فنگس بایولوجی، بایو پروسپیکٹنگ اور نینو بایوٹیکنالوجی میں ان کی غیر معمولی تحقیق اور نمایاں خدمات کو دیکھتے ہوئے کیے گئے ہیں۔ خاص طور پر فنگس کے ذریعے نینو پارٹیکلز کی تیاری پر ان کا ابتدائی اور جدت بھرا کام گرین نینو ٹیکنالوجی اور بایومیڈیکل ریسرچ کے شعبے میں سنگ میل ثابت ہوا ہے۔

پروفیسر احمد اپنی تحقیقی اشاعتوں، عالمی تعاون اور پی ایچ ڈی طلبہ کی رہنمائی کی وجہ سے قومی اور بین الاقوامی سطح پر ایک معتبر نام رکھتے ہیں۔ یہ دونوں ایوارڈ ایم ایس آئی کے 53ویں سالانہ اجلاس میں پیش کیے جائیں گے، جو 2026 میں تمل ناڈو کی مدورائی کامراج یونیورسٹی میں منعقد ہوگا۔