علی گڑھ :علی گڑھ مسلم یونیورسٹی کے شعبہ کیمسٹری کے ایسوسی ایٹ پروفیسر ڈاکٹر محمد شاہد کو کیمیائی علوم میں ان کی نمایاں خدمات کے اعتراف میں برطانیہ کی رائل سوسائٹی آف کیمسٹری کی جانب سے لیڈرز اِن دی فیلڈ زمرے کے تحت فیلو ایف آر ایس سی منتخب کیا گیا ہے۔
رائل سوسائٹی آف کیمسٹری کی فیلوشپ ایک باوقار بین الاقوامی اعزاز ہے جو ان سائنس دانوں کو عطا کیا جاتا ہے جنہوں نے کیمسٹری اور متعلقہ شعبہ جات میں تحقیق اختراع اور پیشہ ورانہ خدمات کے ذریعے مسلسل اعلیٰ کارکردگی اور قیادت کا مظاہرہ کیا ہو۔
ڈاکٹر محمد شاہد کا ایف آر ایس سی کے لیے انتخاب ان کی علمی خدمات تعلیمی قیادت اور کیمیائی تحقیق و تعلیم کے فروغ کے لیے گہری وابستگی کا واضح اعتراف ہے۔ ان کی تحقیق کو سائنسی دنیا میں معیار اور افادیت کے اعتبار سے وسیع پیمانے پر سراہا گیا ہے۔ اس نمایاں کامیابی پر اے ایم یو برادری نے ڈاکٹر محمد شاہد کو دلی مبارکباد پیش کی ہے اور ان کے لیے نیک خواہشات کا اظہار کیا ہے۔
