منداکنی مشرا

دُرگ کے علاقے کیلاباڑی کی تنگ گلیوں میں ایک 9 سالہ بچی لڑکوں کے ساتھ ہاکی کھیلتی نظر آتی تھی۔ نہ اس کے پاس مہنگے جوتے تھے اور نہ ہی اپنی ہاکی اسٹک۔ وہ اپنے بڑے بھائی کی پرانی، ٹوٹی ہوئی اسٹک کو ٹیپ سے لپیٹ کر میدان میں اترتی تھی۔ اس کے والد مقامی مسجد میں مؤذن تھے۔ گھر کی مالی حالت اتنی کمزور تھی کہ بعض اوقات ایک وقت کا کھانا پکانا بھی مشکل ہو جاتا تھا۔

جب اس نے ہاکی کو اپنا شوق بنانے کا فیصلہ کیا تو سماج نے اس کا مذاق اڑایا."لڑکی شارٹس پہن کر کھیلے گی؟" لیکن اس کے والد نے ٹھان لیا تھا کہ بیٹی اپنی تقدیر خود لکھے گی۔ یہ کہانی ہے صبا انجم کریم کی، جو چھتیس گڑھ کی گرد آلود گلیوں سے نکل کر عالمی میدانوں میں ترنگا لہرانے تک پہنچی۔

گڑ اور چنے کے شوق سے شروع ہوا سفر

سابق ہندوستانی خواتین ہاکی فارورڈ صبا انجم بتاتی ہیں کہ جب انہوں نے کھیلنا شروع کیا تو گھر کی مالی حالت اچھی نہیں تھی۔ ان کے والد مسجد میں مؤذن تھے جبکہ والدہ گھر کے اخراجات میں ہاتھ بٹاتی تھیں۔ ایک بار گرمیوں کے کیمپ میں بچوں کو کھیلنے کے بعد گڑ اور چنے دیے جاتے تھے۔ وہ انہی کی لالچ میں کھیلنے لگیں اور یوں ان کا کھیلوں کا سفر شروع ہوا۔

بعد میں ایک دوڑ کے مقابلے میں انہوں نے پہلا مقام حاصل کیا اور انعام کے طور پر ہاکی اسٹک ملی—یہی لمحہ ان کے لیے آگے بڑھنے کی ترغیب بن گیا۔ان کے اسکول نے نہرو ہاکی ٹورنامنٹ میں حصہ لیا، جس کے بعد ان کا انتخاب قومی ٹیم میں ہو گیا۔ اس کے بعد انہوں نے پیچھے مڑ کر نہیں دیکھا۔ 1999 میں نہرو ہاکی کپ کھیلا اور 2002 سے 2012 تک قومی ٹیم کا حصہ رہیں، اس دوران کئی مقابلوں میں ملک کی نمائندگی کی اور کپتانی بھی کی۔ ان کے بڑے بھائی بھی قومی سطح کے ہاکی کھلاڑی تھے۔

جب کوچ نے ٹیم سے نکال دیا

12 جون 1985 کو پیدا ہونے والی صبا انجم بتاتی ہیں کہ 1997 میں ایک میچ کے دوران کوچ نے انہیں ٹیم سے باہر کر دیا اور دوبارہ موقع نہیں دیا۔ اس وقت وہ صرف 11 سال کی تھیں۔ ان کے والد کوچ کے پاس گئے اور بیٹی کو ایک اور موقع دینے کی درخواست کی۔ یہ لمحہ ان کی زندگی کا اہم موڑ ثابت ہوا اور انہوں نے مزید محنت کا عزم کیا۔

سماجی رکاوٹیں، مگر خاندان کی مضبوط حمایت

پدم شری اعزاز یافتہ صبا انجم کہتی ہیں کہ بچپن میں وہ کھیل کر مسجد کے باہر بیٹھ کر اپنے والد کا انتظار کرتی تھیں تاکہ وہ ان کے لیے کچھ کھانے کی چیزیں لا سکیں۔ یہ یادیں آج بھی ان کے دل کے قریب ہیں۔

مسلم خاندان سے تعلق ہونے کے باعث کچھ سماجی رکاوٹیں ضرور تھیں، لیکن ان کے والدین نے ہمیشہ ان کی حوصلہ افزائی کی۔ جب قومی ٹیم کے لیے منتخب ہوئیں تو مالی مشکلات کی وجہ سے پاسپورٹ بنوانا بھی مشکل تھا۔ اس وقت ان کی والدہ نے گھر کے برتن تک بیچ دیے تاکہ رقم جمع ہو سکے۔

کھیل کی بدولت ڈی ایس پی کا عہدہ، نوجوانوں کے لیے پیغام

آج صبا انجم بطور ڈپٹی سپرنٹنڈنٹ آف پولیس خدمات انجام دے رہی ہیں۔ وہ کہتی ہیں کہ سینئر کھلاڑیوں سے متاثر ہو کر انہوں نے بہتر کارکردگی دکھانے اور ایک دن ٹیم کی کپتان بننے کا خواب دیکھا۔ ہاکی نے انہیں زندگی میں بہت کچھ دیا—ارجن ایوارڈ اور پدم شری جیسے اعزازات۔

انہوں نے نوجوانوں کو پیغام دیا کہ اپنی صلاحیت کو پہچانیں اور مسلسل محنت کریں، کیونکہ کامیابی کا کوئی شارٹ کٹ نہیں ہوتا۔