کولکتہ :: الامین مشن نے آل انڈیا میڈیکل انٹرنس امتحانNEET میں نئی تاریخ رقم کی ہے۔ اس بار مشن کے 471 طلباء نے 500 سے زیادہ نمبر حاصل کر کے ڈاکٹر بننے کا سنہری موقع پایا ہے۔ملک اور ریاست کے کئی مشہور تعلیمی ادارےNEET کی کوچنگ فراہم کرتے ہیں، مگر جس تعداد میں اور جس کامیابی کے ساتھ الامین مشن کے طلباء ہر سالNEET امتحان میں کامیاب ہو رہے ہیں، وہ کسی دوسرے ادارے کو نصیب نہیں ہو رہی۔ اسی وجہ سے کہا جا رہا ہے کہ الامین مشن نے سیکنڈری اور ہائیر سیکنڈری کی تعلیم کے ساتھ ساتھNEET امتحان میں بھی کامیابی کی نئی راہیں ہموار کی ہیں۔

مشن کی انتظامیہ کے مطابق، اس سال کےNEET امتحان میں طلباء نے غیر معمولی کامیابی حاصل کی ہے۔ مشن کے تین طلباء نے 600 یا اس سے زائد نمبر حاصل کیے۔ ان میں سب سے زیادہ 600 نمبر حاصل کرنے والے طالبعلم خالدپور کیمپس کے سید تمجید حسین ہیں۔ آل انڈیا سطح پر تمجید کی رینک 240 ہے۔ مستقبل میں تمجید نیورو میڈیسن میں اعلیٰ تعلیم حاصل کرنا چاہتے ہیں۔اسی کیمپس کے عرفات حسین نے مشن کے طلباء میں دوسرا مقام حاصل کیا ہے۔ ان کی آل انڈیا رینک 330 ہے۔بج بج کیمپس کے شریف حسن نے 602 نمبر لے کر مشن کے طلباء میں تیسری پوزیشن حاصل کی۔ آل انڈیا سطح پر شریف کی رینک 1,218 ہے۔

نیابج گرلز کیمپس کی ثمیمہ بسواس نےNEET میں 720 میں سے 585 نمبر حاصل کر کے مشن میں چوتھی اور ممکنہ طور پر طالبات میں پہلی پوزیشن حاصل کی۔ ان کی آل انڈیا رینک 2,764 ہے۔اس کے علاوہ مشن کے 68 طلباء نے 550 سے زائد نمبر حاصل کیے، 358 نے 510 یا اس سے زائد اور مجموعی طور پر 471 طلباء نے 500 سے زیادہ نمبر حاصل کیے۔ ان کامیاب طلباء میں 360 لڑکے اور 111 لڑکیاں شامل ہیں۔ الامین مشن کے سیکریٹری ایم نورالاسلام کا کہنا ہے کہ ان میں سے ہر ایک طالبعلم کو کسی نہ کسی میڈیکل کالج میںMBBS کی تعلیم حاصل کرنے کا موقع ملے گا۔

مشن کے طلباء میں سے محمد سہیل غازی کی کہانی خاص اہمیت رکھتی ہے۔ سہیل کے والد حبیب اللہ غازی پیشے سے درزی ہیں، جن کی ماہانہ آمدنی صرف 8,000 ٹکہ ہے۔ پانچ افراد کے کنبے کو اس قلیل آمدنی میں چلانا ایک چیلنج سے کم نہیں۔ باوجود اس کے، انہوں نے اپنے بچوں کی تعلیم کا خواب نہیں چھوڑا۔ ان کے بڑے بیٹے سہیل نے اس امید کو زندہ رکھا۔ درزی کا بیٹا سہیل غازی اب ڈاکٹر بننے جا رہا ہے۔ اس نےNEET میں 720 میں سے 541 نمبر حاصل کیے اور آل انڈیا سطح پر اس کی رینک 16,958 رہی۔الامین مشن کی اس شاندار کامیابی نے نہ صرف ادارے کا نام روشن کیا ہے بلکہ قوم کے نونہالوں کے لئے بھی نئی امیدیں پیدا کی ہیں