ملک اصغر ہاشمی

وہ آیا اور چھا گیا۔ اگر یہ جملہ 2025 کے ہندوستان کے کسی ہیرو پر سب سے زیادہ درست بیٹھتا ہے تو وہ نام گروپ کیپٹن شوبھانشو شکلا ہے۔ خلا کی بے پایاں وسعتوں تک پہنچ کر انہوں نے نہ صرف تاریخ رقم کی بلکہ کروڑوں ہندوستانیوں کے خوابوں کو بھی نئی بلندی عطا کی۔ سال کے اختتام پر جب ہم 2025 کو رخصت کر رہے ہیں تو فطری طور پر ہمیں اس ہندوستانی کو یاد کرنا چاہیے جس نے بین الاقوامی خلائی اسٹیشن تک پہنچ کر ایک بار پھر کائنات کے نقشے پر ہندوستان کی موجودگی درج کرا دی۔

خلانورد شوبھانشو شکلا نے انٹرنیشنل اسپیس اسٹیشن پر قدم رکھنے والے پہلے ہندوستانی بن کر تاریخ رقم کی اور جب وہ زمین پر واپس آئے تو پورا ملک فخر سے بھر گیا۔ ایکزیوم فور مشن کا خلائی جہاز جب کیلیفورنیا کے سان ڈیاگو ساحل کے قریب بحرالکاہل میں بحفاظت اترا تو یہ محض ایک کامیاب اسپلش ڈاؤن نہیں تھا بلکہ ہندوستان کی خلائی امنگوں کا ٹھوس ثبوت بھی تھا۔ ہندوستانی وقت کے مطابق 15:01 بجے ہونے والی اس لینڈنگ کا براہ راست نشریہ لاکھوں لوگوں نے دیکھا۔ آنکھوں میں امید۔ چہروں پر فخر۔ اور دلوں میں جوش۔

یہ مشن ہیوسٹن میں قائم نجی کمپنی ایکزیوم اسپیس کے ذریعے چلایا گیا تھا لیکن اس کی روح بین الاقوامی تعاون میں بسی ہوئی تھی۔ ناسا۔ اسرو۔ یورپی خلائی ایجنسی اور اسپیس ایکس کی مشترکہ کوششوں سے ایکزیوم فور کو انجام دیا گیا۔ مشن کی قیادت سابق ناسا خلانورد پیگی وہٹسن کے ہاتھ میں تھی جبکہ پائلٹ کی ذمہ داری گروپ کیپٹن شوبھانشو شکلا نے نبھائی۔ ان کے ساتھ پولینڈ کے سلاوش اوزنانسکی وِسنیفسکی اور ہنگری کے ٹبور کاپو بھی اس تاریخی سفر کا حصہ تھے۔

26 جون کو آئی ایس ایس پر پہنچنے والا یہ عملہ اصل میں دو ہفتوں کے قیام کے لیے گیا تھا لیکن مشن چند دن اضافی جاری رہا۔ اس دوران عملے نے ساٹھ سے زیادہ سائنسی تجربات انجام دیے جن میں سات تجربات اسرو کے تیار کردہ تھے۔ ان تجربات کی اہمیت صرف تجربہ گاہوں تک محدود نہیں بلکہ یہ ہندوستان کے مستقبل کے انسانی خلائی مشنوں کی بنیاد مضبوط کرنے والے تجربات ہیں۔ اسرو نے اس مشن کے لیے شوبھانشو شکلا کی نشست اور تربیت پر تقریباً پانچ ارب روپے خرچ کیے جسے ایجنسی ہندوستان کے انسانی خلائی پروگرام کے لیے ایک طویل مدتی سرمایہ کاری مانتی ہے۔

یہ سفر 1984 میں راکیش شرما کے سویوز خلائی جہاز کے ذریعے خلا میں جانے کے اکتالیس برس بعد ممکن ہوا۔ فرق صرف اتنا تھا کہ اس بار ہندوستان محض ایک شریک نہیں تھا بلکہ مستقبل کی سمت طے کرنے والوں میں شامل تھا۔ آئی ایس ایس سے اپنے الوداعی خطاب میں شوبھانشو شکلا نے جو بات کہی وہ آنے والی نسلوں کے لیے تحریک بن گئی۔ انہوں نے کہا کہ ہندوستان کا انسانی خلائی سفر مشکل ضرور ہے مگر شروع ہو چکا ہے اور اگر عزم مضبوط ہو تو ستاروں کو بھی چھوا جا سکتا ہے۔

انہوں نے راکیش شرما کے تاریخی الفاظ کو یاد کرتے ہوئے اردو کے مشہور نغمے سارے جہاں سے اچھا کا حوالہ دیا اور پھر اپنے الفاظ میں آج کے ہندوستان کی تصویر پیش کی۔ انہوں نے کہا کہ خلا سے دیکھنے پر ہندوستان پرعزم۔ بے خوف۔ خود اعتماد۔ اور فخر سے بھرا ہوا نظر آتا ہے۔ یہ محض ایک جذباتی بیان نہیں تھا بلکہ اس اعتماد کا اظہار تھا جو ہندوستانی سائنس دانوں۔ انجینئروں اور نوجوانوں کی آنکھوں میں جھلک رہا ہے۔

شوبھانشو شکلا کا یہ سفر کسی ایک دن میں طے نہیں ہوا۔ 10 اکتوبر 1985 کو لکھنؤ میں پیدا ہونے والے شکلا نے 2006 میں بھارتی فضائیہ میں فائٹر پائلٹ کے طور پر اپنے کیریئر کا آغاز کیا۔ مگ۔ سکھوئی۔ جیگوار۔ ہاک اور ڈورنیئر جیسے طیارے اڑاتے ہوئے انہوں نے دو ہزار گھنٹوں سے زیادہ کی پرواز کا تجربہ حاصل کیا۔ 2019 میں اسرو سے آنے والی ایک فون کال ان کی زندگی کا فیصلہ کن موڑ ثابت ہوئی جس کے بعد انہوں نے روس کے اسٹار سٹی میں واقع یوری گاگارین کاسموناٹ ٹریننگ سینٹر میں سخت تربیت حاصل کی۔

وزیر اعظم نریندر مودی نے 27 فروری 2024 کو انہیں گگن یان مشن کے لیے منتخب چار خلانوردوں میں شامل کرتے ہوئے قوم کے سامنے پیش کیا تھا۔ مارچ 2024 میں گروپ کیپٹن کے عہدے پر ترقی نے ان کی غیر معمولی خدمات پر مہر ثبت کر دی۔ ایکزیوم فور مشن میں پائلٹ کی ذمہ داری نبھا کر انہوں نے یہ ثابت کر دیا کہ بھارتی فضائیہ کا ایک فائٹر پائلٹ خلا میں بھی اسی مہارت کے ساتھ کام کر سکتا ہے۔خلا میں روانہ ہونے سے پہلے شوبھانشو شکلا نے کہا تھا کہ وہ صرف آلات اور مشینیں نہیں بلکہ اربوں ہندوستانیوں کی امیدیں اور خواب اپنے ساتھ لے جا رہے ہیں۔ آج ان کی محفوظ واپسی کے ساتھ یہ بات بالکل واضح ہو گئی ہے کہ وہ ان خوابوں کو اور بھی بڑا کر کے واپس آئے ہیں۔

اسرو نے 2027 میں گگن یان کے ذریعے ہندوستان کی پہلی مقامی انسانی خلائی پرواز۔ 2035 تک اپنا خلائی اسٹیشن۔ اور 2040 تک چاند پر ہندوستانی خلانورد بھیجنے کے جو بلند حوصلہ منصوبے بنائے ہیں ان میں شوبھانشو شکلا کا یہ سفر ایک سنگ میل بن چکا ہے۔ 2025 کا یہ آسمانی باب آنے والی دہائیوں کے لیے سمت متعین کرتا ہے اور تاریخ گواہ رہے گی کہ اس باب کے مرکز میں ایک نام تھا جس نے واقعی آ کر سب پر چھا جانے کا کام کیا۔ شوبھانشو شکلا۔