لدھیانہ: نیٹ یو جی 2026 میں آل ہند اول مقام حاصل کرنے والے پنجاب کے آریان گپتا نے اپنی شاندار کامیابی کا سہرا مسلسل محنت۔ اساتذہ کی رہنمائی اور خاندان کی بھرپور حوصلہ افزائی کو دیا ہے۔ 715 میں سے 720 نمبر حاصل کرنے والے آریان اب ایمس دہلی میں داخلہ لے کر کینسر کے علاج کے شعبے آنکولوجی میں ماہر ڈاکٹر بننا چاہتے ہیں۔

نتائج کے اعلان کے بعد آریان گپتا نے اے این آئی سے گفتگو کرتے ہوئے کہا کہ انہوں نے دو برس تک مسلسل سخت محنت کی۔ خوب پڑھائی کی اور اس دوران ذہنی دباؤ بھی برداشت کیا۔ انہوں نے کہا کہ آج بہت سکون محسوس ہو رہا ہے کیونکہ محنت کا صلہ مل گیا۔

اپنی تیاری کی حکمت عملی کے بارے میں آریان نے کہا کہ ان کے بڑے بھائی آدتیہ گپتا نے ہمیشہ انہیں اساتذہ کی ہدایات پر مکمل اعتماد کرنے کا مشورہ دیا تھا۔ انہوں نے بتایا کہ اساتذہ کی جانب سے دیا جانے والا ہر گھریلو کام۔ روزانہ کی مشق اور تمام اسائنمنٹ وہ پابندی سے مکمل کرتے رہے اور اسی انداز میں دو سال گزر گئے۔

آریان نے اپنی کامیابی کا سہرا والدین اور بڑے بھائی کی مسلسل رہنمائی کو بھی دیا۔ انہوں نے کہا کہ ان کے بڑے بھائی گزشتہ دو برس سے ان کے لیے ایک مثالی شخصیت رہے ہیں جبکہ والد ہر رات ملازمت سے واپس آنے کے بعد ان کے ساتھ بیٹھتے تھے تاکہ وہ پوری توجہ کے ساتھ پڑھائی کر سکیں۔ ان کے مطابق خاندان نے ہر قدم پر ان کا حوصلہ بڑھایا۔

اپنے مستقبل کے منصوبے کے بارے میں آریان نے کہا کہ وہ ایمس دہلی میں داخلہ لیں گے اور امید ہے کہ ایک بہترین آنکولوجسٹ بن کر کینسر کے مریضوں کی خدمت کریں گے۔

مستقبل کے امیدواروں کو مشورہ دیتے ہوئے انہوں نے کہا کہ سب سے پہلے اساتذہ کی ہدایات پر مکمل اعتماد کریں اور جو وہ کہیں اس پر عمل کریں۔ دوسرا یہ کہ پوری ایمانداری کے ساتھ محنت کریں کیونکہ بغیر خلوص اور محنت کے مطلوبہ کامیابی حاصل نہیں ہو سکتی۔

آریان کے والد ڈاکٹر سچن گپتا جو لدھیانہ میں اینستھیزیا کے ماہر ہیں نے کہا کہ ایک والدین کے لیے اس سے بڑی خوشی کوئی نہیں ہو سکتی۔ انہوں نے بتایا کہ گزشتہ سال ان کے بڑے بیٹے آدتیہ گپتا نے نیٹ میں آل ہند 54 واں مقام حاصل کیا تھا اور وہ اس وقت دہلی کے مولانا آزاد میڈیکل کالج میں زیر تعلیم ہیں جبکہ آریان اب ایمس دہلی میں داخلہ لیں گے۔

ڈاکٹر سچن گپتا نے کہا کہ والدین کا اصل کردار بچوں کے ساتھ کھڑے رہنا ہے۔ وہ ہر روز رات آٹھ بجے کام سے واپس آنے کے بعد آدھی رات تک بچوں کے ساتھ بیٹھتے تھے۔ اگرچہ وہ انہیں زیادہ نہیں پڑھا سکتے تھے لیکن ان کی موجودگی بچوں کے لیے حوصلہ افزا ثابت ہوتی تھی۔

انہوں نے مزید کہا کہ چونکہ وہ خود اینستھیزیا کے ماہر ہیں اور ان کی اہلیہ ڈاکٹر رینو گپتا ماہر امراض نسواں ہیں اس لیے گھر کے طبی ماحول نے دونوں بیٹوں کو طب کا شعبہ اختیار کرنے کی ترغیب دی۔

آریان کی والدہ ڈاکٹر رینو گپتا نے بھی بیٹے کی کامیابی پر خوشی کا اظہار کرتے ہوئے کہا کہ یہ اس کی سخت محنت اور والد و بڑے بھائی کی مسلسل رہنمائی کا نتیجہ ہے۔

قومی امتحانی ادارے کے مطابق آریان گپتا نے 99.9999 پرسنٹائل کے ساتھ نیٹ یو جی 2026 میں آل ہند اول مقام حاصل کیا۔ ہریانہ کے پانشل بنسل نے اسی پرسنٹائل کے ساتھ دوسرا مقام حاصل کیا جبکہ راجستھان کے اُپلکشیا گوئل تیسرے۔ بہار کے آیوش بھلوٹیا چوتھے اور مہاراشٹر کی کڈالے شراونی کرشنا پانچویں مقام پر رہیں۔ وہ اس سال کی سب سے زیادہ نمبر حاصل کرنے والی طالبہ بھی ہیں۔

قومی امتحانی ادارے کے مطابق 11.21 لاکھ امیدوار میڈیکل۔ ڈینٹل۔ آیوش اور متعلقہ شعبوں میں داخلے کے لیے اہل قرار پائے جبکہ تقریباً 20 لاکھ امیدواروں نے 21 جون کو منعقد ہونے والے امتحان میں شرکت کی۔ امتحان 13 زبانوں میں ہندوستان کے 551 شہروں اور بیرون ملک 14 شہروں کے 5440 مراکز پر منعقد کیا گیا تھا۔

اس سال نیٹ یو جی امتحان پرچہ افشا تنازع کے باعث غیر معمولی توجہ کا مرکز رہا۔ پہلے امتحان کو منسوخ کرنے کے بعد 21 جون کو دوبارہ امتحان لیا گیا۔ اس دوران مسابقتی امتحانات کی شفافیت اور طلبہ کی فلاح سے متعلق بحث بھی جاری رہی۔

قومی امتحانی ادارے نے کہا ہے کہ نتائج بروقت جاری کر دیے گئے ہیں تاکہ کونسلنگ اور میڈیکل کالجوں میں داخلے کا شیڈول مقررہ وقت کے مطابق مکمل کیا جا سکے۔