ملک اصغر ہاشمی۔ راکیش چورسیا / نئی دہلی-بھوپال

کوئی اپنے مریض کو سائیکل پر لے جارہا ہے ، کوئی اسےگاڑی پر لے جارہا ہے ، کوئی اپنے والدہ یا والد کو کندھے پر اٹھاے پھر رہا ہے، صورتحال انتہائی نازک ہے، میں نے سوشل میڈیا پر بھی لوگوں کی مجبوری دیکھی، میرے سے یہ بالکل دیکھا نہیں گیا ۔

یہ الفاظ ہیں بھوپال کے اصل ہیرو جاوید خان کے ۔ جاوید خان نے اس کے بعد یہ فیصلہ کیا کہ وہ لوگوں کی مدد کے لئے اپنی کار کو ایک ایمبولینس میں تبدیل کردیں گے۔ بھوپال کے باغ فرحت افزا کے رہائشی جاوید خان ایک آٹو ڈرائیورہیں ، جس کی آمدنی سے وہ اپنے اہل خانہ کی کفالت کرتے ہیں ۔ لیکن اب انہوں نے اپنے آٹو کو ایمبولینس میں تبدیل کردیا ہے۔

آواز دی وائس سے بات کرتے ہوئے جاوید بھائی بتاتے ہیں کہ انہوں نے 20 دن پہلے آٹو میں ایمبولینس کی سہولیات جمع کیں ۔ انہوں نے کہا کہ وہ صبح باہر جاتے ہیں اور اگر سڑکوں پر لوگوں کو ایمبولینس کے بغیر مریضوں کو لے جاتے ہوئے دیکھتے ہیں تو وہ مریض کو مفت میں اسپتال لے جانے کی پیش کش کرتے ہیں۔ اب لوگوں نے میرے فون پر بھی مجھ سے رابطہ کرنا شروع کردیا ہے۔

اس طرح خلق خدا کے درد کو اپنا درد سمجھتے ہوئے ، جاوید بھائی ہر روز کورونا سے متاثرہ مریضوں کو اسپتال تک پہنچانے کا نیک کام انجام دے رہے ہیں۔ ان کی کار میں آکسیجن کے ساتھ ساتھ ایک سینیٹائزر بھی ہے۔ جاوید بھائی بتاتے ہیں کہ جب انہوں نے آٹو کو ایمبولینس میں تبدیل کرنے کا فیصلہ کیا تو بہت سے لوگ مدد کے لئے آگے آئے۔ انہوں نے وضاحت کی کہ ایک میڈم نے انہیں ایک آکسیجن سلنڈر بھی دیا تھا۔ جو وہ ہمیشہ بھر کے رکھتے ہیں۔ اس کے علاوہ دوسرے سامان کی خریداری کے لئے جاوید نے خود اپنی جیب سے پانچ ہزار روپےخرچ کیے ہیں۔

انہوں نے کہا کہ جب مریض اپنی گاڑی میں بیٹھتا ہے تو وہ اس کی آکسیجن لیول بھی چیک کرتے ہیں۔ اگر آکسیجن کی سطح نیچے رہتی ہے تو ، وہ فوری طور پر آکسیجن بھی دیتے ہیں۔

جاوید بھائی روزانہ کی بنیاد پر خدمت خلق میں مصروف ہیں۔ ایسی صورتحال میں گھر کے اخراجات کس طرح پورے ہو رہے ہیں ؟ اس سوال پر انہوں نے وضاحت کی کہ ابھی تو کوئی پریشانی نہیں ہے۔ گھر بچت پر چل رہا ہے۔ انہوں نے کہا کہ شادی میں کچھ جہیز بھی ملا تھا ، وہ کام آ رہا ہے۔ رشتہ داروں اور اہلیہ کا بھرپور تعاون حاصل ہے۔ انہوں نے کہا کہ اس مشکل وقت میں لوگوں کی مدد زیادہ اہم ہے۔

جاوید کہتے ہیں کہ ایسا کرنے سے ان کی روح کو سکون ملتا ہے۔ اللہ سب کچھ دیکھتا ہے۔ جاوید کا کہنا ہے کہ میں خود بھی پوری طرح سے دیکھ بھال کرتا ہوں۔ مجھے احساس ہے کہ کورونا کے مریض میری گاڑی میں جاتے ہیں۔ لہذا میں ایک سینیٹائزر استعمال کرتا ہوں اور ماسک پہنتا ہوں۔ پولی تھین کا پردہ بھی ہے ، جو کافی حد تک انفیکشن سے بچاتا ہے۔ میں آٹو کو بھی سینیٹائز کرتا ہوں۔

کورونا دور میں تو متاثرہ افراد کے رشتے دار بھی دور بھاگ رہے ہیں۔ ایسے کئی واقعات ہوئے ہیں جب کورونا سے متاثرہ افراد کی موت ہوئی تو رشتہ داروں نے منہ پھیر لیا اور جنازے کے لئے دوسرے رضاکاروں کو آگے آنا پڑا اس معاملے میں جاوید بھائی کی کاوش کو انسانیت کی ایک لاجواب مثال کہا جاسکتا ہے۔