تہران:ایرانی میڈیا کے مطابق یمن کی انصاراللہ تحریک ایران کی حمایت میں میدانِ جنگ میں داخل ہونے کے لیے تیار ہے۔ خبر رساں ایجنسی تسنیم نیوز ایجنسی نے ایک باخبر ذریعے کے حوالے سے بتایا کہ مغربی ایشیا میں جاری کشیدگی کے دوران یہ گروپ مکمل الرٹ پر ہے۔

ذرائع کے مطابق 28 فروری سے جاری صورتحال کے بعد سے انصاراللہ “مکمل تیاری” کی حالت میں ہے اور ضرورت پڑنے پر براہ راست کارروائی میں حصہ لے سکتا ہے۔

رپورٹ کے مطابق یہ گروپ اسٹریٹیجک اہمیت کے حامل باب المندب پر کنٹرول حاصل کر کے امریکہ اور اسرائیل پر دباؤ ڈال سکتا ہے۔ ذرائع نے کہا کہ اس اہم گزرگاہ پر کنٹرول دشمن کو “سبق سکھانے” کے لیے ضروری ہو سکتا ہے۔

مزید کہا گیا کہ ایران کے پاس اس سمندری راستے میں “موثر خطرہ” پیدا کرنے کی صلاحیت موجود ہے، جبکہ انصاراللہ کی افواج بھی مکمل طور پر تیار ہیں کہ وہ اس میں اہم کردار ادا کریں۔

تسنیم کے مطابق انصاراللہ پہلے بھی بحیرہ احمر میں اپنی کارروائیوں کے ذریعے یہ دکھا چکی ہے کہ باب المندب کو بند کرنا اور اپنی مرضی نافذ کرنا ممکن ہے۔

7 اکتوبر 2023 کے بعد غزہ میں اسرائیلی کارروائیوں کے دوران اس گروہ نے اسرائیل سے منسلک بحری جہازوں کے خلاف ناکہ بندی شروع کی تھی، جس کے نتیجے میں کئی جہازوں کو افریقہ کے جنوبی راستے سے گزرنے پر مجبور ہونا پڑا، جس سے اسرائیلی معیشت پر دباؤ بڑھا۔

رپورٹ کے مطابق اس کے علاوہ انصاراللہ نے فضائی حملے بھی کیے اور یمن کے ساحل کے قریب امریکی بحری جہازوں کو بھی نشانہ بنایا۔

دوسری جانب ایران کے وزیر خارجہ عباس عراقچی نے ایک بار پھر واضح کیا ہے کہ ایران “امریکی۔اسرائیلی جارحیت” کے جواب میں مزاحمت کی پالیسی جاری رکھے گا اور قابل اعتماد ضمانتوں کے بغیر کسی مذاکرات یا جنگ بندی کو قبول نہیں کرے گا۔

انہوں نے ایرانی سرکاری میڈیا پریس ٹی وی کو دیے گئے انٹرویو میں کہا کہ “اس وقت ہماری پالیسی مزاحمت کو جاری رکھنا ہے اور کوئی مذاکرات نہیں ہو رہے ہیں” اور بیرونی یقین دہانیوں پر بھی سوال اٹھایا۔