جنیوا

عالمی ادارۂ صحت نے بحرِ اوقیانوس میں سفر کرنے والے ایک بحری جہاز پر ہینٹا وائرس سے جڑی 5 مصدقہ ہلاکتوں کی تصدیق کی ہے۔اس کے علاوہ مزید 3 افراد میں اینڈیز قسم کے وائرس کا شبہ ظاہر کیا گیا ہے۔ صورتحال کی سنگینی کے باوجود عالمی ادارۂ صحت کا کہنا ہے کہ اگرچہ مزید کیس سامنے آ سکتے ہیں، تاہم عام صحتِ عامہ کے لیے مجموعی خطرہ کم ہے۔جمعرات کو پریس بریفنگ کے دوران عالمی ادارۂ صحت کے ڈائریکر جنرل ٹیڈروس ایڈہانوم گیبریئسس نے بتایا کہ برطانیہ نے ادارے کو مطلع کیا تھا کہ ڈچ پرچم بردار بحری جہاز “ہونڈیئس” پر متعدد مسافر شدید سانس کی تکلیف میں مبتلا پائے گئے ہیں۔ یہ جہاز اس وقت کیپ وردے سے اسپین کے شہر ٹینیریف کی جانب رواں دواں ہے۔

ٹیڈروس نے صحافیوں سے کہا کہ اگرچہ یہ ایک سنگین واقعہ ہے، لیکن عالمی ادارۂ صحت صحتِ عامہ کے خطرے کو کم قرار دیتا ہے۔انہوں نے بتایا کہ اب تک 8 کیس سامنے آئے ہیں، جن میں 3 ہلاکتیں، 5 مصدقہ مریض اور 3 مشتبہ کیس شامل ہیں۔ہینٹا وائرس عام طور پر متاثرہ چوہوں یا ان کے فضلے کے براہِ راست رابطے سے انسانوں میں منتقل ہوتا ہے۔ تاہم اس وبا میں سامنے آنے والی اینڈیز قسم منفرد ہے کیونکہ یہ انسان سے انسان میں بھی منتقل ہو سکتی ہے، حالانکہ ماضی میں یہ صرف قریبی یا طویل رابطے، جیسے خاندان کے افراد یا طبی عملے تک محدود رہی ہے۔

وبا کا آغاز ایک مرد مسافر سے ہوا، جس میں 6 اپریل کو علامات ظاہر ہوئیں اور وہ 5 دن بعد چل بسا۔ عالمی ادارۂ صحت کے سربراہ کے مطابق ابتدائی طور پر اس کی موت کو ہینٹا وائرس سے نہیں جوڑا گیا کیونکہ نمونے حاصل نہیں کیے گئے تھے اور علامات دیگر وائرل بیماریوں سے مشابہ تھیں۔اس شخص کی اہلیہ دوسری ہلاکت بنیں، جو بیمار ہونے کے بعد 25 اپریل کو سینٹ ہیلینا میں انتقال کر گئیں۔ ایک تیسری خاتون 2 مئی کو، علامات ظاہر ہونے کے تقریباً ایک ہفتے بعد وائرس کے باعث جان کی بازی ہار گئیں۔ٹیڈروس نے خبردار کیا کہ مزید کیس سامنے آنے کا امکان موجود ہے۔ انہوں نے کہا کہ ہینٹا وائرس کی علامات ظاہر ہونے کا دورانیہ 6 ہفتوں تک ہو سکتا ہے، اس لیے ممکن ہے کہ مزید کیس رپورٹ ہوں۔تحقیقات سے معلوم ہوا ہے کہ پہلی 2 ہلاکتوں نے جہاز پر سوار ہونے سے قبل چلی، ارجنٹینا اور یوروگوئے میں پرندوں کے مشاہدے کے سفر میں حصہ لیا تھا۔ یہ علاقے ان مخصوص چوہوں کی رہائش گاہیں ہیں جو اس وائرس کو پھیلاتے ہیں۔

اس کے جواب میں ارجنٹینا کے حکام اس جوڑے کے سفر کی تفصیلات کا سراغ لگا رہے ہیں، جبکہ ٹیڈروس نے تصدیق کی کہ ارجنٹینا 5 مختلف ممالک کی تجربہ گاہوں میں 2,500 تشخیصی کٹس تقسیم کر رہا ہے۔عالمی ادارۂ صحت نے ان 12 ممالک کو بھی آگاہ کر دیا ہے جن کے شہری سینٹ ہیلینا میں جہاز سے اترے تھے، جن میں برطانیہ، امریکہ، کینیڈا، جرمنی اور سنگاپور سمیت دیگر ممالک شامل ہیں۔