نئی دہلی: بھارت نے پیر کے روز ایک بار پھر مغربی ایشیا میں امن اور استحکام کی بحالی کے لیے مذاکرات اور سفارت کاری کی ضرورت پر زور دیا۔ یہ بیان ایسے وقت میں سامنے آیا ہے جب لبنان میں اسرائیلی فوجی کارروائیوں میں اضافے کے باعث کشیدگی بڑھ گئی ہے اور ایران نے ان کارروائیوں کے سبب امریکہ کے ساتھ امن مذاکرات معطل کرنے کی بات کی ہے۔
ہفتہ وار میڈیا بریفنگ کے دوران اسرائیل کی لبنان میں جاری فوجی کارروائی اور اس کے علاقائی اثرات سے متعلق ایک سوال کے جواب میں وزارتِ خارجہ کے ترجمان رندھیر جیسوال نے کہا کہ بھارت خطے کی صورتحال پر گہری نظر رکھے ہوئے ہے۔ انہوں نے کہا: "ہم مغربی ایشیا کی پیش رفت کو مسلسل دیکھ رہے ہیں اور ہمارا مؤقف ابتدا سے یہی رہا ہے کہ امن اور استحکام کی جلد بحالی کے لیے مذاکرات اور سفارت کاری ہی آگے بڑھنے کا راستہ ہیں۔"
انہوں نے مزید کہا کہ بھارت تمام متعلقہ فریقوں کے ساتھ اپنی بات چیت میں مستقل طور پر یہی مؤقف پیش کرتا رہا ہے۔ یہ بیان ایسے وقت میں آیا ہے جب لبنان میں سکیورٹی کی صورتحال مزید خراب ہو گئی ہے۔ اسرائیلی فوجی کارروائیوں کے نتیجے میں جانی نقصان اور بڑے پیمانے پر تباہی کی اطلاعات ہیں، جبکہ جنوبی لبنان میں اسرائیل نے بعض علاقوں پر کنٹرول بھی حاصل کیا ہے۔
اتوار کو اسرائیلی وزیرِ اعظم بنیامین نیتن یاہو نے دعویٰ کیا کہ اسرائیلی افواج نے جنوبی لبنان میں واقع بیوفورٹ قلعہ پر قبضہ کر لیا ہے، حالانکہ دونوں فریقوں کے درمیان جنگ بندی نافذ ہے۔ انہوں نے اسرائیلی دفاعی افواج (IDF) کو لبنان میں اپنی کارروائیاں مزید وسیع کرنے کی ہدایت بھی دی۔ ٹیلی ویژن پر نشر ہونے والے اپنے خطاب میں نیتن یاہو نے کہا: "گزشتہ رات ہمارے بہادر فوجیوں نے بیوفورٹ قلعہ پر قبضہ کر لیا۔
انہوں نے وہاں اسرائیل کے قومی پرچم اور گولانی بریگیڈ کا پرچم لہرایا۔" انہوں نے مزید کہا کہ 44 سال قبل یہ مقام ایک بہادرانہ جنگ کی علامت تھا، لیکن ساتھ ہی اسرائیل کے اندرونی اختلافات کی بھی نشانی تھا، جبکہ آج اسرائیل متحد اور پہلے سے زیادہ مضبوط ہو کر وہاں واپس آیا ہے۔ نیتن یاہو نے اس کامیابی کو اسرائیل کی فوجی مہم میں ایک اہم موڑ قرار دیتے ہوئے کہا کہ یہ اسرائیلی افواج کے اتحاد اور عزم کی عکاسی کرتی ہے۔
پیر کے روز نیتن یاہو اور اسرائیلی وزیرِ دفاع اسرائیل کاٹز نے لبنانی دارالحکومت بیروت میں دہشت گردی کے مبینہ ٹھکانوں پر حملوں کا حکم دیا۔ اسرائیل کا کہنا ہے کہ حزب اللہ بار بار جنگ بندی کی خلاف ورزی کر رہی ہے۔ ان کارروائیوں کے بعد ایرانی پارلیمنٹ کے اسپیکر اور ایران کے مذاکراتی وفد کے سربراہ محمد باقر قالیباف نے خبردار کیا کہ اگر اسرائیلی حملے جاری رہے تو ایران نہ صرف امریکہ کے ساتھ مذاکراتی عمل روک دے گا بلکہ ان اقدامات کے خلاف بھرپور موقف اختیار کرے گا۔ ادھر امریکی صدر ڈونلڈ ٹرمپ نے بھی پیر کو ایک ٹیلیفونک گفتگو کے دوران نیتن یاہو پر سخت برہمی کا اظہار کیا۔
امریکی خبر رساں ادارے Axios کے مطابق ٹرمپ نے اسرائیلی وزیرِ اعظم کو عالمی سطح پر اسرائیل کے خلاف بڑھتی ہوئی ناراضی کا ذمہ دار قرار دیا۔ رپورٹ کے مطابق یہ کشیدہ گفتگو اس وقت ہوئی جب ایران نے سفارتی مذاکرات معطل کرنے کی دھمکی دی۔ ایک امریکی عہدیدار کے حوالے سے بتایا گیا کہ ٹرمپ اسرائیل کے فوجی ردعمل کو غیر متناسب سمجھتے تھے اور اسی ناراضی میں انہوں نے نیتن یاہو سے سخت لہجے میں کہا: "آپ آخر کر کیا رہے ہیں؟" امریکی حکام کے مطابق ٹرمپ اسرائیل پر حزب اللہ کے حملوں کے جواب میں اسرائیلی فوجی کارروائیوں کے حجم سے سخت ناخوش تھے۔
