ریاض۔ سعودی عرب میں ہندوستان کے سفیر سہیل اعجاز خان نے اتوار کے روز مختلف علاقوں اور صوبوں سے تعلق رکھنے والی ہندوستانی برادری کے نمائندوں کے ساتھ آن لائن ملاقات کی۔

سفیر نے یقین دلایا کہ ضرورت کے وقت سفارت خانہ ہر ہندوستانی شہری کی مدد کے لیے تیار ہے۔

سفارت خانے نے ایک بیان میں بتایا کہ سفیر ڈاکٹر سہیل اعجاز خان نے نائب مشن سربراہ ابو ماثن جارج اور قونصلر وائی صابر کے ہمراہ ہندوستانی برادری کے نمائندوں سے ورچوئل گفتگو کی۔ سفیر نے کمیونٹی کو یقین دہانی کرائی کہ ضرورت پڑنے پر سفارت خانہ تمام ضروری مدد فراہم کرنے کے لیے تیار ہے۔ انہوں نے شرکا کو سفارت خانے کی حالیہ سرگرمیوں کے بارے میں بھی آگاہ کیا جن میں چوبیس گھنٹے فعال کنٹرول روم کا قیام شامل ہے تاکہ فوری مدد فراہم کی جا سکے۔ کمیونٹی کے نمائندوں نے سفارت خانے کی سرگرم اور بروقت رابطہ کاری کو سراہا۔

اس سے قبل سفیر سہیل اعجاز خان نے سعودی وزارت خارجہ میں قونصلر امور کے قائم مقام نائب وزیر محمد الشمری سے بھی ملاقات کی۔ اس ملاقات میں سعودی عرب میں مقیم ہندوستانی برادری کی فلاح و بہبود سے متعلق امور پر تبادلہ خیال کیا گیا۔

ادھر خطے میں جاری کشیدگی کے دوران ایرانی حملوں کے باعث امریکہ کے تیار کردہ دفاعی نظام ٹرمینل ہائی آلٹیٹیوڈ ایریا ڈیفنس کے بعض حصوں کو نقصان پہنچنے کی اطلاعات ہیں۔ رپورٹس کے مطابق مغربی ایشیا کے کئی مقامات پر ریڈار نظام کو نشانہ بنایا گیا۔

ایرانی میڈیا کے دعووں کے مطابق ایرانی میزائل اور ڈرون مغربی اور اسرائیلی دفاعی نظام کو عبور کرتے ہوئے اسرائیل کے بعض اہداف تک پہنچنے میں کامیاب رہے۔

سی این این کی سیٹلائٹ تصاویر اور تجزیے کے مطابق تنازع کے ابتدائی دنوں میں اردن۔ سعودی عرب اور متحدہ عرب امارات میں موجود تھاڈ بیٹریوں سے منسلک ریڈار نظام بھی حملوں کی زد میں آئے۔