واشنگٹن ڈی سی 

امریکی صدر ڈونلڈ ٹرمپ نے جمعہ کے روز کہا کہ امریکہ فوری طور پر کیوبا کو "اپنے قبضے میں لے لے گا"۔ پام بیچز کے فورم کلب ڈنر میں خطاب کرتے ہوئے ٹرمپ نے کہا کہ کیوبا کو کئی مسائل درپیش ہیں۔ انہوں نے کہا کہ کیوبا، جسے ہم تقریباً فوری طور پر اپنے قبضے میں لے لیں گے۔ کیوبا میں مسائل ہیں۔ ہم پہلے ایک کو ختم کریں گے۔

اسی دن وائٹ ہاؤس کے ایک بیان میں کہا گیا کہ کیوبا کی حکومت کی پالیسیاں، طریقہ کار اور اقدامات امریکہ کے لیے ایک غیر معمولی اور سنگین خطرہ بنے ہوئے ہیں۔ یہ پالیسیاں آزاد اور جمہوری معاشروں کی اخلاقی اور سیاسی اقدار کے بھی خلاف ہیں۔کیوبا کی حکومت نے ڈونلڈ ٹرمپ کی جانب سے عائد نئی پابندیوں کو مکمل طور پر مسترد کرتے ہوئے انہیں "یکطرفہ جبری اقدامات" قرار دیا اور کہا کہ ان کا مقصد "کیوبا کے عوام کو اجتماعی سزا دینا" ہے۔

کیوبا کے وزیر خارجہ برونو روڈریگیز نے کہا کہ یہ اقدامات اپنی نوعیت میں سرحدوں سے باہر لاگو ہونے والے ہیں اور اقوام متحدہ کے چارٹر کی خلاف ورزی کرتے ہیں"، اور انہوں نے زور دے کر کہا کہ امریکہ کو "کیوبا یا کسی تیسرے ملک یا ادارے کے خلاف کوئی بھی اقدام کرنے کا بالکل حق حاصل نہیں ہے۔یہ بیانات اس وقت سامنے آئے جب وائٹ ہاؤس نے کیوبا کے حوالے سے اپنی پالیسی مزید سخت کرنے کے اشارے دیے۔

اس سے قبل جمعہ کو ٹرمپ نے ایک ایگزیکٹو آرڈر جاری کیا جس کے ذریعے کیوبا کی حکومت پر پابندیوں کا دائرہ مزید بڑھایا گیا۔ الجزیرہ کے مطابق نئی امریکی پابندیاں ان افراد اور گروہوں پر مرکوز ہیں جو کیوبا کی سکیورٹی فورسز کی مدد کرتے ہیں۔ ان اقدامات کا نشانہ وہ لوگ بھی ہیں جو بدعنوانی، انسانی حقوق کی سنگین خلاف ورزیوں میں ملوث ہیں یا کیوبا کی حکومت کے عہدیدار یا حامی کے طور پر کام کر رہے ہیں۔

اس سے پہلے 19 اپریل کو ایک مشترکہ سفارتی اقدام کے تحت میکسیکو، اسپین اور برازیل نے اتوار کے روز ایک مشترکہ بیان جاری کرتے ہوئے کیوبا کی "سنگین صورتحال" پر تشویش ظاہر کی تھی۔ یہ بیان ایسے وقت میں سامنے آیا جب یہ جزیرہ نما ملک ٹرمپ کی جانب سے بڑھتے دباؤ اور بار بار دی جانے والی دھمکیوں کا سامنا کر رہا ہے۔ان تینوں ممالک، جہاں اس وقت بائیں بازو کی حکومتیں برسرِ اقتدار ہیں، نے "کیوبا کے عوام کو درپیش شدید انسانی بحران" پر گہری تشویش کا اظہار کیا۔