نئی دہلی
فرانس کے شہر ایویان-لے-بینز میں منگل کے روز منعقد ہونے والے جی7 سربراہی اجلاس میں گروپ آف سیون کے رہنماؤں نے اہم عالمی چیلنجز پر تبادلۂ خیال کیا، یوکرین کی حمایت کا اعادہ کیا اور امریکہ اور ایران کے درمیان ہونے والے پیش رفت والے معاہدے کا خیرمقدم کیا۔ اس دوران وزیرِ اعظم نریندر مودی اور اٹلی کی وزیرِ اعظم جارجیا میلونی کے درمیان ہونے والی مختصر ملاقات نے سوشل میڈیا پر سب کی توجہ حاصل کر لی، جہاں ایک بار پھر "میلوڈی" کا چرچا شروع ہو گیا۔
وائرل ویڈیو میں دیکھا جا سکتا ہے کہ وزیرِ اعظم مودی اور جارجیا میلونی گروپ فوٹو سے قبل ایک دوسرے سے مصافحہ کرتے اور خوشگوار انداز میں گفتگو کرتے ہیں۔ اس موقع پر دیگر عالمی رہنما، جن میں امریکی صدر ڈونلڈ ٹرمپ بھی شامل تھے، موجود تھے۔اگرچہ ویڈیو کی آواز مکمل طور پر واضح نہیں، لیکن ایسا محسوس ہوا کہ وزیرِ اعظم مودی نے سوشل میڈیا پر اپنی مقبولیت کا ذکر کیا۔ اس پر جارجیا میلونی نے مسکراتے ہوئے جواب دیا کہ جی ہاں، ہم انسٹاگرام پر سب سے زیادہ مشہور جوڑا ہیں۔ یہ واقعہ تقریباً ایک ماہ بعد پیش آیا جب وزیرِ اعظم مودی نے روم کے دورے کے دوران جارجیا میلونی کو پارلے کمپنی کی مشہور "میلوڈی" ٹافی کا ایک پیکٹ تحفے میں دیا تھا، جو سوشل میڈیا پر مقبول "میلوڈی" اصطلاح کی طرف اشارہ تھا۔
میلونی نے اس دلچسپ لمحے کی ویڈیو اپنے سوشل میڈیا اکاؤنٹس پر شیئر کرتے ہوئے لکھا کہ تحفے کے لیے شکریہ۔ اس پوسٹ میں وزیرِ اعظم مودی اور میلونی دونوں مشہور ٹافی کا پیکٹ ہاتھ میں لیے ہنستے ہوئے دکھائی دیے۔ ویڈیو میں میلونی کہتی ہیں کہ وزیرِ اعظم مودی میرے لیے ایک بہت، بہت اچھی ٹافی تحفے میں لائے ہیں۔
میلوڈی سفارت کاری
میلوڈی دراصل "میلونی" اور "مودی" کے ناموں کو ملا کر بنایا گیا ایک لفظ ہے، جو 2023 میں دونوں رہنماؤں کی دوطرفہ ملاقات کے بعد سوشل میڈیا پر ایک مزاحیہ اصطلاح کے طور پر سامنے آیا تھا۔اس اصطلاح کو استعمال کرتے ہوئے بنائی گئی ویڈیوز، میمز اور مختلف عالمی اجلاسوں کے دوران دونوں رہنماؤں کے دوستانہ اور غیر رسمی لمحات کو کروڑوں مرتبہ دیکھا جا چکا ہے۔
میلونی نے پہلی بار 2024 میں وزیرِ اعظم مودی کے ساتھ ایک سیلفی شیئر کرتے ہوئے ایکس ر لکھا تھا کہ ہیلو دوستو، #میلوڈی کی طرف سے۔
بعد ازاں جون 2025 میں انہوں نے G7 اجلاس کے دوران مودی کے ساتھ ایک سیلفی ویڈیو پوسٹ کی اور اس کا عنوان رکھا کہ میلوڈی ٹیم کی طرف سے ہیلو۔اس کے بعد عالمی تقریبات میں دونوں رہنماؤں کے درمیان ہونے والی دوستانہ ملاقاتوں نے اس تاثر کو مزید مضبوط کیا کہ ان کے درمیان خوشگوار ذاتی ہم آہنگی موجود ہے۔
تاہم مبصرین کا کہنا ہے کہ مودی اور میلونی کے تعلقات محض تصویروں اور سوشل میڈیا تک محدود نہیں بلکہ یہ فعال سفارت کاری کی بھی عکاسی کرتے ہیں۔اٹلی، ہندوستان کے اہم عالمی شراکت داروں میں شامل ہو چکا ہے اور دونوں ممالک ہندوستان-مشرقِ وسطیٰ-یورپ اقتصادی راہداری پر مل کر کام کر رہے ہیں، جس میں روم کو یورپ کے لیے انڈو-پیسیفک خطے کے اہم دروازے کے طور پر دیکھا جا رہا ہے۔
دونوں ممالک کے درمیان دوطرفہ تجارت کا حجم 16.77 ارب ڈالر سے تجاوز کر چکا ہے۔گزشتہ ماہ وزیرِ اعظم مودی نے اپنے پانچ ملکی دورے کے آخری مرحلے میں جارجیا میلونی کے ساتھ عشائیے میں شرکت کی تھی۔ اس موقع پر دونوں رہنماؤں نے روم کی تاریخی کولوزیم یادگار کا بھی دورہ کیا، جہاں مختلف اہم موضوعات پر تفصیلی تبادلۂ خیال کیا گیا۔
