ڈلاس۔ امریکی صدر ڈونلڈ ٹرمپ نے ایک بار پھر اسٹریٹجک اعتبار سے انتہائی اہم آبنائے ہرمز کا نام تبدیل کرکے اسے ’’ٹرمپ اسٹریٹ‘‘ رکھنے کی بات کہی ہے۔ انہوں نے طنزیہ انداز میں کہا کہ ایران کی قیادت اس اقدام سے ’’بہت خوش‘‘ ہوگی۔ ٹرمپ نے جاری امریکہ۔ ایران جنگ کے دوران عزم ظاہر کیا کہ واشنگٹن تہران کو جوہری ہتھیار حاصل کرنے کی اجازت نہیں دے گا۔بدھ کو ڈلاس میں ریپبلکن پارٹی کے وسط مدتی کنونشن سے خطاب کرتے ہوئے ٹرمپ نے کہا کہ امریکہ ایران کے ساتھ جنگ جیت رہا ہے۔ انہوں نے جنگ کو تیل کی قیمتوں اور اس اہم آبی گزرگاہ سے جوڑا جہاں سے عالمی توانائی کی ایک بڑی مقدار گزرتی ہے۔

ٹرمپ نے کہا کہ ان کے خیال میں آبنائے ہرمز کو ’’ٹرمپ اسٹریٹ‘‘ کہنا چاہیے۔ انہوں نے طنزیہ انداز میں کہا کہ انہیں یقین ہے کہ ایران کی قیادت اس نام سے بہت خوش ہوگی۔ انہوں نے مزید کہا کہ امریکہ کے ایران کے ساتھ جنگ جیتنے کے بعد تیل کی قیمتوں میں کمی آئے گی۔ٹرمپ نے ایران کے ممکنہ جوہری ہتھیاروں کا حوالہ دیتے ہوئے کہا کہ اگر ایران کے پاس جوہری ہتھیار ہوتا تو وہ ایران کے سپریم لیڈر سے بات کرکے پوچھ رہے ہوتے کہ کیا امریکہ ان کے لیے کچھ کر سکتا ہے۔ اس کے بجائے موجودہ صورتحال میں امریکہ ایران کے خلاف فوجی کارروائی کر رہا ہے۔

انہوں نے واضح الفاظ میں کہا کہ امریکہ ایران کو جوہری ہتھیار حاصل کرنے کی اجازت نہیں دے سکتا۔ٹرمپ نے ایران کے مشتبہ جوہری مقام ’’پک ایکس ماؤنٹین‘‘ کا بھی ذکر کیا۔ انہوں نے کہا کہ اگر وہاں دوبارہ سرگرمی شروع ہوئی تو امریکہ اس مقام کو بھی نشانہ بنا سکتا ہے۔ٹرمپ نے اجتماع سے خطاب کرتے ہوئے کہا کہ ’’پک ایکس ماؤنٹین‘‘ ایک اور جگہ ہے جہاں کارروائی کی ضرورت پڑ سکتی ہے کیونکہ کسی نے بتایا ہے کہ وہاں کچھ سرگرمی دیکھی گئی ہے۔

دوسری جانب CNN نے اس مقام پر تعمیراتی سرگرمی میں اضافے کی رپورٹ دی ہے۔ یہ مقام گرینائٹ کے نیچے واقع ہے اور طویل عرصے سے انٹیلی جنس ایجنسیوں کی توجہ کا مرکز رہا ہے۔ خدشہ ظاہر کیا جاتا ہے کہ ایران اپنے مستقبل کے جوہری پروگرام کے کچھ حصوں کو محفوظ رکھنے کے لیے اس مقام کا استعمال کر سکتا ہے۔

سینٹر فار اسٹریٹجک اینڈ انٹرنیشنل اسٹڈیز کی جانب سے 6 سال کی سیٹلائٹ تصاویر کے تجزیے کے حوالے سے رپورٹ میں کہا گیا کہ رواں سال اس مقام پر تعمیراتی سرگرمی میں واضح اضافہ ہوا ہے۔ٹرمپ نے امریکی نگرانی کی صلاحیتوں کا حوالہ دیتے ہوئے کہا کہ امریکہ کو زیادہ کچھ کرنے کی ضرورت نہیں ہے کیونکہ وہ سب کچھ دیکھ سکتا ہے۔

امریکی صدر نے امریکہ کی توانائی پیدا کرنے کی صلاحیت کا بھی ذکر کیا۔ انہوں نے دعویٰ کیا کہ امریکہ اس وقت روس اور سعودی عرب کو ملا کر جتنے تیل اور گیس پیدا کرتے ہیں اس سے زیادہ پیدا کر رہا ہے اور دنیا کا سب سے بڑا تیل پیدا کرنے والا ملک بن چکا ہے۔ٹرمپ نے وینزویلا سے متعلق اپنی انتظامیہ کے حالیہ معاہدے کا بھی ذکر کیا اور اسے امریکہ کی تاریخ کا سب سے بڑا تیل معاہدہ قرار دیا۔ انہوں نے دعویٰ کیا کہ اس معاہدے کے ذریعے 65 بلین بیرل تیل تک رسائی حاصل ہوگی اور یہ ذخائر 500 سال تک کی ضروریات پوری کر سکتے ہیں۔

ٹرمپ کے یہ بیانات آبنائے ہرمز کے حوالے سے بڑھتی ہوئی کشیدگی کے درمیان سامنے آئے ہیں۔ آبنائے ہرمز عالمی توانائی کی ترسیل کے لیے انتہائی اہم آبی گزرگاہ ہے اور امریکہ۔ ایران تنازع کے باعث اس کی اسٹریٹجک اہمیت مزید بڑھ گئی ہے۔