تہران

خاتم الانبیاء سینٹرل ہیڈکوارٹر کے نائب انسپکٹر سردار اسدی نے ہفتہ کے روز خبردار کیا ہے کہ امریکہ کے ساتھ جاری کشیدگی دوبارہ جنگ میں تبدیل ہو سکتی ہے۔ یہ بات فارس نیوز ایجنسی کے حوالے سے سامنے آئی ہے۔اسدی نے کہا کہ امریکہ کسی بھی معاہدے یا سمجھوتے کی پاسداری نہیں کرتا، جبکہ دونوں ممالک ایک نازک جنگ بندی کے مرحلے پر کھڑے ہیں۔

انہوں نے کہا کہ امریکی حکام کے بیانات اور اقدامات زیادہ تر میڈیا پر مبنی ہوتے ہیں، جن کا مقصد پہلے تیل کی قیمتوں میں کمی کو روکنا اور دوسرے اپنے پیدا کردہ بحران سے نکلنا ہے۔ ہماری مسلح افواج امریکیوں کی کسی بھی نئی مہم جوئی یا حماقت کا مقابلہ کرنے کے لیے مکمل طور پر تیار ہیں۔

دوسری جانب، سی این این کی ایک تحقیقاتی رپورٹ میں دعویٰ کیا گیا ہے کہ ایران نے خلیجی خطے کے مختلف ممالک میں قائم امریکی فوجی اڈوں کو غیر معمولی نقصان پہنچایا ہے۔

رپورٹ کے مطابق کویت کے کیمپ بیورنگ میں، جو خلیج میں امریکی فوج کا ایک بڑا مرکز تھا، ایرانی میزائلوں اور ڈرون حملوں کے کئی ہفتوں بعد وہ علاقہ تقریباً خالی اور شدید نقصان کا شکار ہو چکا ہے۔

کویت ان کئی امریکی فوجی تنصیبات میں شامل تھا جنہیں ایران نے نشانہ بنایا، جبکہ امریکہ اور اسرائیل ایران کی دفاعی صلاحیتوں پر حملے کر رہے تھے۔ سی این این کی تحقیقات میں بڑے پیمانے پر تباہی کے شواہد سامنے آئے ہیں۔ایرانی حملوں میں آٹھ ممالک میں واقع کم از کم 16 امریکی فوجی تنصیبات کو نقصان پہنچا۔ رپورٹ کے مطابق یہ خطے میں امریکی فوجی پوزیشنز کی اکثریت ہے، اور ان میں سے کچھ اب تقریباً ناقابلِ استعمال ہو چکی ہیں۔

ادھر خلیجِ عمان اور اس کے اطراف سمندری راستوں میں امریکی ناکہ بندی کے باعث ایران کو تقریباً 4.8 ارب ڈالر کے تیل کے محاصل کا نقصان ہوا ہے، جس سے تہران پر مالی دباؤ مزید بڑھ گیا ہے۔ یہ دعویٰ ایکسیوس کی رپورٹ میں پینٹاگون کے اندازوں کے حوالے سے کیا گیا ہے۔محکمہ جنگ کے جائزے کے مطابق، امریکی کارروائیوں کی وجہ سے ایران کو تقریباً 5 ارب ڈالر کی تیل آمدنی سے محروم ہونا پڑا ہے، کیونکہ ان اقدامات کا مقصد پابندیوں کے تحت آنے والی سمندری تجارت اور توانائی کی برآمدات کو روکنا ہے۔

یہ صورتحال آبنائے ہرمز کے قریب سمندری راستوں پر جاری کشیدگی کے دوران سامنے آئی ہے، جو عالمی سطح پر تیل کی ترسیل کے لیے ایک نہایت اہم گزرگاہ سمجھی جاتی ہے۔