نیویارک

نیویارک شہر کے میئر ظہران ممدانی نے پیر کی شام کوئنز میں سب وے ٹرین میں پیش آئے فائرنگ کے واقعے کے بعد راحت کا اظہار کیا ہے، جس میں ایک 15 سالہ لڑکا زخمی ہو گیا تھا۔ نیویارک سٹی پولیس ڈپارٹمنٹ اس حملے کے سلسلے میں دو مشتبہ افراد سے پوچھ گچھ کر رہا ہے۔ یہ واقعہ مین ہیٹن جانے والی اے ٹرین میں پیش آیا۔سوشل میڈیا پلیٹ فارم ایکس پر ایک پوسٹ میں میئر نے بتایا کہ انہیں اس واقعے کے بارے میں آگاہ کر دیا گیا ہے۔ انہوں نے کہا کہ مجھے آج شام کوئنز میں اے ٹرین میں ہونے والی فائرنگ کے بارے میں بریف کیا گیا، جس میں ایک 15 سالہ لڑکا زخمی ہوا۔ مجھے اطمینان ہے کہ اس کے بچ جانے کی توقع ہے۔

یہ فائرنگ اس وقت ہوئی جب شام کے مصروف اوقات میں ٹرین 80ویں اسٹریٹ اسٹیشن پر پہنچ رہی تھی۔ سی بی ایس نیوز کے مطابق، تفتیش کاروں کا ماننا ہے کہ یہ واقعہ ڈبے کے اندر زبانی جھگڑے کے بعد پیش آیا، تاہم جھگڑے کی اصل وجہ ابھی زیرِ تفتیش ہے۔میئر ممدانی نے اس واقعے کی مذمت کرتے ہوئے کہا کہ اس طرح کا تشدد شہر کے ٹرانزٹ نظام میں کسی صورت قابلِ قبول نہیں۔ انہوں نے مزید کہا کہ یہ ایک ناقابلِ قبول واقعہ ہے۔ اس طرح کی تشدد کی کوئی جگہ ہمارے سب وے نظام میں نہیں ہے، اور میری انتظامیہ ہر ممکن کوشش کرے گی تاکہ ہر نیویارکر—خاص طور پر بچے—اپنے روزمرہ کے سفر میں محفوظ رہیں۔

قانون نافذ کرنے والے اہلکار شام 6 بجے کے کچھ ہی دیر بعد موقع پر پہنچ گئے، جس کے بعد شواہد جمع کرنے کے لیے اسٹیشن کو گھیرے میں لے لیا گیا۔ پولیس نے فوری طور پر زخمی کو طبی امداد فراہم کی اور بعد ازاں اسے جمیکا اسپتال منتقل کر دیا۔

ٹرین میں موجود مسافروں نے فائرنگ کے دوران افراتفری کا منظر بیان کیا۔ ایک عینی شاہد جونیئر وائٹ نے بتایا کہ میں نے گولیوں کی آواز سنی، اور یقین کریں وہ پٹاخے نہیں تھے۔ ہم سب گھبرا گئے اور فوراً زمین پر لیٹ گئے اور نیچے ہی رہے۔انہوں نے مزید کہا کہ جیسے ہی ٹرین پلیٹ فارم پر پہنچی، "ہر طرف بھگدڑ مچ گئی۔ سب لوگ دوڑنے لگے، جن میں وہ دونوں افراد بھی شامل تھے جو لڑ رہے تھے۔

عوامی تحفظ پر اس واقعے کے اثرات کے حوالے سے کوئنز کی ڈسٹرکٹ اٹارنی میلِنڈا کاٹز نے نوجوانوں کے ہاتھوں میں غیر قانونی ہتھیاروں کے مسئلے کو حل کرنے کی ضرورت پر زور دیا۔ انہوں نے کہا کہ جب بھی کسی ٹرین میں فائرنگ ہوتی ہے، یہ نیویارک شہر کے لیے ایک سانحہ ہوتا ہے، اور ہم امید کرتے ہیں کہ ایسے ہتھیاروں کو سڑکوں اور نوجوانوں کے ہاتھوں سے دور کیا جائے گا۔اگرچہ تحقیقات جاری ہیں اور دو افراد حراست میں ہیں، تاہم سی بی ایس نیوز کے مطابق اب تک جائے وقوعہ سے کوئی ہتھیار برآمد نہیں ہوا ہے۔