ہنوئی: ویتنام میں ہندوستانی سفارت خانے نے پیر کے روز بتایا کہ ویتنام کے فو کووک جزیرے کے قریب کشتی حادثے میں جاں بحق ہونے والے 15 ہندوستانی شہریوں کی میتیں ویتنام ایئرلائنز کی پرواز وی این 979 کے ذریعے ہو چی منہ سٹی سے ممبئی روانہ کر دی گئی ہیں، جو پیر کی شام مقامی وقت کے مطابق رات 9:30 بجے ممبئی پہنچیں گی۔

سفارت خانے نے سوشل میڈیا پلیٹ فارم ایکس پر جاری بیان میں کہا کہ آندھرا پردیش، کیرالہ اور تمل ناڈو کی ریاستی حکومتیں میتوں کو ان کی متعلقہ ریاستوں میں آخری رسومات کے لیے پہنچانے کے انتظامات کریں گی۔ ہنوئی میں ہندوستانی سفارت خانے اور ہو چی منہ سٹی میں ہندوستانی قونصل خانے نے فو کووک خصوصی اقتصادی زون، صوبہ آن جیانگ، ہو چی منہ سٹی کے محکمہ خارجہ، ویتنام کی وزارت خارجہ اور دیگر متعلقہ اداروں کا حادثے کے بعد ہر ممکن تعاون پر شکریہ ادا کیا۔

بیان میں ویتنامی عوام کی جانب سے تعزیتی پیغامات اور دعاؤں پر بھی اظہارِ تشکر کرتے ہوئے کہا گیا، "ہم اپنے ویتنامی دوستوں کے تعزیتی پیغامات اور دعاؤں کے لیے شکر گزار ہیں۔ آپ کی دعاؤں، کوششوں اور موجودگی نے غم کی اس گھڑی میں ہمیں حوصلہ دیا۔" ادھر آندھرا بھون نے بتایا کہ مرکزی وزیر شہری ہوابازی کنجاراپو رام موہن نائیڈو کی مداخلت اور ویتنام میں ہندوستانی سفارت خانے سے مشاورت کے بعد میتوں کی منتقلی کے تمام انتظامات مکمل کر لیے گئے ہیں۔

اتوار کی شب حادثے میں محفوظ رہنے والے آندھرا پردیش کے کئی شہری حیدرآباد کے راجیو گاندھی بین الاقوامی ہوائی اڈے پہنچ گئے۔ ہفتے کے روز فو کووک جزیرے کے قریب 36 افراد کو لے جانے والی ایک اسپیڈ بوٹ الٹنے سے ہندوستانی سیاحوں سمیت کم از کم 15 افراد ہلاک ہو گئے تھے۔

ویتنام میں ہندوستانی سفارت خانے کے مطابق جاں بحق ہونے والوں میں 10 افراد تمل ناڈو، تین آندھرا پردیش اور دو کیرالہ سے تعلق رکھتے تھے۔ ویتنامی اخبار وی این ایکسپریس کے مطابق، اوشین پرل آئی لینڈ کمپنی کی یہ اسپیڈ بوٹ ہون مائی رُٹ جزیرے سے سیاحوں کو آن تھوئی بندرگاہ لے جا رہی تھی۔ فو کووک ہوائی اڈے سے تقریباً 25 کلومیٹر دور یہ کشتی دوپہر کے وقت الٹ گئی، جس کے نتیجے میں اس میں سوار تمام افراد سمندر میں جا گرے۔