واشنگٹن ڈی سی۔ فوکس نیوز کے قومی جائزے کے مطابق ایران کے خلاف جاری امریکی فوجی کارروائی پر امریکی ووٹرز برابر تقسیم ہیں جبکہ اکثریت ایران کو قومی سلامتی کے لیے حقیقی خطرہ سمجھتی ہے۔

جائزے کے مطابق 50 فیصد ووٹرز ایران پر امریکی حملوں کی حمایت کرتے ہیں جبکہ 50 فیصد مخالفت میں ہیں۔ ریپبلکن ووٹرز میں سے 10 میں سے 8 سے زائد اس کارروائی کے حامی ہیں جبکہ ڈیموکریٹ ووٹرز میں تقریباً 10 میں سے 8 اس کی مخالفت کرتے ہیں۔ آزاد حیثیت رکھنے والے ووٹرز میں سے تقریباً 10 میں سے 6 حملوں کے خلاف ہیں۔ فوج میں خدمات انجام دینے والے ووٹرز میں 59 فیصد حملوں کے حامی اور 39 فیصد مخالف ہیں۔

سروے میں 61 فیصد رجسٹرڈ ووٹرز نے کہا کہ ایران امریکا کے لیے حقیقی قومی سلامتی کا خطرہ ہے۔ گزشتہ برس جون میں یہ شرح 73 فیصد تک پہنچ گئی تھی جب ایرانی جوہری تنصیبات کے خلاف فوجی مشن شروع کیا گیا تھا۔

سروے میں صدر ڈونلڈ ٹرمپ کی ایران سے متعلق پالیسی پر بھی سوال اٹھایا گیا۔ 51 فیصد ووٹرز کا کہنا ہے کہ ان کا طریقہ کار امریکا کو کم محفوظ بنا رہا ہے جبکہ 29 فیصد کے مطابق اس سے ملک زیادہ محفوظ ہوا ہے۔ اس کے مقابلے میں جب سابق صدر جو بائیڈن کے بارے میں یہی سوال کیا گیا تھا تو 50 فیصد نے کہا تھا کہ ان کی پالیسی سے امریکا کم محفوظ ہوا جبکہ 12 فیصد نے اسے زیادہ محفوظ قرار دیا تھا۔

ریپبلکن ووٹرز میں اگرچہ 80 فیصد سے زائد حملوں کے حامی ہیں لیکن صرف 10 میں سے 6 سمجھتے ہیں کہ ان اقدامات سے ملک زیادہ محفوظ ہو رہا ہے۔ ڈیموکریٹس کی بڑی اکثریت کا خیال ہے کہ ان حملوں سے امریکا کم محفوظ ہوا ہے۔ آزاد ووٹرز کی بھی کم از کم 10 میں سے 6 کی رائے یہی ہے۔

امریکا کے عالمی وقار سے متعلق 56 فیصد ووٹرز کا کہنا ہے کہ آج امریکا کو دنیا میں 4 سال پہلے کے مقابلے میں کم عزت حاصل ہے جبکہ 30 فیصد نے کہا کہ عالمی سطح پر احترام میں اضافہ ہوا ہے۔

یہ جائزہ 28 فروری سے 2 مارچ کے درمیان 1 ہزار 4 رجسٹرڈ ووٹرز سے گفتگو کے بعد تیار کیا گیا اور اس میں غلطی کا امکان 3 فیصد زائد یا کم بتایا گیا ہے۔