ڈھاکہ: جنوبی اور وسطی ایشیا کے لیے امریکہ کے خصوصی ایلچی سرجیو گور نے ہفتہ کے روز بنگلہ دیش کے وزیر اعظم طارق رحمان سے وزیر اعظم کے دفتر، تیج گاؤں، ڈھاکہ میں ملاقات کی۔ وزیر اعظم کے دفتر کی جانب سے جاری بیان میں کہا گیا کہ ملاقات کے دوران بنگلہ دیش اور امریکہ کے دوطرفہ تعلقات، تجارت و سرمایہ کاری کے فروغ اور علاقائی تعاون سمیت باہمی دلچسپی کے مختلف امور پر تبادلۂ خیال کیا گیا۔
اس سے قبل جمعہ کے روز بنگلہ دیش میں ہندوستان کے ہائی کمشنر دنیش ترویدی نے بھی دورۂ بنگلہ دیش پر آئے امریکی خصوصی ایلچی سرجیو گور سے ملاقات کی۔ مقامی میڈیا کے مطابق یہ ملاقات ڈھاکہ کے ایک ہوٹل میں ہوئی۔ امریکی سفارتی ذرائع نے یو این بی کو بتایا، "میں صرف اتنا کہہ سکتا ہوں کہ یہ ایک اچھی ملاقات تھی۔"
تاہم ملاقات میں کن امور پر گفتگو ہوئی، اس کی تفصیلات سامنے نہیں آئیں۔ 25 جون کو سرجیو گور نے دنیش ترویدی کو بنگلہ دیش میں ہندوستان کے نئے ہائی کمشنر کی ذمہ داری سنبھالنے پر مبارک باد دیتے ہوئے کہا تھا کہ وہ ان کے ساتھ قریبی تعاون کے خواہاں ہیں۔
Today I called on the Honorable Prime Minister @trahmanbnp to discuss the great opportunities between the U.S. and Bangladesh to strengthen economic cooperation and enhance our partnership. This is a priority for the United States, and working together we can achieve real… pic.twitter.com/9DnO53A2Fc
— Ambassador Sergio Gor (@USAmbIndia) August 1, 2026
طارق رحمان سے ملاقات کے بعد سرجیو گور نے سوشل میڈیا پلیٹ فارم ایکس پر لکھا، "آج میری وزیر اعظم طارق رحمان سے ملاقات ہوئی، جس میں امریکہ اور بنگلہ دیش کے درمیان معاشی تعاون کو مزید مضبوط بنانے اور شراکت داری کو فروغ دینے کے مواقع پر بات چیت ہوئی۔ یہ امریکہ کی ترجیح ہے اور مل کر ہم عملی نتائج حاصل کر سکتے ہیں۔"
امریکی خصوصی ایلچی نے جمعرات کی شام بنگلہ دیش کے وزیر خارجہ ڈاکٹر خلیل الرحمان سے بھی ملاقات کی، جبکہ جمعہ کو انہوں نے کاکس بازار میں روہنگیا پناہ گزین کیمپ کا دورہ کیا۔ ادھر امریکہ نے جمعرات کو بنگلہ دیش کے لیے اپنی سفری ہدایت (Travel Advisory) بھی تبدیل کر دی۔
نئی ہدایت کے مطابق بنگلہ دیش کو لیول 3 (سفر پر نظرثانی کریں) سے کم کر کے لیول 2 (زیادہ احتیاط برتیں) پر لایا گیا ہے، جس سے ظاہر ہوتا ہے کہ ملک میں سفر نسبتاً محفوظ سمجھا جا رہا ہے۔ بنگلہ دیش کی وزارتِ خارجہ نے کہا کہ سفری ہدایت میں یہ بہتری ملک کی مجموعی سکیورٹی صورتحال پر امریکہ کے بڑھتے ہوئے اعتماد کی عکاسی کرتی ہے۔ بیان کے مطابق وزیر اعظم طارق رحمان کی قیادت میں گزشتہ چھ ماہ کے دوران ملک میں امن و امان کی صورتحال کو بہتر بنانے میں نمایاں پیش رفت ہوئی ہے۔
