واشنگٹن

سی این این کی ایک تحقیقاتی رپورٹ کے مطابق ایران نے خلیجی خطے کے مختلف ممالک میں قائم امریکی فوجی اڈوں کو بے مثال نقصان پہنچایا ہے۔رپورٹ کے مطابق کویت میں واقع کیمپ بیوہرنگ، جو خلیج میں امریکی فوج کا ایک بڑا مرکز تھا، ایرانی میزائلوں اور ڈرونز کے کئی ہفتوں تک جاری حملوں کے بعد اب تقریباً خالی ہو چکا ہے اور بری طرح تباہ ہو گیا ہے۔

کویت ان کئی امریکی فوجی تنصیبات میں شامل تھا جو تیل سے مالا مال جزیرہ نما عرب میں واقع ہیں اور جنہیں ایران نے نشانہ بنایا، جب کہ اسی دوران امریکہ اور اسرائیل ایران کی دفاعی صلاحیتوں پر حملے کر رہے تھے۔ سی این این کی تحقیقات میں اس تباہی کے واضح شواہد سامنے آئے ہیں۔

رپورٹ کے مطابق ایران کے حملوں سے آٹھ ممالک میں کم از کم 16 امریکی فوجی تنصیبات کو نقصان پہنچا ہے۔ یہ خطے میں موجود امریکی فوجی مقامات کی اکثریت ہے، جن میں سے کچھ اب عملی طور پر استعمال کے قابل نہیں رہے۔صورتحال سے واقف ایک امریکی ذریعے نے سی این این کو بتایا کہ انہوں نے پہلے کبھی امریکی اڈوں پر اس نوعیت کے حملے نہیں دیکھے—یہ تیز رفتار اور انتہائی درست نشانہ بنانے والے حملے تھے، جن میں جدید ٹیکنالوجی استعمال کی گئی۔ ایران کے اہم اہداف میں مہنگے فوجی طیارے بھی شامل تھے، جیسے بوئنگ ای تھری سینٹری، جو خلیجی خطے پر نگرانی کے لیے امریکہ کو بڑی برتری دیتا تھا۔ یہ طیارہ اب تیار نہیں ہوتا اور اس کی مالیت تقریباً 500 ملین ڈالر ہے۔

ایران نے اہم مواصلاتی آلات کو بھی نشانہ بنایا، خاص طور پر وہ بڑے گنبد نما ڈھانچے جنہیں "ریڈومز" کہا جاتا ہے، جو سیٹلائٹ ڈشز کی حفاظت کرتے ہیں اور ڈیٹا کی ترسیل کے لیے انتہائی اہم ہوتے ہیں۔ جنگ کے ایک ماہ سے بھی کم عرصے میں ایران نے ان میں سے تقریباً تمام ریڈومز کو تباہ کر دیا، سوائے ایک کے۔ خاص طور پر ریڈار نظاموں کو نشانہ بنایا گیا، جو انتہائی جدید، مہنگے، مشکل سے تبدیل ہونے والے اور فضائی دفاع کے لیے نہایت اہم ہوتے ہیں۔

ایک دوسرے امریکی ذریعے، جو کانگریس سے وابستہ ہیں اور نقصان کے جائزے سے واقف ہیں، نے کہا کہ یہ اہداف سب سے زیادہ مؤثر ثابت ہوئے۔ ان کے مطابق:ہمارے ریڈار نظام خطے میں ہماری سب سے وسیع اور ساتھ ہی سب سے محدود وسائل میں شامل ہیں۔خطے میں امریکہ کے اتحادیوں کے لیے یہ صورتحال ایک مشکل سوال بن گئی ہے۔ ایک طرف ایران کی طاقت کا مظاہرہ امریکی موجودگی کو مزید ضروری بناتا ہے، لیکن دوسری طرف ایک نئی حقیقت سامنے آئی ہے کہ جو امریکی فوجی اڈے پہلے ناقابلِ تسخیر سمجھے جاتے تھے، اب آسان ہدف بن گئے ہیں۔ ایک سعودی ذریعے نے سی این این کو بتایا کہ  اس جنگ نے سعودی عرب کو یہ دکھا دیا ہے کہ امریکہ کے ساتھ اتحاد مکمل طور پر محفوظ یا ناقابلِ شکست نہیں ہے۔

اس کمزوری کا اندازہ قطر کے العدید ایئر بیس سے بھی لگایا جا سکتا ہے، جو 21 ممالک میں امریکی فضائی طاقت کے کمانڈ اور کنٹرول کا مرکز ہے۔ اس اڈے کے وار روم کو ایک نہیں بلکہ دو بار نشانہ بنایا گیا، جس سے اسے شدید نقصان پہنچا۔ اگرچہ اس وقت تک اڈہ زیادہ تر خالی کرا لیا گیا تھا اور کوئی جانی نقصان نہیں ہوا، لیکن ایران کی اپنے اہداف پر نظر رکھنے کی صلاحیت پہلے سے کہیں زیادہ واضح ہو گئی ہے۔

فنانشل ٹائمز کے مطابق، 2024 میں تہران نے خفیہ طور پر چین کا ایک سیٹلائٹ ٹی ای ای-01 بی حاصل کیا، جو اس کے اپنے سیٹلائٹس کے مقابلے میں ایک بڑی پیش رفت تھا۔ اس سے ایران کو کم معیار کی تصاویر سے نکل کر انتہائی واضح اور تفصیلی سیٹلائٹ تصاویر حاصل ہونے لگیں، جو تقریباً امریکہ کی سطح کی ہیں۔ یہ پہلا موقع ہے جب امریکہ کسی ایسے حریف سے برسرِ پیکار ہے جس کے پاس اس درجے کی سیٹلائٹ صلاحیت موجود ہے۔

سی این این کے جواب میں پینٹاگون کے ایک عہدیدار نے کہا کہ محکمۂ دفاع نقصان کے جائزے پر بات نہیں کرتا، تاہم امریکی افواج مکمل طور پر فعال ہیں اور ان کی تیاری اور جنگی صلاحیت برقرار ہے۔ خطے میں تعینات زیادہ تر امریکی فوجیوں کو نکال لیا گیا ہے، جبکہ کئی اہلکار اب جزیرہ نما عرب میں ہوٹلوں اور رہائشی عمارتوں میں نسبتاً محفوظ مقامات سے کام کر رہے ہیں۔