میسوری [امریکہ]: امریکی ریاست میسوری میں ایک اسکائی ڈائیونگ طیارہ ٹیک آف کے کچھ ہی دیر بعد گر کر تباہ ہو گیا جس کے نتیجے میں 12 افراد ہلاک ہو گئے۔

امریکی فیڈرل ایوی ایشن ایڈمنسٹریشن (FAA) کے مطابق یہ حادثہ بٹلر میموریل ایئرپورٹ سے تقریباً 11:35 بجے مقامی وقت پر پیش آیا۔ ابتدائی معلومات کے مطابق حادثے کا شکار ہونے والا طیارہ پیسیفک ایئرواسپیس P750 تھا۔

FAA نے تصدیق کی کہ طیارے میں سوار تمام 12 افراد موقع پر ہی جان کی بازی ہار گئے۔ حادثے کے وقت ایئر ٹریفک کنٹرول کی جانب سے کوئی سروس فراہم نہیں کی جا رہی تھی۔

امریکی نیشنل ٹرانسپورٹیشن سیفٹی بورڈ (NTSB) نے حادثے کی تحقیقات شروع کر دی ہیں اور کہا ہے کہ ابتدائی رپورٹ بعد میں جاری کی جائے گی۔

رپورٹس کے مطابق طیارہ اسکائی ڈائیونگ آپریشن کے لیے مسافروں کو لے کر جا رہا تھا جب وہ ٹیک آف کے فوراً بعد گر کر قریبی کھیت میں جا گرا۔ حادثے کے بعد آگ لگ گئی جسے اہلکاروں نے جلد بجھا دیا۔

حکام کے مطابق جائے حادثہ کی نوعیت انتہائی خوفناک تھی جبکہ احتیاطی طور پر قریبی سڑکیں بھی بند کر دی گئیں۔ جاں بحق ہونے والوں کی شناخت فوری طور پر ظاہر نہیں کی گئی۔