واشنگٹن ڈی سی: امریکی صدر ڈونلڈ ٹرمپ نے منگل کے روز اعلان کیا کہ انہوں نے ایران کے ساتھ جاری جنگ بندی میں توسیع کر دی ہے تاکہ ایرانی قیادت کو مذاکرات کے لیے ایک متفقہ تجویز پیش کرنے کا مزید وقت مل سکے۔
انہوں نے کہا کہ یہ فیصلہ پاکستان کے آرمی چیف عاصم منیر اور وزیر اعظم شہباز شریف کی درخواست پر کیا گیا۔ ان کے مطابق ایران کی حکومت اندرونی طور پر شدید اختلافات کا شکار ہے اور اسے ایک واضح اور متحد مؤقف تیار کرنے کے لیے وقت درکار ہے۔
ٹرمپ نے اپنے سوشل میڈیا پلیٹ فارم پر ایک پیغام میں کہا کہ ایران کی حکومت کی اندرونی تقسیم کے پیش نظر اور پاکستان کی درخواست پر امریکہ نے ایران کے خلاف ممکنہ حملہ روک دیا ہے تاکہ ایرانی قیادت آپس میں مشاورت کر کے ایک مشترکہ تجویز پیش کر سکے۔
انہوں نے مزید کہا کہ امریکی فوج ناکہ بندی جاری رکھے گی اور ہر طرح سے تیار رہے گی جبکہ جنگ بندی اس وقت تک برقرار رہے گی جب تک ایران اپنی تجویز پیش نہیں کرتا اور مذاکرات مکمل نہیں ہو جاتے۔
یہ جنگ بندی اس ماہ کے آغاز میں سفارتی عمل کو موقع دینے کے لیے کی گئی تھی لیکن اب بھی اس کی صورتحال نازک ہے اور دونوں جانب سے اس پر تحفظات کا اظہار کیا جا رہا ہے۔
دوسری جانب امریکی نائب صدر جے ڈی وینس کا پاکستان کا مجوزہ دورہ، جس کا مقصد ایران کے ساتھ مذاکرات کا دوسرا مرحلہ تھا، فی الحال مؤخر کر دیا گیا ہے کیونکہ تہران کی جانب سے امریکی تجاویز پر کوئی واضح ردعمل سامنے نہیں آیا۔ادھر ایران نے بھی کہا ہے کہ اس نے ابھی تک امریکہ کے ساتھ مذاکرات دوبارہ شروع کرنے یا نہ کرنے کے بارے میں کوئی حتمی فیصلہ نہیں کیا ہے۔
