واشنگٹن ڈی سی: امریکی ایوان نمائندگان نے بدھ کے روز 1.15 ٹریلین ڈالر مالیت کا وسیع دفاعی پالیسی بل معمولی فرق سے منظور کر لیا۔ پولیٹیکو کے مطابق یہ منظوری زیادہ تر جماعتی بنیادوں پر ہوئی، جس سے امریکی صدر ڈونلڈ ٹرمپ کو سیاسی کامیابی ملی، جبکہ ان کی انتظامیہ کی دفاعی ترجیحات اور ایران پالیسی پر سیاسی تقسیم مزید گہری ہو گئی۔ سالانہ نیشنل ڈیفنس آتھرائزیشن ایکٹ (NDAA) کو 216 کے مقابلے میں 212 ووٹوں سے منظور کیا گیا۔ صرف چھ ڈیموکریٹ ارکان نے بل کے حق میں ووٹ دیا، جن کی حمایت سے ری پبلکن قیادت اپنی جماعت کے سات مخالف ارکان کے باوجود بل منظور کرانے میں کامیاب رہی۔
بل کی منظوری صدر ٹرمپ اور ایوان کے اسپیکر مائیک جانسن کے لیے کامیابی سمجھی جا رہی ہے، جنہوں نے ری پبلکن ارکان کے اندر اختلافات کے باوجود اسے منظور کرانے میں کامیابی حاصل کی۔ تاہم پولیٹیکو کے مطابق بل میں شامل کئی قدامت پسند تجاویز کی وجہ سے وسیع دوطرفہ حمایت کے امکانات کم ہو گئے۔
بل میں ری پبلکن حمایت یافتہ کئی اقدامات شامل ہیں، جن میں امریکی محکمہ دفاع کا نام تبدیل کر کے ’’امریکی محکمہ جنگ‘‘ رکھنے کی تجویز، صنفی تصدیقی طبی سہولیات کی کوریج پر پابندیاں اور فوجی اڈوں پر اہلکاروں کے لیے ذاتی ہتھیار رکھنے کے قواعد آسان بنانے کی تجاویز شامل ہیں۔ رپورٹ کے مطابق سخت گیر ری پبلکن ارکان کے مطالبے پر ٹرمپ کی انتخابی تجویز SAVE America Act کو بھی دفاعی بل میں شامل کیا گیا۔ روایتی طور پر دو جماعتی حمایت رکھنے والے دفاعی بل کو ڈیموکریٹس کی مخالفت کا سامنا کرنا پڑا۔
انہوں نے ایران کے خلاف جنگ سے نمٹنے کے ٹرمپ انتظامیہ کے طریقہ کار، بیرون ملک فوجی کارروائیوں، امریکی شہروں میں نیشنل گارڈ کی تعیناتی اور دیگر پالیسیوں پر اعتراضات اٹھائے۔ ایوان سے منظور شدہ بل کو سینیٹ میں مشکلات کا سامنا ہو سکتا ہے، جہاں ایران جنگ سے متعلق خدشات کے باعث ڈیموکریٹس پہلے ہی دفاعی بل کے اپنے ورژن کی پیش رفت روک چکے ہیں۔
ووٹنگ سے قبل ایوان کی مسلح افواج کمیٹی کے ڈیموکریٹ رکن ایڈم اسمتھ نے ٹرمپ انتظامیہ کی دفاعی پالیسیوں، خصوصاً جنگی امور کے وزیر پیٹ ہیگستھ کے کردار پر تنقید کی۔ انہوں نے کہا، ’’ہم انتہائی خطرناک وقت سے گزر رہے ہیں۔ میں اس بل کی دوطرفہ نوعیت برقرار رکھنا چاہتا ہوں، لیکن اس کے لیے کچھ ری پبلکن ارکان کو صدر کے سامنے کھڑے ہو کر کہنا ہوگا کہ نہیں۔‘
‘ ڈیموکریٹ قیادت نے ارکان سے بل کی مخالفت کرنے کی اپیل کی تھی، کیونکہ وہ دفاعی بجٹ، ایران پالیسی اور اپنی تجاویز کو ووٹ کے لیے پیش نہ کیے جانے پر تحفظات رکھتے تھے۔ بل کے حق میں ووٹ دینے والے چھ ڈیموکریٹ ارکان میں ہنری کیولار (ٹیکساس)، ڈان ڈیوس (نارتھ کیرولائنا)، جیرڈ گولڈن (مین)، ونسینٹ گونزالیز (ٹیکساس)، ایڈم گرے (کیلیفورنیا) اور میری گلیسن کیمپ پیریز (واشنگٹن) شامل تھے۔ بل کی مخالفت کرنے والے سات ری پبلکن ارکان میں جوش بریچین، ٹم برچیٹ، ایلی کرین، ہیریئٹ ہیگمین، انا پالینا لونا، تھامس میسی اور چِپ رائے شامل تھے۔ اختلافات کے باوجود بل کے کچھ حصوں کو دونوں جماعتوں کی حمایت حاصل رہی۔
اس میں پینٹاگون کے ہتھیاروں اور ٹیکنالوجی کی خریداری کے عمل کو تیز کرنے، فوجی اہلکاروں کی تنخواہوں میں 5 سے 7 فیصد اضافے اور یورپ سے بڑی تعداد میں فوجی انخلا پر پابندی برقرار رکھنے کی تجاویز شامل ہیں۔ اگرچہ این ڈی اے اے براہ راست فنڈز مختص نہیں کرتا، لیکن یہ دفاعی اخراجات کے لیے کانگریس کی حمایت کا اہم اشارہ سمجھا جاتا ہے۔ بل ٹرمپ انتظامیہ کی جانب سے سالانہ بجٹ عمل کے تحت طلب کردہ 1.15 ٹریلین ڈالر کے بنیادی دفاعی اخراجات کی منظوری دیتا ہے۔ ٹرمپ کے مجوزہ 1.5 ٹریلین ڈالر دفاعی بجٹ کا باقی حصہ، تقریباً 350 ارب ڈالر، ایک الگ مفاہمتی بل کے ذریعے پورا کیا جائے گا۔
امریکی کانگریس وائٹ ہاؤس کی تقریباً 90 ارب ڈالر کی ہنگامی اضافی درخواست پر بھی غور کر رہی ہے، جس میں ایران جنگ سے متعلق اخراجات کے لیے 67 ارب ڈالر شامل ہیں۔ ڈیموکریٹس نے اس جنگ کے لیے اضافی فنڈنگ کی مخالفت کی ہے، جبکہ ایوان کے ری پبلکن ارکان اسے الگ پیکیج کے ذریعے فراہم کرنے کے خواہاں ہیں۔
ڈیموکریٹس نے حتمی بل میں کچھ شقیں شامل کرانے میں کامیابی حاصل کی، جن میں دفاعی محکمے کے سویلین ملازمین کے اجتماعی مذاکرات کے حقوق کا تحفظ اور اعلیٰ فوجی افسران کو عہدے سے ہٹانے کی صورت میں پانچ دن کے اندر کانگریس کو وجوہات فراہم کرنے کی شرط شامل ہے۔
