فلوریڈا

ریاستہائے متحدہ کی مرکزی کمان (سینٹکام) نے اعلان کیا ہے کہ گائیڈڈ میزائل ڈسٹرائر یو ایس ایس رافیل پیرالٹا نے اتوار کے روز ایم/ٹی اسٹریم نامی بحری جہاز کو روک لیا، جس کے نتیجے میں یہ جہاز اپنی منزل تک پہنچنے سے محروم رہا۔

امریکی جنگی جہاز نے اس ٹینکر کو اُس وقت روکا جب اس نے ایک ایرانی بندرگاہ کی جانب سفر کرنے کی کوشش کی، جیسا کہ سینٹکام کی جانب سے جاری بیان میں کہا گیا۔ سوشل میڈیا پر دونوں جہازوں کی تصاویر کے ساتھ جاری پوسٹ میں حکام نے واضح کیا کہ یہ کارروائی ایرانی بندرگاہوں کی جاری "امریکی ناکہ بندی" کے تحت کی گئی۔

ایم/ٹی اسٹریم ایک خام تیل بردار جہاز ہے جو ایرانی پرچم کے تحت کام کر رہا ہے، جبکہ میری ٹائم اینالیٹکس فراہم کرنے والے مرین ٹریفک  کے مطابق ،اس جہاز کو تقریباً 13 دن قبل جنوب مشرقی ایشیا کی آبنائے ملاکا میں آخری بار ٹریک کیا گیا تھا۔

یہ تازہ واقعہ واشنگٹن اور تہران کے درمیان سمندری کشیدگی میں مزید اضافے کا سبب بنا ہے۔ ایران کی وزارتِ خارجہ پہلے ہی امریکہ پر سخت تنقید کر چکی ہے اور  جو بائیڈن کی انتظامیہ پر "سمندر میں قزاقی اور مسلح ڈکیتی" کا الزام عائد کیا تھا، جب اس سے قبل ایران سے منسلک دو دیگر ٹینکروں، مجیسٹک ایکس  اور ٹیفانی ، کو ضبط کیا گیا تھا۔

ایم/ٹی اسٹریم کو روکنے کا یہ واقعہ ایسے وقت میں پیش آیا ہے جب امریکی افواج خطے میں سخت بحری پابندیوں کو برقرار رکھے ہوئے ہیں۔ سرکاری بیانات کے مطابق، یہ افواج فعال طور پر جہازوں کو ایرانی پانیوں میں داخل ہونے یا وہاں سے نکلنے سے روک رہی ہیں، تاکہ اہم ساحلی علاقوں کی نگرانی اور کنٹرول کو یقینی بنایا جا سکے۔

فوج سمندری ٹریفک پر گہری نظر رکھے ہوئے ہے تاکہ جاری پابندیوں پر عملدرآمد یقینی بنایا جا سکے۔ اس کارروائی کے پیمانے کو واضح کرتے ہوئے ایک پوسٹ میں بتایا گیا کہ امریکی افواج اب تک 38 جہازوں کو واپس جانے یا اپنی بندرگاہوں کی طرف لوٹنے کی ہدایت دے چکی ہیں۔

ان بحری کارروائیوں کے ساتھ ساتھ سفارتی کشیدگی بھی برقرار ہے، کیونکہ  ٹرمپ نے پیر کے روز عندیہ دیا کہ وہ تہران کی جانب سے پیش کردہ تازہ ترین تجویز کو مسترد کرنے کی طرف مائل ہیں۔

ایرانی قیادت کی جانب سے پیش کردہ اس تجویز میں مبینہ طور پر ایک ایسا فریم ورک شامل تھا جس کے تحت آبنائے ہرمز کو دوبارہ کھولا جا سکتا تھا، جبکہ جوہری معاملے پر بات چیت کو مؤخر کرنے کی بات کی گئی تھی۔تاہم، اس معاملے سے واقف ذرائع کے مطابق، امریکی انتظامیہ ان شرائط کے حوالے سے محتاط رویہ اختیار کیے ہوئے ہے۔ اس کے باوجورپورٹ کے مطابق ثالثی کی کوششوں سے وابستہ افراد کا ماننا ہے کہ دونوں ممالک ممکنہ طور پر حل کے زیادہ قریب ہیں جتنا کہ موجودہ بیانات سے ظاہر ہوتا ہے۔

سفارتی عمل سے واقف ذرائع کا کہنا ہے کہ امریکہ اور ایران "اتنے دور نہیں جتنے دکھائی دیتے ہیں"، جس سے یہ اشارہ ملتا ہے کہ پسِ پردہ مذاکرات کسی پیش رفت کا باعث بن سکتے ہیں۔