اوٹاوا: امریکہ اور کینیڈا کے درمیان تجارتی مذاکرات جمعہ کی رات دیر گئے ناکام ہو گئے، جس کے بعد دونوں ممالک کے درمیان تجارتی کشیدگی مزید بڑھ گئی۔ امریکی حکومت نے مشرقی وقت کے مطابق رات 12 بج کر ایک منٹ پر تقریباً 28 ارب ڈالر مالیت کی کینیڈین درآمدات پر 50 فیصد ٹیرف عائد کر دیا۔ کینیڈا کے وزیر اعظم مارک کارنی نے فوری طور پر کینیڈین مذاکرات کاروں کو واشنگٹن سے واپس اوٹاوا بلا لیا اور امریکہ کے آخری لمحات کے مطالبات کو ’’غیر منصفانہ اور غیر اقتصادی‘‘ قرار دیا۔

سوشل میڈیا پلیٹ فارم ایکس پر جاری بیان میں کارنی نے کہا کہ کینیڈا جوابی کارروائی کرتے ہوئے ڈالر کے بدلے ڈالر کے اصول پر امریکی ٹیرف کا جواب دے گا اور 28 ارب ڈالر کے مساوی محصولات عائد کرے گا تاکہ کینیڈین کارکنوں اور کاروباری اداروں کا تحفظ کیا جا سکے۔ کارنی نے کہا، ’’ہم نے شروع سے ہی یہ تسلیم کر لیا تھا کہ امریکہ بدل چکا ہے اور ہم اپنے پرانے تعلقات کی طرف واپس نہیں جائیں گے۔ ہماری حکومت نے بہت سے لوگوں سے پہلے یہ سمجھ لیا تھا کہ امریکہ اپنے تمام تجارتی تعلقات کو تبدیل کر رہا ہے، اپنے قریبی اتحادیوں پر بھی ٹیرف عائد کر رہا ہے اور اپنی وسیع منڈی تک رسائی کے لیے قیمت وصول کر رہا ہے۔‘

‘ انہوں نے کہا کہ کینیڈا نے اسی بدلتے ہوئے حالات میں امریکہ کے ساتھ ایک منصفانہ معاہدے تک پہنچنے کی کوشش کی، تاکہ کینیڈین کاروباروں اور کارکنوں کو امریکی مارکیٹ تک بہتر رسائی اور زیادہ یقین حاصل ہو۔ کارنی نے کہا، ’’ہمارا مقصد ہمیشہ کینیڈین عوام کے لیے بہترین معاہدہ حاصل کرنا تھا، نہ کہ کسی بھی قیمت پر یا کسی مقررہ مدت کے دباؤ میں معاہدہ کرنا۔‘‘ وزیر اعظم کے مطابق، حالیہ ہفتوں میں مذاکرات کے دوران کینیڈا کی پوزیشن بہتر بنانے کے لیے نمایاں پیش رفت ہوئی تھی، تاہم یہ اوٹاوا کے مقاصد پورے کرنے کے لیے کافی نہیں تھی۔ انہوں نے کہا، ’’اس کے نتیجے میں، آج شام میں نے امریکہ کے ساتھ تجارتی مذاکرات معطل کرنے کا فیصلہ کیا ہے اور کینیڈا کے مذاکرات کاروں کو اوٹاوا واپس آنے کی ہدایت دی ہے۔‘‘

کارنی نے کہا کہ کینیڈین مذاکرات کاروں نے آخری لمحے تک نیک نیتی کے ساتھ ملک کے مفادات کا دفاع کیا، لیکن امریکی مجوزہ شرائط میں آخری وقت میں کی گئی تبدیلیاں غیر منصفانہ اور غیر اقتصادی تھیں اور ان سے کسی بھی ممکنہ معاہدے کی قابلِ اعتماد ہونے پر سوال اٹھتے ہیں۔ کینیڈا بھی برابر کا جوابی ٹیرف عائد کرے گا کارنی نے کہا کہ امریکہ تقریباً 28 ارب ڈالر مالیت کی کینیڈین اشیا پر 50 فیصد ٹیرف عائد کرنے کا ارادہ رکھتا ہے اور کینیڈا اپنے کارکنوں اور کاروباروں کے تحفظ کے لیے برابر مالیت کے جوابی ٹیرف عائد کرے گا۔ انہوں نے کہا کہ آئندہ چند دنوں میں حکومت کینیڈین کارکنوں اور کاروباروں کی مدد کے لیے مزید اقدامات کا اعلان کرے گی۔

گزشتہ 18 ماہ کے دوران حکومت تقریباً 25 ارب ڈالر کی امداد پہلے ہی فراہم کر چکی ہے۔ کارنی نے کہا کہ کینیڈا کی وسیع اقتصادی حکمت عملی ملکی معیشت کو مضبوط بنانے اور بیرون ملک تجارتی شراکت داریوں کو متنوع بنانے پر مرکوز ہے۔ ان کے مطابق کینیڈا تقریباً 500 ارب ڈالر کے بڑے بنیادی ڈھانچے کے منصوبوں پر پیش رفت کر رہا ہے اور کینیڈین کاروباروں کے لیے نئی برآمدی منڈیاں کھولنے کی کوشش بھی جاری ہے۔ انہوں نے دعویٰ کیا کہ کینیڈا کے موجودہ آزاد تجارتی معاہدے ملک کو 1.5 ارب صارفین تک ترجیحی رسائی فراہم کرتے ہیں اور رواں سال کے اختتام تک اس رسائی کو دوگنا کرنے کا ہدف ہے۔

کارنی نے مزید دعویٰ کیا کہ کینیڈا کی اقتصادی ترقی تیز ہو رہی ہے اور آئندہ دو برسوں میں ملک جی-7 میں دوسری تیز ترین شرح نمو حاصل کرنے کی راہ پر گامزن ہے۔ انہوں نے کہا، ’’ہماری معیشت امریکہ کے مقابلے میں چار گنا تیز رفتار سے روزگار پیدا کر رہی ہے۔ غیر امریکی منڈیوں کو ہماری برآمدات اگلی دہائی میں دوگنی ہونے کی راہ پر ہیں، جبکہ کینیڈا میں براہ راست غیر ملکی سرمایہ کاری دو دہائیوں کی بلند ترین سطح پر ہے۔‘‘ انہوں نے مزید کہا، ’’کینیڈا کے پاس وہ چیزیں موجود ہیں جن کی دنیا کو ضرورت ہے، اور ہم کسی بھی ملک کو اپنا مستقبل طے کرنے کی اجازت نہیں دیں گے۔‘

امریکہ کا ردعمل: کینیڈا کے لیے ایک ضائع شدہ موقع دوسری جانب امریکی تجارتی نمائندے کے دفتر نے کینیڈا کے فیصلے کو ’’کینیڈا کے لیے ایک ضائع شدہ موقع‘‘ قرار دیا اور الزام لگایا کہ اوٹاوا نے پہلے کیے گئے وعدوں سے پیچھے ہٹ کر نئے مطالبات پیش کیے۔ امریکی تجارتی نمائندے نے کہا کہ واشنگٹن نے کینیڈا کو اسٹیل، ایلومینیم، گاڑیوں اور لکڑی کے شعبوں میں خصوصی رعایت دینے کی پیشکش کی تھی۔ امریکی بیان میں کہا گیا، ’’یہ کینیڈا کے لیے امریکہ کے ساتھ شراکت داری کا ایک ضائع شدہ موقع ہے، جو جی-7 کی سب سے تیزی سے ترقی کرنے والی معیشت ہے۔‘‘

امریکہ نے دعویٰ کیا کہ اس نے کینیڈا کو اپنی مارکیٹ تک کسی بھی بڑے برآمد کنندہ سے بہتر رسائی دینے کی پیشکش کی تھی، لیکن کینیڈا کے نئے مطالبات اور بعض سابقہ وعدوں سے پیچھے ہٹنے کے باعث مذاکرات میں حاصل ہونے والا توازن بگڑ گیا۔ امریکی تجارتی نمائندے نے کینیڈا پر امریکہ کے خلاف جوابی اقدامات جاری رکھنے کا بھی الزام لگایا، جن میں بعض امریکی اشیا اور خدمات پر مکمل پابندیاں شامل ہونے کا دعویٰ کیا گیا۔

واشنگٹن کے مطابق، اس کی پیشکش میں اسٹیل، ایلومینیم، آٹو موبائل اور لکڑی پر ٹیرف میں نمایاں کمی کے علاوہ برآمدی کنٹرول، ٹرانس شپمنٹ کی روک تھام، ڈیجیٹل تجارت، بعض بیرونی ٹیرف میں ہم آہنگی، ایرو اسپیس سپلائی چین، اہم معدنیات اور جبری مشقت سے تیار ہونے والی مصنوعات کی درآمدات کے خلاف تعاون شامل تھا۔ امریکہ نے یہ بھی کہا کہ پیشکش میں امریکہ-میکسیکو-کینیڈا معاہدے (USMCA) پر باضابطہ مذاکرات شروع کرنے کا اعلان بھی شامل تھا۔ یہ پیش رفت ایسے وقت میں سامنے آئی ہے جب ٹرمپ انتظامیہ کی ٹیرف پالیسیوں کے بعد دنیا کے مختلف ممالک اپنے تجارتی شراکت داروں اور منڈیوں کو متنوع بنانے کی کوششیں تیز کر رہے ہیں۔