نئی دہلی : امریکی وزیرِ خارجہ مارکو روبیو نے بھارت کے ساتھ دوطرفہ تعلقات کو واشنگٹن کی اسٹریٹجک پالیسیوں کا “بنیادی ستون” قرار دیا ہے۔ نئی دہلی میں امریکی سفارت خانے کے سپورٹ اینیکس بلڈنگ کی افتتاحی تقریب سے خطاب کرتے ہوئے انہوں نے کہا کہ امریکا بھارت کے ساتھ اپنے دیرینہ تعلقات کو مزید مضبوط بنانے کے لیے پرعزم ہے۔
روبیو نے اپنے خطاب میں کہا: “یہ شراکت داری ہمارے اور بھارت کے تعلقات کی بنیاد ہے، اور میں یہاں اسی تعلق کی تجدید اور اسے مزید مضبوط بنانے آیا ہوں۔” انہوں نے اشارہ دیا کہ آنے والے مہینوں میں دونوں ممالک کے درمیان تعاون کے حوالے سے مزید اہم اور نئی پیش رفت سامنے آسکتی ہے۔ امریکی وزیرِ خارجہ نے اپنے دورے کو انتہائی اہم قرار دیتے ہوئے کہا کہ بھارت کے ساتھ تعلقات کو ایک نئی سمت دینے کے لیے اعلیٰ سطحی بات چیت جاری رہے گی۔
امریکا کے بھارت میں سفیر سرجیو گور نے اس موقع پر کہا کہ یہ دورہ تجارت، ٹیکنالوجی، دفاع اور کواڈ اتحاد سمیت متعدد شعبوں میں تعاون کو فروغ دینے پر مرکوز ہے۔ روبیو نے کولکاتا سے اپنے پہلے بھارت دورے کا آغاز کیا، جہاں وہ بعد ازاں نئی دہلی پہنچے اور وزیراعظم نریندر مودی سے ملاقات کی۔
انہوں نے مزید کہا کہ بھارت اور امریکا کے درمیان تعلقات نہ صرف دوطرفہ سطح پر بلکہ عالمی سطح پر بھی امن، سلامتی اور اقتصادی ترقی کے لیے نہایت اہم ہیں۔ یہ دورہ ایسے وقت میں ہو رہا ہے جب بھارت، امریکا، جاپان اور آسٹریلیا پر مشتمل کواڈ گروپ میں سمندری سلامتی، سپلائی چین اور عالمی چیلنجز پر تعاون کو مزید مضبوط بنانے کی کوششیں جاری ہیں۔
