نیویارک : ہندوستان نے اقوام متحدہ کی سلامتی کونسل میں جامع اصلاحات کے مطالبے کو ایک فوری عالمی ضرورت قرار دیتے ہوئے کہا ہے کہ موجودہ دور کے عالمی چیلنجز سے مؤثر طور پر نمٹنے کے لیے سلامتی کونسل کو مقصد کے مطابق بنانا ناگزیر ہو چکا ہے۔

اقوام متحدہ میں ہندوستان کے مستقل مندوب سفیر ہریش پروتھانی نے امن کے لیے قیادت کے عنوان سے سلامتی کونسل کے کھلے مباحثے کے دوران کونسل کے فرسودہ ڈھانچے پر تنقید کرتے ہوئے کہا کہ 8 دہائیوں پرانے طریقہ کار اب بین الاقوامی امن اور سلامتی برقرار رکھنے میں رکاوٹ بن رہے ہیں۔ انہوں نے کہا کہ سلامتی کونسل کی موجودہ ساخت وقت میں منجمد ہو چکی ہے اور آج کی جغرافیائی و سیاسی حقیقتوں کی عکاسی نہیں کرتی۔

سفیر ہریش پروتھانی نے اقوام متحدہ کے سیکریٹری جنرل انتونیو گوتریس کا حوالہ دیتے ہوئے کہا کہ ہم اپنے دادا دادی کے لیے بنائے گئے نظاموں کے ساتھ اپنی آنے والی نسلوں کے لیے موزوں مستقبل نہیں بنا سکتے۔ انہوں نے زور دیا کہ سلامتی کونسل کو جدید چیلنجز سے نمٹنے کے قابل بنانے کے لیے اصلاحات ایک فوری عالمی تقاضا ہیں۔

انہوں نے کہا کہ سلامتی کونسل میں اصلاحات کے لیے شروع کیا گیا بین الحکومتی مذاکراتی فریم ورک اب تک غیر مؤثر رہا ہے اور اسے جلد از جلد وقت کے تعین کے ساتھ تحریری مذاکرات کی جانب بڑھنا چاہیے تاکہ مستقل اور غیر مستقل رکنیت دونوں زمروں میں کم نمائندگی رکھنے والے خطوں کو مناسب نمائندگی دی جا سکے۔

ہندوستان نے ایک بار پھر اس عزم کا اعادہ کیا کہ وہ سلامتی کونسل کو زیادہ نمائندہ شفاف جامع اور مؤثر بنانے کے لیے اصلاحات کی مسلسل حمایت کرتا رہے گا۔ انہوں نے یہ بھی یاد دلایا کہ ہندوستان اقوام متحدہ کے امن مشنز میں نمایاں کردار ادا کرتا رہا ہے اور عالمی امن کے لیے اپنی ذمہ داریوں کو سنجیدگی سے نبھاتا آیا ہے۔