کول ووڈ (کینیڈا): حکومتوں، کارپوریشنوں اور دیگر اداروں کی طرح جامعات بھی موسمیاتی تبدیلی کے اثرات کم کرنے میں اہم کردار ادا کر سکتی ہیں اور انہیں اس ذمہ داری کو سنجیدگی سے نبھانا چاہیے۔ ہم رائل روڈز یونیورسٹی میں خدمات انجام دیتے ہیں، جو وینکوور جزیرے کے جنوبی حصے میں واقع ہے۔ یہ علاقہ اس بات کی واضح مثال ہے کہ مقامی برادریوں کو موسمیاتی خطرات، خواہ وہ بڑے ہوں یا چھوٹے، سے نمٹنے کے لیے پیشگی منصوبہ بندی کی ضرورت ہوتی ہے۔

اس سال ایل نینو کے باعث سمندر کا درجہ حرارت بڑھ گیا ہے اور موسم معمول سے زیادہ خشک ہے۔ جون ہی میں برف تیزی سے پگھلنے کے باعث وینکوور جزیرے میں برف کے ذخائر صفر فیصد تک پہنچ گئے۔ کینیڈا کی حکومت کی خشک سالی سے متعلق رپورٹ کے مطابق، اس سال ایل نینو کے موسم میں بحرالکاہل کے شمال مغربی خطے میں معمول سے زیادہ درجہ حرارت اور کم بارش متوقع ہے۔

ابتدائی موسم میں آنے والی خشک سالی، جو وینکوور جزیرے کو متاثر کر سکتی ہے، کھیتی باڑی، آبی دلدلی علاقوں، جنگلات میں آگ کے خطرات اور سیاحتی موسم کے دوران پانی کی بڑھتی ہوئی طلب پر منفی اثر ڈالے گی۔ زیادہ درجہ حرارت، خشک جنگلات اور پانی کی قلت ایک نہایت خطرناک صورتحال پیدا کرتے ہیں۔

ان حقائق کے پیش نظر مستقبل کی کامیاب اور مؤثر جامعات اپنی برتری کا معیار صرف عالمی درجہ بندی یا تحقیقی اشاریوں سے نہیں ناپیں گی، بلکہ اس بات سے جانچی جائیں گی کہ وہ اپنی علمی صلاحیتوں کو مقامی برادریوں کے مسائل کے حل میں کس حد تک بروئے کار لاتی ہیں۔

اس کے لیے ضروری ہے کہ تحقیق اور تدریس کو ہر خطے کی مخصوص ضروریات، تاریخ، معیشت، خطرات اور مواقع کے مطابق ترتیب دیا جائے۔ ایسی جامعات جو مقامی برادریوں کے ساتھ گہرا تعلق رکھتی ہیں، وہ صرف دعووں تک محدود نہیں رہتیں بلکہ عملی اقدامات کے ذریعے اپنی افادیت ثابت کرتی ہیں۔ ساحلی علاقوں کی سماجی اور ماحولیاتی خصوصیات ان کی سمندر سے قربت، محدود زمین اور مقامی آبادی کے قدرتی ماحول سے گہرے تعلق کی وجہ سے منفرد ہوتی ہیں۔

ان علاقوں کی معیشت عموماً ماہی گیری، زراعت، بندرگاہوں اور سیاحت پر منحصر ہوتی ہے۔ تاہم ان علاقوں کو شدید طوفانوں، سمندر کی سطح میں اضافے، سیلاب، گرمی کی لہروں، خشک سالی، ساحلی بنیادی ڈھانچے کو نقصان، پینے کے پانی کے مسائل، سمندری ماحولیاتی نظام کی خرابی اور بنیادی خدمات کی فراہمی میں رکاوٹ جیسے سنگین خطرات کا سامنا ہے۔ ایل نینو کے بغیر بھی وینکوور جزیرے میں اب خشک گرمیاں معمول بن چکی ہیں، جس سے بڑے درخت کمزور ہو جاتے ہیں۔ بعد ازاں سردیوں کے طوفانی ہوائیں ان درختوں کو گرا دیتی ہیں، جس سے بجلی کی لائنیں منقطع ہو جاتی ہیں اور کئی دن تک سڑکیں بند رہتی ہیں۔

اسی طرح ٹرانسپورٹ، توانائی، پانی، کچرے کے انتظام، صحت، ہنگامی امداد اور خوراک کی فراہمی جیسی بنیادی خدمات زیرِ آب کیبلوں، چھوٹے واٹر ٹریٹمنٹ پلانٹس اور فیری سروس جیسے نازک نظاموں پر منحصر ہیں۔ سردیوں کے طوفان وینکوور جزیرے اور سرزمین کے درمیان فیری سروس بھی متاثر کرتے ہیں، جس سے خوراک کی سپلائی فوری طور پر متاثر ہوتی ہے۔ ساؤتھ آئی لینڈ پراسپیریٹی پارٹنرشپ کے مطابق، وینکوور جزیرے کی 80 فیصد سے زیادہ خوراک باہر سے آتی ہے، قابلِ کاشت زمین کا صرف 20 سے 30 فیصد زیرِ کاشت ہے، جبکہ جزیرے میں کسی بھی وقت صرف تین دن کی تازہ خوراک کا ذخیرہ موجود ہوتا ہے۔

جنوبی وینکوور جزیرہ بڑھتی ہوئی آبادی، موسمیاتی تبدیلی، اور ممکنہ شدید زلزلے اور سونامی جیسے خطرات کی وجہ سے متعدد مسائل سے دوچار ہے۔ یہ خطرات لوگوں میں گھروں، روزگار اور قدرتی ماحول کے کھو جانے کے خدشات کو بڑھاتے ہیں، جس سے عدم مساوات، بداعتمادی، الزام تراشی اور سماجی ناانصافی کے امکانات بھی بڑھ جاتے ہیں۔ ہر جامعہ کو ایسا مقامی طرزِ عمل اختیار کرنا چاہیے جو براہِ راست اپنی برادری کی مدد کرے۔

رائل روڈز یونیورسٹی میں ہم یہ تسلیم کرتے ہیں کہ تمام مسائل کے حل ہمارے پاس نہیں، لیکن ہم مختلف شعبوں کے ماہرین کی مدد سے مقامی ضروریات، خطرات، صلاحیتوں اور کمزوریوں کا جائزہ لے سکتے ہیں۔ اس مقصد کے لیے اساتذہ، طلبہ اور عملے کی حوصلہ افزائی کی جاتی ہے کہ وہ مقامی سطح پر کامیاب اقدامات کی نشاندہی کریں اور اسکول بورڈز، بلدیاتی اداروں، سماجی تنظیموں اور نجی شعبے کے ساتھ مؤثر شراکت داری قائم کریں۔ تعلیم کے میدان میں تجرباتی تعلیم اور کمیونٹی پر مبنی منصوبوں کو نصاب کا حصہ بنایا جا سکتا ہے۔ مثلاً سیاحت، مواصلات، کاروبار اور ماحولیاتی سائنس کے طلبہ ساحلی علاقوں میں مقامی برادریوں کے ساتھ مل کر عملی مسائل کے حل پر مبنی منصوبوں پر کام کر سکتے ہیں۔

اسی طرح صحت، قیادت، آفات اور ہنگامی انتظام کے طلبہ مقامی ماہرین کے ساتھ مل کر جنگلاتی آگ اور زلزلوں سے قبل اور بعد کے انتظامی منصوبے تیار کر سکتے ہیں۔ مزید یہ کہ کینیڈا کے مشرقی اور شمالی ساحلی علاقوں کی جامعات کے ساتھ مشترکہ طور پر بین الشعبہ جاتی ساحلی سائنس کی ڈگریاں شروع کی جا سکتی ہیں، جس سے طلبہ کو زیادہ مواقع، مشترکہ تحقیق اور وسیع ڈیٹا تک رسائی حاصل ہوگی۔

جامعات صرف ڈگریاں دینے تک محدود نہیں رہ سکتیں بلکہ مسلسل تعلیم (Continuing Education) کے ذریعے علاقائی علمی مراکز کا کردار بھی ادا کر سکتی ہیں، جہاں تحقیق، سائنس، صحت، ثقافت اور پالیسی سازی کی مہارت کو براہِ راست مقامی مسائل کے حل سے جوڑا جائے۔ مسلسل تعلیم کے پروگرام آجر اداروں، غیر سرکاری تنظیموں اور بلدیاتی اداروں کی ضروریات کے مطابق تربیتی نصاب تیار کر کے مقامی برادریوں کو درپیش چیلنجوں سے نمٹنے میں مؤثر کردار ادا کر سکتے ہیں۔