لندن 

برطانیہ کے رکنِ پارلیمنٹ روپرٹ لوو نے مبینہ "ریپ گینگز" (جن میں زیادہ تر پاکستانی نژاد مرد شامل ہونے کا الزام ہے) کا شکار ہونے والی خواتین کے دردناک بیانات پڑھ کر سنائے۔ لوو نے کہا کہ متاثرہ خواتین کے مطابق ان کے استحصال میں ان کی نسل اور مذہب نے اہم کردار ادا کیا۔

انہوں نے ایک متاثرہ خاتون کا بیان پڑھتے ہوئے کہا کہ بار بار ایسی باتیں کہی جاتی تھیں جن سے یہ تاثر دیا جاتا تھا کہ سفید فام اور عیسائی لڑکیاں کم اخلاقی اقدار کی حامل ہوتی ہیں، جبکہ بعض مردوں کا دعویٰ تھا کہ مسلمان لڑکیوں میں وقار اور اعلیٰ اخلاقی اقدار پائی جاتی ہیں۔ ان موازنوں کو میرے ساتھ ہونے والے سلوک کو جائز ٹھہرانے، مجھے مزید ذلیل کرنے اور قابو میں رکھنے کے لیے استعمال کیا جاتا تھا۔لوو نے سوشل میڈیا پلیٹ فارم  ایکس پر ایک پوسٹ میں کہا کہ ریپ گینگ تحقیقات  اب آگے کیا ہوگا؟ میں پارلیمنٹ میں اپنے خصوصی اختیارات استعمال کرتے ہوئے مجرموں اور ان کے معاونین کے نام منظرِ عام پر لانا چاہتا ہوں۔ یہ کام انتہائی احتیاط سے کیا جائے گا اور ہر مرحلے پر ہماری قانونی ٹیم شامل رہے گی تاکہ آئندہ کسی قانونی کارروائی پر منفی اثر نہ پڑے۔

انہوں نے مزید کہا کہ ہم حکام کے ساتھ مل کر مقدمات کھلوانے اور دوبارہ کھلوانے کی کوشش کر رہے ہیں، لیکن مجھے اس نظام پر مکمل اعتماد نہیں کہ وہ خود مختار انداز میں انصاف فراہم کرے گا۔ اسی لیے ہم نجی قانونی کارروائیوں اور سول مقدمات کا سہارا لے رہے ہیں۔ ایک ہدفی فہرست تیار کی جا چکی ہے اور یہ مسلسل طویل ہو رہی ہے۔ بہت باتیں ہو چکی ہیں، اب عملی اقدام کی ضرورت ہے۔ ہمارا مقصد واضح ہے: مجرموں کو جیل بھیجنا اور متاثرین کو انصاف دلانا۔لوو نے ان گینگز کے مجرموں کو ملک بدر کرنے کا بھی مطالبہ کیا۔

انہوں نے کہا کہ ہماری تحقیقاتی رپورٹ سے ثابت ہوتا ہے کہ مذہب اور ان ریپ گینگز کے درمیان ایک مضبوط تعلق موجود ہے۔ ایک ملک کے طور پر ہمیں آخرکار یہ بات کہنے کا حوصلہ پیدا کرنا ہوگا۔ کمزور طبقے سے تعلق رکھنے والی سفید فام محنت کش لڑکیوں کے ساتھ اجتماعی زیادتی ایک سنگین اور ناقابلِ قبول برائی ہے۔

انہوں نے مزید کہا کہ ان کی رپورٹ میں تفصیل سے بیان کیا گیا ہے کہ یہ واقعات کیسے پیش آئے، ان کے اسباب کیا تھے اور مستقبل میں ایسے جرائم کو روکنے کے لیے کیا اقدامات ضروری ہیں۔لوو کے مطابق، وہ بطور رکنِ پارلیمنٹ اپنی حیثیت استعمال کرتے ہوئے اس بات کو یقینی بنانا چاہتے ہیں کہ "گرومنگ گینگز" (لڑکیوں کو بہلا پھسلا کر استحصال کرنے والے گروہ) کے متاثرین کو انصاف ملے۔

رپورٹ میں یہ دعویٰ بھی کیا گیا ہے کہ برطانیہ کے مختلف علاقوں میں کمزور نوجوان سفید فام خواتین اور لڑکیوں کے خلاف ہونے والے ان جرائم میں بڑی تعداد میں پاکستانی نژاد مسلمان مرد ملوث رہے ہیں، اور ان واقعات کو رپورٹ میں "انتہائی سنگین" قرار دیا گیا ہے۔