لندن: برطانیہ نے چالیس ممالک کے وزرائے خارجہ کا اہم اجلاس طلب کیا جس میں آبنائے ہرمز کو دوبارہ کھولنے کی حکمت عملی پر غور کیا گیا۔ یہ اہم سمندری راستہ امریکہ، اسرائیل اور ایران کے درمیان جاری تنازع کے باعث شدید متاثر ہے۔

ورچوئل اجلاس کے دوران برطانوی وزیر خارجہ یوویٹ کوپر نے ایران پر کڑی تنقید کرتے ہوئے کہا کہ آبنائے ہرمز کی ناکہ بندی عالمی معیشت کے لیے سنگین خطرہ بن گئی ہے۔ انہوں نے الزام عائد کیا کہ ایران اس اہم بحری گزرگاہ کو دباؤ کے ہتھیار کے طور پر استعمال کر رہا ہے۔

رپورٹس کے مطابق تجارتی جہازوں پر حملوں اور مزید خطرات کے باعث اس راستے سے تقریباً تمام آمدورفت رک چکی ہے جس سے عالمی سطح پر تیل کی قیمتوں میں اضافہ اور سپلائی متاثر ہوئی ہے۔

اس اجلاس میں ڈونلڈ ٹرمپ کی قیادت میں امریکہ نے شرکت نہیں کی۔ ٹرمپ پہلے ہی واضح کر چکے ہیں کہ اس آبی راستے کی سیکیورٹی ان کی ذمہ داری نہیں اور انہوں نے یورپی اتحادیوں پر جنگ میں تعاون نہ کرنے پر تنقید بھی کی ہے۔

اجلاس میں فرانس، جرمنی، اٹلی، کینیڈا، جاپان اور متحدہ عرب امارات سمیت متعدد ممالک نے شرکت کی اور مشترکہ بیان میں آبنائے ہرمز کی ناکہ بندی ختم کرنے کا مطالبہ کیا۔ ان ممالک نے عالمی جہاز رانی کے محفوظ گزر کو یقینی بنانے کے لیے تعاون جاری رکھنے کا عزم بھی ظاہر کیا۔

اگرچہ اتحاد وسیع ہے لیکن ماہرین کے مطابق عملی طور پر بحری طاقت اور حکمت عملی کے حوالے سے کئی سوالات موجود ہیں۔ بیشتر ممالک اس وقت فوجی کارروائی کے ذریعے راستہ کھولنے کے حق میں نہیں ہیں کیونکہ ایران میزائلوں، ڈرونز اور تیز رفتار کشتیوں کے ذریعے جہازوں کو نشانہ بنانے کی صلاحیت رکھتا ہے۔

برطانوی وزیر اعظم کیئر اسٹارمر نے واضح کیا ہے کہ ان کی حکومت اس مسئلے کا غیر فوجی حل چاہتی ہے اور جنگ میں براہ راست شامل ہونے کا کوئی ارادہ نہیں رکھتی۔ اسی سلسلے میں آئندہ ہفتے برطانوی وزارت دفاع کے حکام دیگر ممالک کے ساتھ مل کر طویل مدتی بحری سیکیورٹی پر بات کریں گے۔

ادھر ایمانوئل میکرون نے بھی فوجی کارروائی کو غیر حقیقت پسندانہ قرار دیتے ہوئے کہا کہ ایران سے براہ راست مذاکرات ہی اس مسئلے کا مؤثر حل ہو سکتے ہیں۔

رپورٹس کے مطابق جنگ کے آغاز سے اب تک تجارتی جہازوں پر درجنوں حملے ہو چکے ہیں جن میں کئی افراد ہلاک بھی ہوئے ہیں جبکہ ایران کا مؤقف ہے کہ وہ صرف مخالف ممالک کے جہازوں کو روک رہا ہے اور غیر جانبدار جہازوں کو گزرنے کی اجازت ہے۔