تل ابیب: اسرائیل کے وزیر اعظم بنیامین نیتن یاہو نے کہا ہے کہ انہوں نے امریکی صدر ڈونلڈ ٹرمپ سے بات کی اور ایران کے علاقے میں پھنسے ایک امریکی پائلٹ کو بچانے کے لیے کیے گئے “کامل انداز میں انجام دیے گئے امریکی مشن” پر انہیں مبارکباد دی۔ یہ پائلٹ اس وقت ایران میں گر گیا تھا جب تہران نے اصفہان کے قریب ایک ایف پندرہ طیارہ مار گرایا تھا۔

سوشل میڈیا پلیٹ فارم ایکس پر اپنے بیان میں نیتن یاہو نے کہا کہ ٹرمپ نے اس ریسکیو مشن کے دوران اسرائیل کی مدد کو سراہا ہے۔

انہوں نے کہا کہ میں نے صدر ڈونلڈ ٹرمپ سے بات کی اور دشمن کے علاقے سے گرائے گئے پائلٹ کو بچانے کے لیے ان کے جرات مندانہ فیصلے اور کامیاب امریکی مشن پر ذاتی طور پر مبارکباد دی۔ صدر نے اس کارروائی میں اسرائیل کے تعاون کی تعریف بھی کی۔

انہوں نے مزید کہا کہ مجھے اس بات پر فخر ہے کہ میدان جنگ میں اور اس کے باہر ہماری باہمی شراکت داری بے مثال ہے اور اسرائیل ایک بہادر امریکی فوجی کی جان بچانے میں اپنا کردار ادا کر سکا۔

سی این این نے اسرائیلی ذرائع کے حوالے سے رپورٹ کیا تھا کہ اسرائیل نے اس ریسکیو آپریشن میں انٹیلیجنس معاونت فراہم کی اور بعض منصوبہ بند حملوں کو مؤخر کیا تاکہ تلاش اور بچاؤ کی کارروائی متاثر نہ ہو۔

اس سے قبل امریکی صدر ڈونلڈ ٹرمپ نے تصدیق کی کہ فوج نے ایف پندرہ کے دوسرے عملے کے رکن کو بھی بچا لیا ہے جو طیارہ گرنے کے بعد لاپتہ ہو گیا تھا۔

ٹرمپ نے ٹروتھ سوشل پر اپنے بیان میں اسے امریکی فوج کی تاریخ کے سب سے جرات مندانہ ریسکیو آپریشنز میں سے ایک قرار دیا اور کہا کہ امریکہ اپنے کسی بھی فوجی کو میدان میں تنہا نہیں چھوڑے گا۔ انہوں نے یہ بھی بتایا کہ مذکورہ اہلکار زخمی ہوا تھا۔

انہوں نے کہا کہ ہم نے اسے بچا لیا ہے۔ گزشتہ چند گھنٹوں کے دوران امریکی فوج نے اپنی تاریخ کے ایک انتہائی جرات مندانہ ریسکیو آپریشن کو کامیابی سے انجام دیا ہے۔ ہمارا یہ بہادر افسر جو ایک معزز کرنل بھی ہے اب محفوظ ہے۔ وہ ایران کے دشوار گزار پہاڑوں میں دشمن کے علاقے میں موجود تھا اور دشمن اس کے قریب پہنچ رہا تھا لیکن وہ کبھی تنہا نہیں تھا کیونکہ اس کی لوکیشن پر مسلسل نظر رکھی جا رہی تھی اور اس کی بازیابی کے لیے منصوبہ بندی جاری تھی۔