نئی دہلی: یمن اور صومالیہ کے ساحل کے قریب الگ الگ واقعات میں بحری قزاقوں نے دو تجارتی جہازوں کو ہائی جیک کر لیا۔ دونوں جہازوں پر مجموعی طور پر 22 ہندوستانی شہری سوار تھے۔

وزارتِ جہاز رانی کے ایک سینئر عہدیدار نے جمعہ کو یہ اطلاع دی۔ عہدیدار نے بتایا کہ 20 اگست کو اریٹیریا کے پرچم والے تیل کی مصنوعات کے ٹینکر ایم ٹی سیبو-1 (M T Sibu 1) کو یمن کے ساحل سے تقریباً 30 سمندری میل دور خلیجِ عدن میں مسلح بحری قزاقوں نے ہائی جیک کر لیا۔ جہاز پر عملے کے کل 20 ارکان سوار تھے، جن میں 16 ہندوستانی شہری شامل ہیں۔

ایک دوسرے واقعے میں 17 اگست کو کیمرون کے پرچم والے ایک مال بردار جہاز کو صومالیہ کے پونٹ لینڈ ساحل کے قریب بحری قزاقوں نے ہائی جیک کر لیا۔ جہاز پر عملے کے 10 ارکان سوار تھے، جن میں چھ ہندوستانی شہری شامل تھے۔ عہدیداروں نے بتایا کہ تازہ ترین اطلاعات کے مطابق دونوں جہازوں پر سوار تمام ہندوستانی عملے کے ارکان محفوظ ہیں۔