کییف۔:یوکرین میں رات بھر روسی ڈرون حملوں کے نتیجے میں 2 افراد ہلاک اور درجنوں زخمی ہو گئے۔ صدر وولودومیر زیلنسکی کے مطابق توانائی کے بنیادی ڈھانچے کو نشانہ بنائے جانے کے باعث شدید سردی کے دوران بجلی کی فراہمی متاثر ہوئی۔اتوار کو سوشل میڈیا پر جاری بیان میں زیلنسکی نے کہا کہ سومی خارکیف دنیپرو زاپوریزیا خمیلنتسکی اور اوڈیسا کے علاقوں کو نشانہ بنایا گیا۔ انہوں نے بتایا کہ حملے میں 200 سے زیادہ ڈرون استعمال کیے گئے۔

زیلنسکی نے کہا کہ درجنوں افراد زخمی ہوئے جن میں ایک بچہ بھی شامل ہے۔ انہوں نے بتایا کہ اب تک 2 افراد کی ہلاکت کی اطلاع ملی ہے اور انہوں نے متاثرہ خاندانوں سے تعزیت کا اظہار کیا۔توانائی کی صورتحال پر بات کرتے ہوئے انہوں نے کہا کہ نظام اب بھی مشکل میں ہے لیکن تمام خدمات کو جلد از جلد بحال کرنے کی ہر ممکن کوشش کی جا رہی ہے۔ انہوں نے مزید کہا کہ صرف اس ہفتے 1300 سے زیادہ حملہ آور ڈرون 1050 کے قریب گائیڈڈ فضائی بم اور 29 مختلف اقسام کے میزائل استعمال کیے گئے۔

مسلسل حملوں کے تناظر میں زیلنسکی نے عالمی رہنماؤں سے مزید مدد کی اپیل دہرائی۔ انہوں نے کہا کہ اسی لیے یوکرین کو مزید تحفظ کی ضرورت ہے خاص طور پر فضائی دفاعی نظام کے لیے مزید میزائل درکار ہیں۔ انہوں نے کہا کہ اگر روس جان بوجھ کر سفارتی عمل کو طول دے رہا ہے تو دنیا کا ردعمل فیصلہ کن ہونا چاہیے جس میں یوکرین کے لیے مزید مدد اور جارح پر زیادہ دباؤ شامل ہو۔یہ تازہ روسی حملے ایک دن بعد ہوئے جب یوکرینی مذاکرات کار امریکہ پہنچے جہاں صدر ڈونلڈ ٹرمپ کی انتظامیہ کے ساتھ تقریباً چار سال سے جاری تنازع کے خاتمے کے اقدامات پر بات چیت ہوئی۔ الجزیرہ کے مطابق ان مذاکرات میں سلامتی کی ضمانتوں اور جنگ کے بعد یوکرین کی بحالی پر توجہ دی جانی تھی۔

ان سفارتی کوششوں کے پس منظر میں یوکرین اور امریکہ نے 20 نکاتی امن تجویز کا مسودہ بھی تیار کیا ہے تاہم روس کی جانب سے تاحال کوئی ردعمل سامنے نہیں آیا اور واشنگٹن کی کوششوں کے باوجود لڑائی روکنے پر کوئی معاہدہ نہیں ہو سکا۔حالیہ مہینوں میں روس نے بار بار ایسے مطالبات دہرائے ہیں جن میں علاقائی رعایتیں اور یوکرین کی نیٹو رکنیت سے دستبرداری کی یقین دہانی شامل ہے۔

میدان جنگ اور سفارتی محاذ کے ساتھ ساتھ یوکرین اس موسم سرما میں بڑھتے ہوئے توانائی بحران کا بھی سامنا کر رہا ہے جو روسی بمباری کے باعث مزید سنگین ہو گیا ہے۔ الجزیرہ کے مطابق یہ صورتحال مسلسل بگڑ رہی ہے۔اسی تناظر میں زیلنسکی نے ہفتے کے روز کہا کہ بجلی کی درآمدات اور اضافی بجلی کے آلات کی فراہمی کو تیز کرنے کی ضرورت ہے کیونکہ کییف خارکیف اور زاپوریزیا کے علاقے بجلی کی بندش سے سب سے زیادہ متاثر ہوئے ہیں۔یوکرینی حکومت نے توانائی کی ہنگامی حالت نافذ کر دی ہے۔ رپورٹ کے مطابق تباہ شدہ بجلی کا نظام ملک کی صرف 60 فیصد ضروریات پوری کر پا رہا ہے۔

یہ بحران غیر معمولی سرد موسم کے باعث مزید شدت اختیار کر گیا ہے اور ملک بھر میں خاندانوں کو خود کو گرم رکھنے میں شدید مشکلات کا سامنا ہے۔فروری 2022 میں روس کے حملے کے بعد سے ہر سرد موسم میں یوکرین کے توانائی کے ڈھانچے کو نشانہ بنایا جاتا رہا ہے۔ الجزیرہ کے مطابق اس کا مقصد یوکرینی قیادت پر دباؤ بڑھانا ہے تاکہ وہ ماسکو کی شرائط قبول کرے۔

اقوام متحدہ اور دیگر مبصرین نے اس سال یوکرین کے توانائی کے ڈھانچے پر روسی حملوں کی مذمت کی ہے اور خبردار کیا ہے کہ بچے اور بزرگ سب سے زیادہ متاثر ہو رہے ہیں۔ادھر روس کے زیر قبضہ زاپوریزیا کے حصے میں یوکرینی ڈرون حملے کے بعد 200000 سے زیادہ صارفین بجلی سے محروم ہو گئے۔ ماسکو کی جانب سے مقرر گورنر یوجینی بالیتسکی نے یہ بات بتائی۔ٹیلیگرام پر جاری بیان میں بالیتسکی نے کہا کہ بحالی کا کام جاری ہے لیکن اب بھی تقریباً 400 بستیاں بجلی سے محروم ہیں۔جنوب مشرقی خطے میں درجہ حرارت نقطہ انجماد سے کہیں نیچے ہے اور اس علاقے کا تقریباً 75 فیصد حصہ روس کے کنٹرول میں ہے۔