واشنگٹن
امریکی صدر ڈونلڈ ٹرمپ نے تہران کو سخت وارننگ دیتے ہوئے کہا ہے کہ اگر اس کے جوہری پروگرام سے متعلق کوئی سفارتی حل جلد نہیں نکلا تو امریکہ مزید سخت مؤقف اختیار کرے گا۔
اپنے سوشل میڈیا پلیٹ فارم "ٹروتھ سوشل" پر ایک پوسٹ میں صدر نے اپنی ایک تصویر شیئر کی جس میں وہ ایک اسالٹ رائفل تھامے ہوئے ہیں، اور ساتھ ہی نعرہ درج تھا: اب مزید نرم رویہ نہیں۔ ٹرمپ نے مذاکرات کی سست رفتار پر ناراضگی ظاہر کرتے ہوئے کہا کہ "ایران اپنے معاملات سنبھال نہیں پا رہا"۔ انہوں نے ایرانی قیادت پر تنقید کرتے ہوئے کہا کہ "وہ ایک غیر جوہری معاہدے پر دستخط کرنا بھی نہیں جانتے"۔
صدر کے یہ بیانات ایسے وقت میں سامنے آئے ہیں جب خطے میں کشیدگی بڑھتی جا رہی ہے اور سفارتی تعطل برقرار ہے۔ انہوں نے اپنی پالیسی میں تبدیلی کا اشارہ دیتے ہوئے خبردار کیا: انہیں جلد سمجھداری دکھانی ہوگی!۔
ٹرمپ کی یہ پوسٹ اس بات کی نشاندہی کرتی ہے کہ اگر تہران واشنگٹن کی پیش کردہ شرائط کو ماننے سے گریز کرتا رہا تو امریکہ مزید جارحانہ پالیسی اختیار کر سکتا ہے۔یہ بیان حالیہ کوششوں کے بعد سامنے آیا ہے جن میں ایک نئے "ٹرمپ معاہدے" پر بات چیت کی جا رہی تھی، جو سابقہ معاہدوں کی جگہ لے سکے، جنہیں صدر اکثر عالمی سلامتی کے لیے ناکافی قرار دیتے رہے ہیں۔
ٹرمپ نے ایران کی حالیہ سفارتی کوششوں پر بھی شدید عدم اطمینان کا اظہار کیا اور کہا کہ جب تک جوہری مسئلے پر براہِ راست بات نہیں ہوتی، امریکہ مذاکرات کو آگے نہیں بڑھائے گا۔
صدر نے یہ بھی دعویٰ کیا کہ ایران نے خود کو "بحران کی حالت" میں بتایا ہے اور اسی وجہ سے وہ آبنائے ہرمز کو جلد از جلد دوبارہ کھولنے پر زور دے رہا ہے۔
اپنے بیان میں ٹرمپ نے عالمی سلامتی کو لاحق خطرات کی طرف اشارہ کرتے ہوئے کہا کہ اگر ایران نے جوہری ہتھیار حاصل کر لیے تو "پوری دنیا یرغمال بن سکتی ہے۔ایران کی جانب سے ایک تجویز پیش کی گئی تھی جس میں مغربی ایشیا میں فوری جنگ بندی اور اسٹریٹجک اہمیت کی حامل آبنائے ہرمز میں بحری آمدورفت کی بحالی شامل تھی، تاہم اس میں جوہری پروگرام، میزائل ٹیکنالوجی اور پابندیوں سے متعلق بات چیت کو مؤخر کرنے کی بات کی گئی تھی، جسے مسترد کر دیا گیا۔دوسری جانب ایرانی وزیر خارجہ عباس عراقچی سفارتی سطح پر سرگرم ہیں، انہوں نے اسلام آباد کا دورہ کیا اور سینٹ پیٹرزبرگ میں روسی صدر ولادیمیر پوتن سے ملاقات کی تاکہ عالمی حمایت حاصل کی جا سکے۔
ادھر خلیجی تعاون کونسل (جی سی سی) کے رہنماؤں نے سعودی عرب میں ایک اجلاس کے دوران ایران کے اقدامات کو "غیر قانونی" قرار دیتے ہوئے آبنائے ہرمز کی بندش اور بحری راستوں کو لاحق خطرات کی مخالفت کی۔اس اجلاس میں قطر، بحرین، کویت اور متحدہ عرب امارات کے اعلیٰ نمائندوں نے شرکت کی اور مشترکہ طور پر مطالبہ کیا کہ خطے میں سلامتی اور بحری نقل و حمل کی آزادی کو بحال کیا جائے۔
مزید برآں، جی سی سی نے دفاعی تعاون بڑھانے، مشترکہ ڈھانچے قائم کرنے اور بیلسٹک میزائل کے ابتدائی انتباہی نظام کی تشکیل کی بھی حمایت کی۔عالمی اور علاقائی دباؤ میں اضافے کے درمیان، "دی وال اسٹریٹ جرنل" کی رپورٹ کے مطابق امریکی انتظامیہ طویل المدتی اقتصادی محاذ آرائی کے لیے تیاری کر رہی ہے۔
اطلاعات کے مطابق ٹرمپ نے اپنی ٹیم کو ہدایت دی ہے کہ ایران کے خلاف ایک مستقل بحری ناکہ بندی کی منصوبہ بندی کی جائے، جس کے ذریعے اس کی معیشت اور تیل کی برآمدات کو سخت نقصان پہنچایا جا سکے۔
رپورٹ کے مطابق صدر اس حکمت عملی کو فضائی حملوں یا مکمل لاتعلقی کے مقابلے میں زیادہ مؤثر اور کم خطرناک سمجھتے ہیں، جو ایک طویل المدتی اقتصادی دباؤ کی پالیسی کی طرف اشارہ کرتی ہے۔
