نئی دہلی 

امریکی صدر ڈونلڈ ٹرمپ نے جمعرات کے روز اعلان کیا کہ امریکہ پولینڈ میں مزید 5,000 فوجی تعینات کرے گا۔ اس اعلان کے بعد یورپ میں امریکی فوجی موجودگی کو کم کرنے سے متعلق ٹرمپ اور ان کی انتظامیہ کے گزشتہ چند ہفتوں کے متضاد بیانات کے باعث مزید ابہام پیدا ہو گیا ہے۔

اس سے قبل ٹرمپ انتظامیہ نے کہا تھا کہ وہ یورپ میں تعینات امریکی فوجیوں کی تعداد تقریباً 5,000 کم کر رہی ہے، جبکہ امریکی حکام نے تصدیق کی تھی کہ تقریباً 4,000 فوجی اب پولینڈ میں تعینات نہیں رہیں گے۔ٹرمپ کے سوشل میڈیا پر کیے گئے اس اعلان نے یورپی اتحادیوں کی تشویش میں مزید اضافہ کر دیا ہے، کیونکہ وہ پہلے ہی ان پالیسی تبدیلیوں سے متاثر ہیں۔ اس سے قبل امریکی انتظامیہ شمالی بحرِ اوقیانوس معاہدہ تنظیم (نیٹو) کے رکن ممالک پر اپنی دفاعی ذمہ داریوں کا مناسب بوجھ نہ اٹھانے اور ایران جنگ میں مطلوبہ حمایت فراہم نہ کرنے کا الزام عائد کرتی رہی ہے۔

ٹرمپ نے اپنے سوشل میڈیا پلیٹ فارم "ٹروتھ سوشل" پر لکھا کہ پولینڈ کے موجودہ صدر کارول ناوروکی کی کامیاب انتخابی مہم اور ان کے ساتھ ہمارے مضبوط تعلقات کی بنیاد پر مجھے یہ اعلان کرتے ہوئے خوشی ہو رہی ہے کہ امریکہ پولینڈ میں مزید 5,000 فوجی بھیجے گا۔چند روز قبل جرمنی کے چانسلر فریڈرک مرز نے کہا تھا کہ ایرانی قیادت امریکہ کی ’’توہین‘‘ کر رہی ہے اور انہوں نے جنگی حکمتِ عملی میں کمی پر بھی تنقید کی تھی۔ اس کے بعد ٹرمپ اور پینٹاگون نے اعلان کیا تھا کہ جرمنی میں تعینات امریکی فوجیوں کی تعداد کم کی جائے گی۔

اس ماہ کے آغاز میں ٹرمپ نے صحافیوں سے گفتگو کرتے ہوئے کہا تھا کہ امریکہ فوجیوں کی تعداد میں 5,000 سے کہیں زیادہ کمی کرے گا۔گزشتہ ہفتے تک دوسری آرمڈ بریگیڈ کومبیٹ ٹیم، فرسٹ کیولری ڈویژن کے تقریباً 4,000 فوجی پولینڈ روانہ نہیں ہوئے تھے۔

خبر رساں ادارے ایسوسی ایٹڈ پریس (اے پی) کے مطابق، اس تعیناتی کی منسوخی ٹرمپ کے اس حکم پر عمل درآمد کا حصہ تھی جس کے تحت یورپ میں امریکی فوجیوں کی تعداد کم کی جا رہی ہے۔اسی طرح جرمنی میں طویل فاصلے تک مار کرنے والے میزائل چلانے کی تربیت یافتہ فوجی اہلکاروں کی تعیناتی بھی روک دی گئی تھی۔

ڈیموکریٹک اور ریپبلکن دونوں جماعتوں کے ارکانِ کانگریس نے ان فوجی کٹوتیوں پر تنقید کی ہے۔ان کا کہنا ہے کہ اس اقدام سے یوکرین میں گزشتہ چار برس سے جاری جنگ کے دوران امریکہ کے اتحادیوں اور روسی صدر ولادیمیر پوتن دونوں کو غلط پیغام جائے گا۔