واشنگٹن

امریکی صدر ڈونلڈ ٹرمپ نے بدھ کے روز (مقامی وقت کے مطابق) قطر کے شاہی خاندان کی جانب سے عطیہ کیے گئے جدید طرز کے اپ گریڈ شدہ ایئر فورس ون 747 طیارے میں پہلی پرواز کی۔

ٹرمپ نے اس طیارے کو اب تک بنایا جانے والا "دنیا کا بہترین تجارتی طیارہ" قرار دیا۔ وہ شمالی ڈکوٹا کے دورے سے واپسی پر جوائنٹ بیس اینڈریوز پہنچے، جہاں انہوں نے تھیوڈور روزویلٹ صدارتی لائبریری کے آئندہ افتتاح کے سلسلے میں شرکت کی تھی۔

ٹرمپ نے کہا کہ یہ اس طیارے کی پہلی پرواز ہوگی، جسے میں شاید اب تک بنایا جانے والا سب سے عظیم تجارتی طیارہ سمجھتا ہوں۔ میں نے بوئنگ سے پوچھا کہ سب سے بہترین طیارہ کون سا ہے؟ انہوں نے کہا کہ یہ اب تک بنایا گیا بہترین طیارہ ہے، اور آپ کو اس میں سفر کرنے کا اعزاز حاصل ہوگا، اور مجھے بھی اس میں سفر کرنے کا اعزاز حاصل ہے۔

سی این این کے مطابق، تقریباً 40 کروڑ امریکی ڈالر مالیت کا یہ طیارہ قطر کے شاہی خاندان کی جانب سے بغیر کسی شرط کے بطور تحفہ دیا گیا ہے۔ تاہم، اس تحفے کے بعد قانونی، اخلاقی اور قومی سلامتی کے حوالے سے متعدد سوالات اٹھائے گئے ہیں۔ طیارے کو نئے رنگوں، جن میں سفید، سرخ اور گہرا نیلا شامل ہے، سے آراستہ کیا گیا ہے، جبکہ اس میں ایسی تبدیلیاں بھی کی گئی ہیں جو اسے ٹرمپ کے ذاتی طیارے سے مشابہ بناتی ہیں، جسے وہ کئی برسوں سے استعمال کرتے رہے ہیں۔

ٹرمپ نے کہا کہ یہ ایسا طیارہ ہے جو ریاستہائے متحدہ امریکہ کے پاس ہونا چاہیے۔ ہمارا ایئر فورس ون 35 یا 36 سال پرانا تھا، اور جب اسے ایسے نئے طیاروں کے ساتھ کھڑا کیا جاتا تھا تو وہ ہمارے ملک کے شایانِ شان نہیں لگتا تھا۔ ہمیں اس پر بہت فخر ہے، اور ملک کو بھی اس پر فخر ہے۔ آپ یا تو اسے سادہ رکھ سکتے ہیں یا پھر اس کی نمائش کر سکتے ہیں، اور میرے خیال میں ملک کو اس پر فخر کرنا چاہیے۔ یہ بہت خوبصورت ہے، اور جب آپ اس میں سوار ہوں گے تو خود دیکھ لیں گے۔

ٹرمپ نے مزید کہا کہ امریکہ خود اس معیار کا طیارہ تیار نہیں کر سکتا، اور یہ تحفہ اس لاگت کے مقابلے میں بہت کم خرچ ثابت ہوا ہے جو امریکہ کو اسے کسی اور طریقے سے حاصل کرنے پر برداشت کرنا پڑتی۔انہوں نے کہا کہ اگر ہم اسے کسی اور طریقے سے حاصل کرتے تو اس پر بہت زیادہ لاگت آتی۔ یہ ایک ایسے ملک کی جانب سے تحفہ ہے جس نے ہمارے ساتھ بہت اچھا سلوک کیا ہے اور جو مشرق وسطیٰ میں ہمارا اتحادی ہے، یعنی قطر۔ میں نے بوئنگ سے پوچھا کہ سب سے بہترین طیارہ کس کے پاس ہے؟ انہوں نے کہا، 'قطر کے پاس۔' اس جیسا طیارہ پہلے کبھی نہیں بنایا گیا۔ سچ کہوں تو ہم ایسا طیارہ خود نہیں بنا سکتے، کیونکہ ہم اس پر اتنی بڑی رقم خرچ کرنے کے لیے تیار نہیں ہوتے۔ انہوں نے اس پر کھل کر سرمایہ خرچ کیا ہے۔

اس سے قبل، 19 مئی کو وائٹ ہاؤس کی پریس سیکریٹری کیرولین لیویٹ نے کہا تھا کہ یہ طیارہ امریکی فضائیہ کو عطیہ کیا گیا ہے۔

انہوں نے کہاکہ قطر کی حکومت اور قطری شاہی خاندان نے یہ طیارہ امریکی فضائیہ کو عطیہ کرنے کی پیشکش کی ہے، اور یہ عطیہ تمام قانونی اور اخلاقی تقاضوں کے مطابق قبول کیا جائے گا۔ امریکی محکمہ دفاع اور امریکی فضائیہ اس طیارے کو اعلیٰ ترین معیار کے مطابق اپ گریڈ کریں گے۔ یہ طیارہ امریکہ کے صدر کے لیے ذاتی تحفہ یا عطیہ نہیں ہے۔ جن لوگوں نے گزشتہ ہفتے اس کے برعکس خبریں شائع کیں، انہیں اپنی رپورٹوں کی تصحیح کرنی چاہیے، کیونکہ یہ ہمارے ملک اور امریکی فضائیہ کے لیے عطیہ ہے۔ جہاں تک وقت کے تعین کا تعلق ہے، چونکہ یہ طیارہ امریکی فضائیہ قبول کر رہی ہے، اس لیے اس بارے میں وہی تفصیلات فراہم کر سکتی ہے، کیونکہ صدر کا اس عمل سے براہِ راست کوئی تعلق نہیں ہے۔ یہ مکمل طور پر فضائیہ کا منصوبہ ہے۔