واشنگٹن

امریکہ کے صدر ڈونلڈ ٹرمپ نے جمعہ کے روز (امریکی مقامی وقت کے مطابق) ایک حکم نامے پر دستخط کیے، جس کے تحت تمام ممالک پر 10 فیصد عالمی ٹیرف عائد کر دیا گیا ہے، جو “تقریباً فوری طور پر” نافذ العمل ہوگا۔

ٹروتھ سوشل پر ایک پوسٹ میں اس اعلان کا اشتراک کرتے ہوئے امریکی صدر نے کہا كہ یہ میرے لیے اعزاز کی بات ہے کہ میں نے ابھی اوول آفس سے تمام ممالک پر 10 فیصد عالمی ٹیرف پر دستخط کیے ہیں، جو تقریباً فوری طور پر نافذ ہوگا۔ اس معاملے پر توجہ دینے کا شکریہ! صدر ڈونلڈ جے ٹرمپ”۔

وائٹ ہاؤس کے ایک عہدیدار نے بتایا کہ یہ نیا ٹیرف اس وقت تک نافذ رہے گا جب تک کوئی اور اختیار استعمال نہیں کیا جاتا، اور اس بات پر زور دیا کہ تجارتی شراکت دار امریکی تجارتی معاہدوں کی پاسداری کریں۔ عہدیدار نے تمام تجارتی شراکت داروں کو ہدایت کی کہ وہ تجارتی معاہدوں پر عمل کریں۔ 10 فیصد عالمی ٹیرف ٹرمپ کے تحفظ پسند تجارتی ایجنڈے کا حصہ ہے، جس کا مقصد ادائیگیوں کے توازن کے مسائل اور غیر منصفانہ تجارتی طریقوں سے نمٹنا ہے۔

امریکی صدر ڈونلڈ ٹرمپ نے امریکی سپریم کورٹ میں بڑی قانونی شکست کے بعد 10 فیصد عالمی ٹیرف “فوری طور پر نافذ” کرنے کا اعلان کیا۔ سپریم کورٹ نے 6-3 کے فیصلے میں قرار دیا کہ ٹرمپ انتظامیہ نے 1977 کے انٹرنیشنل ایمرجنسی اکنامک پاورز ایکٹ کے تحت وسیع پیمانے پر درآمدی ٹیرف عائد کر کے اپنے قانونی اختیارات سے تجاوز کیا۔

سپریم کورٹ کے فیصلے کو “انتہائی خراب فیصلہ” قرار دیتے ہوئے ٹرمپ نے اعلان کیا کہ وہ ٹریڈ ایکٹ 1974 کے سیکشن 122 کے تحت 10 فیصد عالمی ٹیرف کے لیے ایک ایگزیکٹو آرڈر پر دستخط کریں گے۔ یہ اختیار ادائیگیوں کے توازن کے خسارے سے نمٹنے کے لیے 150 دن تک 15 فیصد تک عارضی درآمدی سرچارج کی اجازت دیتا ہے۔

انہوں نے کہا كہ فوری طور پر، سیکشن 232 کے تحت قومی سلامتی کے تمام ٹیرف اور سیکشن 301 کے تحت موجودہ ٹیرف بدستور نافذ رہیں گے۔ آج میں ہمارے معمول کے ٹیرف کے علاوہ سیکشن 122 کے تحت 10 فیصد عالمی ٹیرف عائد کرنے کا حکم نامہ دستخط کروں گا۔ چیف جسٹس جان رابرٹس، جن کے ساتھ جسٹس نیل گورسوچ، ایمی کونی بیریٹ اور تین لبرل جج شامل تھے، نے کہا کہ آئی ای ای پی اے صدر کو محصولات عائد کرنے کا واضح اختیار نہیں دیتا، کیونکہ یہ اختیار آئین کے تحت کانگریس کو حاصل ہے۔

جسٹس سیموئیل الیٹو، کلیرنس تھامس اور بریٹ کیوانا نے اختلافی رائے دی اور ہنگامی اختیارات کی وسیع تشریح کے ساتھ انتظامیہ کے مؤقف کی حمایت کی۔ اس فیصلے کے نتیجے میں اربوں ڈالر کے “باہمی” اور ہنگامی ٹیرف کالعدم قرار دیے گئے، جس کے باعث حکومت کو ممکنہ طور پر تقریباً 130 سے 175 ارب ڈالر تک کی وصول شدہ رقم واپس کرنا پڑ سکتی ہے۔

امریکی سپریم کورٹ نے کہا کہ امریکی صدر کے پاس آئی ای ای پی اے کے تحت تقریباً تمام امریکی تجارتی شراکت داروں سے آنے والی اشیا پر وسیع درآمدی محصولات عائد کرنے کا اختیار نہیں تھا۔ ٹرمپ پہلے ہی کہہ چکے ہیں کہ عدالت کی جانب سے “غلط طور پر مسترد” کیے گئے ٹیرف کی جگہ “متبادل ذرائع” استعمال کیے جائیں گے۔

انہوں نے کہا كہ اب دیگر متبادل استعمال کیے جائیں گے تاکہ ان کی جگہ لی جا سکے جنہیں عدالت نے غلط طور پر مسترد کیا ہے۔ ہمارے پاس متبادل موجود ہیں۔ اس سے زیادہ آمدنی ہو سکتی ہے، ہم زیادہ پیسہ وصول کریں گے۔ ہم پہلے ہی سینکڑوں ارب ڈالر وصول کر چکے ہیں اور آئندہ بھی ایسا کرتے رہیں گے۔

فیصلے کو “مضحکہ خیز” قرار دیتے ہوئے ٹرمپ نے کہا کہ اس سے دوسرے ممالک کو فائدہ ہو رہا ہے لیکن امریکہ کو نہیں۔ انہوں نے الزام لگایا کہ عدالتیں “غیر ملکی مفادات کے زیرِ اثر” ہیں۔

انہوں نے کہا كہ وہ غیر ملکی ممالک جو برسوں سے ہمیں نقصان پہنچا رہے تھے، خوشی منا رہے ہیں۔ وہ سڑکوں پر ناچ رہے ہیں، لیکن یہ زیادہ دیر نہیں چلے گا۔ وہ جج ہمارے ملک کے لیے باعثِ شرم ہیں۔ عدالت غیر ملکی مفادات اور ایک ایسی سیاسی تحریک کے زیرِ اثر آ گئی ہے جو لوگوں کے اندازے سے کہیں چھوٹی ہے۔ ٹرمپ نے خاص طور پر کہا کہ “ہندوستان کا معاہدہ برقرار ہے”، جس سے یہ اشارہ ملا کہ حالیہ دو طرفہ تجارتی معاہدے—جن میں باہمی ٹیرف کو 18 فیصد تک کم کرنا بھی شامل ہے—ان نئے قانونی راستوں کے تحت برقرار رکھے جائیں گے۔

اس فیصلے سے عالمی تجارت، کاروبار، صارفین، مہنگائی کے رجحانات اور ملک بھر کے گھریلو مالی معاملات پر دور رس اثرات مرتب ہونے کی توقع ہے۔ اس فیصلے کے مالی اثرات بھی نمایاں ہیں۔ زیرِ بحث ٹیرف کھربوں ڈالر کی تجارت کا احاطہ کرتے ہیں، اور امریکی حکومت نے 14 دسمبر تک متنازعہ اختیار کے تحت تقریباً 134 ارب امریکی ڈالر وصول کیے۔

فیصلے کے بعد امریکی اسٹاک انڈیکسز میں اضافہ ہوا، کیونکہ سرمایہ کاروں نے مہنگائی کے دباؤ میں کمی کی توقع کی، تاہم ٹرمپ کے فوری طور پر نئے محصولات دوبارہ نافذ کرنے کے اعلان نے اس اضافے کو محدود رکھا۔

انتظامیہ نے سیکشن 301 کے تحت “غیر منصفانہ تجارتی طریقوں” کی نئی تحقیقات بھی شروع کیں، جن کے نتیجے میں مزید مستقل اور مخصوص محصولات عائد کیے جا سکتے ہیں۔

ٹرمپ نے زور دیا کہ سیکشن 232 (قومی سلامتی) کے تحت پہلے سے عائد ٹیرف اور سیکشن 301 (غیر منصفانہ تجارت) کے تحت موجودہ ٹیرف “مکمل طور پر نافذ” رہیں گے، کیونکہ وہ آئی ای ای پی اے سے متعلق عدالتی فیصلے سے متاثر نہیں ہوئے۔