واشنگٹن

امریکہ کے صدر ڈونلڈ ٹرمپ نے اعلان کیا ہے کہ بل پلٹے 19 جون سے قائم مقام ڈائریکٹر آف نیشنل انٹیلی جنس (ڈی این آئی) کا عہدہ سنبھالیں گے، جبکہ وہ بیک وقت ملک کے اہم ہاؤسنگ ریگولیٹری ادارے کی سربراہی بھی برقرار رکھیں گے۔

صدر ٹرمپ نے اپنے سوشل میڈیا پلیٹ فارم پر ایک پوسٹ میں کہا کہ ولیم (بل) پلٹے، جو تلسی گبارڈ کے ساتھ قریبی طور پر کام کر رہے ہیں، جمعہ 19 جون سے قائم مقام ڈائریکٹر آف نیشنل انٹیلی جنس کی ذمہ داریاں سنبھالیں گے۔

ٹرمپ نے مزید بتایا کہ پلٹے فیڈرل ہاؤسنگ فنانس ایجنسی کے ڈائریکٹر اور رہائشی قرضوں کی بڑی مالیاتی کمپنیوں فینی مے اور فریڈی میک کے چیئرمین کے طور پر بھی اپنی ذمہ داریاں جاری رکھیں گے۔

امریکی قانون کے مطابق، سینیٹ کی توثیق نہ ہونے کی صورت میں قائم مقام ڈی این آئی زیادہ سے زیادہ 210 دن تک اس عہدے پر فائز رہ سکتا ہے۔ اس قانونی شق کے تحت پلٹے آئندہ نومبر میں ہونے والے وسط مدتی انتخابات تک اس منصب پر برقرار رہ سکتے ہیں۔ڈونلڈ ٹرمپ نے امریکی اخبار وال اسٹریٹ جرنل سے گفتگو کرتے ہوئے بتایا کہ انہوں نے پلٹے کو انٹیلی جنس ایجنسی میں افرادی قوت کم کرنے کا عمل شروع کرنے کی ہدایت دی ہے تاکہ بعض ملازمین کو برطرف کرنے کا عمل آگے بڑھایا جا سکے۔

صدر ٹرمپ نے کہا کہ میں چاہتا ہوں کہ یہ ادارہ چھوٹا ہو۔ میرے خیال میں وہاں بہت سے ایسے لوگ موجود ہیں جنہیں وہاں نہیں ہونا چاہیے۔اطلاعات کے مطابق ان کا اشارہ انٹیلی جنس اداروں کے ان اہلکاروں کی جانب تھا جو سابق ڈیموکریٹک حکومتوں کے دوران خدمات انجام دیتے رہے تھے۔ انہوں نے مزید کہا کہ جو بھی شخص مستقبل میں مستقل ڈی این آئی مقرر ہوگا، اسے بھی ان اقدامات کو جاری رکھنا چاہیے۔

یہ اعلان تلسی گبارڈ کے استعفے کے فوراً بعد سامنے آیا ہے۔ گبارڈ 30 جون تک ادارے کے ساتھ وابستہ رہیں گی تاکہ قیادت کی منتقلی کا عمل بخوبی مکمل کیا جا سکے۔تلسی گبارڈ نے اپنے شوہر ابراہم ولیمز کی حمایت کے لیے استعفیٰ دیا، جن میں ہڈیوں کے سرطان (بون کینسر) کی ایک نایاب قسم کی تشخیص ہوئی ہے۔

اپنے رسمی استعفیٰ نامے میں گبارڈ نے ڈونلڈ ٹرمپ کا شکریہ ادا کرتے ہوئے کہا کہ گزشتہ 18 ماہ تک آفس آف ڈائریکٹر آف نیشنل انٹیلی جنس کی سربراہی کرنا ان کے لیے اعزاز کی بات تھی۔ انہوں نے یقین دلایا کہ وہ اپنی روانگی سے قبل قیادت کی منتقلی کے عمل کو ہموار بنانے کے لیے مکمل تعاون کریں گی۔

انہوں نے اپنے خط میں لکھا کہ ہمارے خاندان کے لیے اس نہایت ذاتی اور مشکل وقت میں آپ کی سمجھ بوجھ اور تعاون کا شکریہ۔

ڈی این آئی کے طور پر اپنے دورِ ذمہ داری کے دوران تلسی گبارڈ نے انٹیلی جنس برادری میں اصلاحات کے متعدد اقدامات کی قیادت کی۔ ان میں ادارے کے حجم میں کمی اور تنوع، مساوات اور شمولیت (ڈی ای آئی) سے متعلق پروگراموں کا خاتمہ شامل تھا۔

مزید برآں، گبارڈ نے پانچ لاکھ سے زائد صفحات پر مشتمل سرکاری دستاویزات کو عوامی کرنے کے عمل کی نگرانی بھی کی۔ ان دستاویزات میں ٹرمپ-روس تحقیقات اور سابق امریکی صدر جان ایف کینیڈی اور سینیٹر رابرٹ ایف کینیڈی کے قتل سے متعلق ریکارڈ بھی شامل تھے۔