واشنگٹن: ڈونلڈ ٹرمپ کے معالج نے کہا ہے کہ امریکی صدر بہترین صحت میں ہیں اور بطور کمانڈر اِن چیف اپنی ذمہ داریاں انجام دینے کے لیے مکمل طور پر فِٹ ہیں۔ یہ بیان منگل کے روز والٹر ریڈ نیشنل ملٹری میڈیکل سینٹر میں ہونے والے طبی معائنے کے بعد جاری کیا گیا۔

ڈاکٹر شان باربیلا کی جانب سے جمعہ کی شب جاری کی گئی رپورٹ کے مطابق، ٹرمپ کے سی ٹی اسکین اور دل سے متعلق دیگر طبی معائنے کیے گئے۔ اس کے علاوہ کینسر کی اسکریننگ اور دیگر احتیاطی طبی جانچ بھی کی گئی، جن میں 22 ماہر ڈاکٹروں نے حصہ لیا۔ 79 سالہ ٹرمپ نے منگل کو معائنے کے بعد کہا تھا کہ تمام نتائج "بالکل درست" آئے ہیں۔

رپورٹ کے مطابق صدر ٹرمپ کا وزن 238 پاؤنڈ (108 کلوگرام) ریکارڈ کیا گیا، جو اپریل 2025 میں ہونے والے طبی معائنے کے مقابلے میں 14 پاؤنڈ (6 کلوگرام) زیادہ ہے۔ ڈاکٹروں نے انہیں غذا، جسمانی سرگرمی اور وزن کم کرنے کے حوالے سے مشورے دیے، تاہم یہ نتیجہ اخذ کیا کہ ان کی ذہنی اور جسمانی کارکردگی بہترین ہے۔