واشنگٹن ڈی سی [امریکہ]: امریکی صدر ڈونلڈ ٹرمپ نے چین کی فوجی طاقت کے مظاہرے پر کڑی تنقید کرتے ہوئے کہا ہے کہ روسی صدر ولادیمیر پیوٹن اور شمالی کوریا کے رہنما کم جونگ اُن امریکہ کے خلاف سازش کر رہے ہیں۔ ٹرمپ نے بدھ کو کہا کہ یہ رہنما چاہتے تھے کہ میں بیجنگ میں ہونے والی شاندار فوجی پریڈ دیکھوں۔ انہوں نے کہا: "مجھے یہ پریڈ بہت متاثر کن لگی، لیکن میں نے سمجھ لیا کہ وہ یہ سب کیوں کر رہے تھے۔ وہ چاہتے تھے کہ میں دیکھوں  اور میں نے دیکھا۔" (نیویارک ٹائمز کے مطابق)

اس پریڈ کی میزبانی چینی صدر شی جن پنگ نے کی تھی، جس میں امریکہ مخالف کئی رہنما شریک ہوئے اور بیجنگ نے اپنی فوجی طاقت کا بھرپور مظاہرہ کیا۔ جب ٹرمپ سے پوچھا گیا کہ کیا انہیں اس تقریب میں مدعو کیا گیا تھا، تو انہوں نے کہا کہ اگر دعوت بھی ملتی تو وہ شرکت نہ کرتے۔ یہ میرے لیے مناسب نہیں ہوتا، ٹرمپ نے کہا۔

چینی فوجی پریڈ دوسری جنگِ عظیم میں جاپان کی شکست کی 80 ویں سالگرہ کے موقع پر منعقد کی گئی تھی، جس میں شی، پوتن، شمالی کوریا کے آمر کم جونگ اُن اور بیلاروس کے صدر الیگزینڈر لوکاشینکو خوشگوار انداز میں شریک نظر آئے۔

اس سے چند گھنٹے قبل ٹرمپ نے شکایت کی تھی کہ شی نے اپنی تقریر میں اس کردار کا ذکر نہیں کیا جو امریکہ نے جاپان کو شکست دینے میں ادا کیا تھا۔ ٹرمپ نے اپنی ایک پوسٹ کے آخر میں لکھا: "براہ کرم ولادیمیر پوتن اور کم جونگ اُن کو میری گرمجوش سلام پہنچا دینا، جب کہ آپ سب امریکہ کے خلاف سازش کر رہے ہیں۔

انہوں نے یہ بھی کہا کہ چین کو آزادی دلانے میں امریکہ کی جانب سے دی گئی قربانیوں اور "خون" کو تسلیم کیا جانا چاہیے۔ ٹرمپ نے مزید کہا: میں نے کل رات شی کی تقریر دیکھی۔ صدر شی میرے دوست ہیں، لیکن میرا خیال ہے کہ انہیں اپنی تقریر میں امریکہ کا ذکر کرنا چاہیے تھا، کیونکہ ہم نے چین کی بہت مدد کی تھی۔