واشنگٹن ڈی سی (امریکہ): امریکی صدر ڈونلڈ ٹرمپ نے پیر کے روز ایک فرضی مثال پیش کرتے ہوئے کہا کہ اگر ایران مکمل طور پر ہتھیار ڈال دے اور عسکری شکست تسلیم کر لے، تب بھی ان کے سیاسی مخالفین اور بعض میڈیا ادارے حقائق کو توڑ مروڑ کر پیش کریں گے۔

سوشل میڈیا پر جاری اپنے بیان میں ٹرمپ نے کہا کہ اگر ایران کی بحریہ تباہ ہو جائے، فضائیہ ختم ہو جائے، فوج تہران سے ہتھیار پھینک کر سفید جھنڈے لہراتی ہوئی نکل آئے اور باقی قیادت بھی باضابطہ طور پر ہتھیار ڈالنے کی تمام دستاویزات پر دستخط کرکے امریکہ کی برتری اور طاقت کو تسلیم کر لے، تب بھی بعض میڈیا ادارے اسے ایران کی کامیابی قرار دیں گے۔

انہوں نے طنزیہ انداز میں کہا کہ ایسے حالات میں بھی بعض امریکی ذرائع ابلاغ یہ سرخیاں لگائیں گے کہ ایران نے امریکہ پر "شاندار اور تاریخی فتح" حاصل کر لی ہے۔ ٹرمپ نے خصوصاً The New York Times، The Wall Street Journal اور CNN کو تنقید کا نشانہ بناتے ہوئے کہا کہ یہ ادارے اور دیگر "فیک نیوز میڈیا" حقائق کو مسخ کرتے ہیں۔

انہوں نے ڈیموکریٹک پارٹی کے لیے تحقیر آمیز انداز میں "ڈموکریٹس" (Dumacrats) کی اصطلاح استعمال کرتے ہوئے کہا کہ میڈیا اور ڈیموکریٹس دونوں اپنی سمت کھو چکے ہیں اور صورتحال کی تشریح میں حد سے زیادہ انتہا پسند ہو گئے ہیں۔

دوسری جانب صدر ٹرمپ نے مشرقِ وسطیٰ کی صورتحال کے حوالے سے امید کا اظہار کرتے ہوئے کہا کہ انہیں توقع ہے کہ آئندہ ایک ہفتے کے دوران ایران کے ساتھ ایک ایسا معاہدہ طے پا سکتا ہے جس سے جنگ بندی کی مدت میں توسیع ہوگی اور اہم سمندری گزرگاہ کے ذریعے بحری آمدورفت بحال ہو سکے گی۔

امریکی نشریاتی ادارے ABC News سے گفتگو کرتے ہوئے ٹرمپ نے کہا کہ انہوں نے اس مقصد کے لیے تیار کی گئی ایک مفاہمتی یادداشت (MoU) کی حتمی منظوری ابھی نہیں دی کیونکہ چند نکات پر مزید اتفاق رائے درکار ہے۔ انہوں نے کہا: "مجھے ابھی چند مزید معاملات طے کرنے ہیں۔"

یہ بیان ایسے وقت میں سامنے آیا ہے جب چند گھنٹے قبل ہی ٹرمپ نے کہا تھا کہ ایران کے ساتھ مذاکرات تیزی سے آگے بڑھ رہے ہیں، حالانکہ حالیہ دنوں میں دونوں ممالک کے درمیان فائرنگ کے تبادلے نے جنگ بندی کو سخت آزمائش میں ڈال دیا تھا۔ اپنے سوشل میڈیا پلیٹ فارم ٹروتھ سوشل پر جاری ایک پیغام میں ٹرمپ نے لکھا: "اسلامی جمہوریہ ایران کے ساتھ مذاکرات تیز رفتاری سے جاری ہیں۔"