واشنگٹن

امریکی صدر ڈونلڈ ٹرمپ نے دعویٰ کیا ہے کہ ایران کے ساتھ جنگ بندی اب بھی برقرار ہے، حالانکہ آبنائے ہرمز کے قریب حالیہ فوجی جھڑپیں سامنے آئی ہیں۔ انہوں نے خبردار کیا کہ اگر جنگ بندی ختم ہوئی تو اس کے آثار بالکل واضح ہوں گے۔

جمعرات کو لنکن میموریل ریفلیکٹنگ پول کے اچانک دورے کے دوران ذرائع ابلاغ سے گفتگو کرتے ہوئے ٹرمپ نے کہا کہ اگر جنگ بندی نہ رہی تو آپ کو خود ہی پتا چل جائے گا۔ ایران سے اٹھتی ہوئی ایک بڑی چمک سب کچھ بیان کر دے گی۔

صدر ٹرمپ نے حالیہ جھڑپوں کی اہمیت کم ظاہر کرنے کی کوشش کی، تاہم انہوں نے امریکی فوجی کارروائی کی کامیابی کی تعریف بھی کی۔ انہوں نے کہا کہ انہوں نے آج ہمارے ساتھ چھیڑ چھاڑ کی، اور ہم نے انہیں تباہ کر دیا۔ میں اسے معمولی بات کہتا ہوں۔انہوں نے مزید کہا کہ ایران کے ساتھ باضابطہ معاہدے کے امکانات اب بھی غیر یقینی ہیں۔ ٹرمپ کے مطابق، “معاہدہ شاید نہ ہو، لیکن کسی بھی دن ہو بھی سکتا ہے۔” اس بیان سے ظاہر ہوتا ہے کہ اعلیٰ سطح کی بات چیت اب بھی تعطل کا شکار ہے۔

یہ بیان اس وقت سامنے آیا جب امریکی مرکزی کمان نے تصدیق کی کہ امریکی افواج نے ایرانی فوجی تنصیبات پر مخصوص حملے کیے۔ امریکی حکام کے مطابق انہی مقامات سے امریکی بحریہ کے جنگی جہازوں پر میزائل، ڈرون اور چھوٹی کشتیوں کے ذریعے حملے کیے گئے تھے، جب وہ آبنائے ہرمز سے گزر رہے تھے۔

امریکی مرکزی کمان نے بتایا کہ امریکی افواج نے “بلا اشتعال ایرانی حملوں” کو ناکام بنایا اور دفاعی کارروائی کرتے ہوئے جوابی حملے کیے۔ اس کارروائی میں “یو ایس ایس ٹرکسن”، “یو ایس ایس رافیل پیرالٹا” اور “یو ایس ایس میسن” شامل تھے۔ امریکی حکام کے مطابق متعدد میزائلوں، ڈرونز اور کشتیوں کے حملوں کے باوجود کسی امریکی اثاثے کو نقصان نہیں پہنچا۔

کمان کے مطابق امریکی افواج نے تمام خطرات کو تباہ کیا اور ان ایرانی فوجی مراکز کو نشانہ بنایا جو امریکی افواج پر حملوں کے ذمہ دار تھے، جن میں میزائل اور ڈرون لانچ مقامات، کمانڈ مراکز اور نگرانی کے نظام شامل تھے۔صدر ٹرمپ نے ٹروتھ سوشل پر بھی اس جھڑپ کا ذکر کرتے ہوئے امریکی بحریہ کی تعریف کی۔ انہوں نے لکھا کہ تین عالمی معیار کے امریکی جنگی جہاز کامیابی کے ساتھ آبنائے ہرمز سے گزرے۔ ہمارے جہازوں کو کوئی نقصان نہیں پہنچا، لیکن ایرانی حملہ آوروں کو بھاری نقصان اٹھانا پڑا۔

انہوں نے دعویٰ کیا کہ ایرانی یونٹس مکمل طور پر تباہ کر دیے گئے، جن میں متعدد چھوٹی کشتیاں بھی شامل تھیں۔ ٹرمپ نے کہا کہ ہم پر داغے گئے میزائل آسانی سے تباہ کر دیے گئے، جبکہ ڈرون فضا ہی میں جلا دیے گئے۔ایران کی قیادت پر سخت تنقید کرتے ہوئے ٹرمپ نے کہا کہ ایک معمول کا ملک ان جہازوں کو گزرنے دیتا، لیکن ایران معمول کا ملک نہیں ہے۔ وہاں پاگل لوگ حکومت کر رہے ہیں۔” انہوں نے خبردار کیا کہ اگر ایران نے جلد معاہدہ نہ کیا تو مستقبل میں اس کے خلاف مزید سخت اور پرتشدد کارروائی کی جائے گی۔

بعد ازاں وائٹ ہاؤس میں گفتگو کرتے ہوئے ٹرمپ نے کہا کہ ہمارا منصوبہ بہت سادہ ہے، ایران ایٹمی ہتھیار حاصل نہیں کر سکتا۔دوسری جانب ایرانی پاسدارانِ انقلاب سے وابستہ تسنیم خبر رساں ادارے نے دعویٰ کیا کہ ایرانی بحریہ نے امریکی جہازوں کو کامیابی سے نشانہ بنایا۔ ادارے کے مطابق امریکی جنگی جہاز بحیرہ عمان کی جانب فرار ہو رہے تھے اور حملے میزائلوں اور خودکش ڈرونز کے ذریعے کیے گئے۔

اگرچہ اس جھڑپ کے درست وقت کی تصدیق نہیں ہو سکی، لیکن یہ کشیدگی ایک ایرانی تیل بردار جہاز سے متعلق امریکی فوجی کارروائی کی خبروں کے بعد سامنے آئی ہے۔