واشنگٹن ڈی سی: امریکی صدر ڈونلڈ ٹرمپ نے وائٹ ہاؤس کے احاطے میں نئے بال روم اور فوجی کمپلیکس کی متنازع تعمیر کا دفاع جاری رکھتے ہوئے مجوزہ چھت پر قائم کیے جانے والے ’’ڈرون پورٹ‘‘ کو ایک ’’بہت شاندار اور انتہائی اہم فوجی اثاثہ‘‘ قرار دیا ہے۔

ٹرمپ نے اپنے سوشل میڈیا پلیٹ فارم ٹروتھ سوشل پر ’’ڈرون پورٹ‘‘ کی ایک تصویر شیئر کی، جس میں وائٹ ہاؤس کی چھت پر ایک فوجی تنصیب دکھائی گئی ہے۔ تصویر میں ہموار چھت پر کئی فوجی ڈرون کھڑے ہیں اور مسلح اہلکار اس کی حفاظت کر رہے ہیں، جبکہ پس منظر میں واشنگٹن مونومنٹ اور دارالحکومت کا منظر دکھائی دیتا ہے۔

مجوزہ تنصیب کی دفاعی صلاحیتوں کو اجاگر کرتے ہوئے ٹرمپ نے اس کمپلیکس کو قومی سلامتی کے لیے ایک اہم تنصیب قرار دیا۔ ٹرمپ نے لکھا، ’’یہ عظیم اور انتہائی اہم فوجی اثاثہ وائٹ ہاؤس کے انتہائی محفوظ بال روم کے اوپر قائم ہوگا۔ یہ واشنگٹن ڈی سی کی قومی سلامتی کو یقینی بنائے گا اور مستقبل کے صدور کا تحفظ کرے گا!!! صدر ڈی جے ٹی۔‘‘

یہ بیان ایسے وقت میں سامنے آیا ہے جب اس تعمیراتی منصوبے کو لے کر تنازع بڑھتا جا رہا ہے۔ ایک وفاقی اپیل عدالت نے نئے وائٹ ہاؤس بال روم کی تعمیر روکنے کا حکم دیا ہے۔ اس سے قبل ٹرمپ نے عدالت کے فیصلے کو ’’قومی سلامتی کے لیے خطرہ‘‘ اور ’’قومی بدنامی‘‘ قرار دیتے ہوئے کہا تھا کہ ان کی انتظامیہ اس فیصلے کو فوری طور پر امریکی سپریم کورٹ میں چیلنج کرے گی۔

ٹرمپ نے جمعہ کو مقامی وقت کے مطابق ٹروتھ سوشل پر جاری ایک بیان میں وفاقی اپیل عدالت کے منقسم فیصلے پر تنقید کی۔ عدالت نے قرار دیا تھا کہ مجوزہ بال روم کی تعمیر کے لیے کانگریس کی منظوری ضروری ہے۔ ٹرمپ نے لکھا، ’’دو ججوں، جن میں سے ایک کو براک حسین اوباما اور دوسرے کو سلیپی جو بائیڈن نے مقرر کیا تھا، نے انتہائی ضروری محفوظ بال روم/فوجی کمپلیکس، جس کی چھت پر ایک بڑا ڈرون پورٹ بھی شامل ہے، کے بارے میں اپنے فیصلے میں کہا کہ ’ہر صدر وائٹ ہاؤس کا ایک عارضی کرایہ دار ہے۔‘ ہم کرایہ دار نہیں ہیں... ہم امریکہ کے عوام کے منتخب کردہ صدر ہیں اور ہمارے پاس بہت سے حقوق ہیں، جن میں وائٹ ہاؤس کے احاطے کی مرمت، تزئین و آرائش، سکیورٹی، تحفظ اور خوبصورتی شامل ہیں۔‘

‘ عدالت کے فیصلے کو قومی سلامتی کے لیے خطرہ قرار دیتے ہوئے ٹرمپ نے مزید کہا، ’’یہ فیصلہ، جو کام کا بڑا حصہ مکمل اور اس کی ادائیگی کے بعد دیا گیا ہے، اعلیٰ ترین سطح پر قومی سلامتی کے لیے خطرہ ہے۔ یہ قومی بدنامی بھی ہے۔‘‘ سی این این کے مطابق ڈسٹرکٹ آف کولمبیا سرکٹ کی امریکی اپیل عدالت نے 2-1 کی اکثریت سے فیصلہ دیا کہ ٹرمپ انتظامیہ کانگریس کی منظوری کے بغیر بڑے بال روم کے منصوبے پر کام آگے نہیں بڑھا سکتی۔ عدالت نے کہا، ’’ایک بہت بڑے بال روم کی تعمیر ہونی چاہیے یا نہیں، اس کا فیصلہ کانگریس کو کرنا ہے، یہ انتظامیہ کی جانب سے اپنے طور پر اقدام کرنے کا معاملہ نہیں ہے۔‘‘

عدالت نے اپنے فیصلے پر عمل درآمد دو ہفتوں کے لیے روک دیا ہے، تاکہ ٹرمپ کو سپریم کورٹ میں اپیل کرنے کا وقت مل سکے۔ ٹرمپ نے تصدیق کی ہے کہ ان کی انتظامیہ اس فیصلے کو سپریم کورٹ میں چیلنج کرے گی۔ یہ مقدمہ ٹرمپ کے اس فیصلے سے متعلق ہے جس کے تحت وائٹ ہاؤس کے ایسٹ وِنگ کو ہٹا کر تقریباً 89 ہزار مربع فٹ پر مشتمل ایک نیا بال روم تعمیر کیا جا رہا ہے۔ سی این این کے مطابق اپیل عدالت نے قرار دیا کہ زیر زمین سکیورٹی بنکر پر کام جاری رہ سکتا ہے، تاہم زمین کے اوپر بال روم کی تعمیر کانگریس کی منظوری کے بغیر آگے نہیں بڑھائی جا سکتی۔