واشنگٹن

صدر ڈونالڈ ٹرمپ کی انتظامیہ نے یہ مؤقف برقرار رکھا ہے کہ امریکہ ایران کے ساتھ "جنگ میں نہیں ہے" حالانکہ جاری فوجی کارروائی وار پاورز ریزولوشن کے تحت ایک اہم قانونی مرحلے میں داخل ہو چکی ہے، جس سے وائٹ ہاؤس اور کانگریس کے درمیان ممکنہ تصادم کی صورتحال پیدا ہو رہی ہے۔رپورٹ کے مطابق ایوانِ نمائندگان کے اسپیکر مائیک جانسن نے جمعرات کو کہا کہ اس مرحلے پر کانگریس سے اجازت لینے کی ضرورت نہیں ہے۔

جانسن نے مؤقف اختیار کیا کہ امریکہ کسی فعال جنگی کارروائی میں شامل نہیں ہے۔ انہوں نے کیپیٹل میں گفتگو کرتے ہوئے کہا کہ مجھے نہیں لگتا کہ اس وقت کوئی فعال فوجی بمباری یا فائرنگ جاری ہے۔ فی الحال ہم امن قائم کرنے کی کوشش کر رہے ہیں۔

جب ان سے 1973 کے وار پاورز ریزولوشن کے تحت مقرر 60 دن کی مدت کے بارے میں پوچھا گیا، جو اس جمعہ کو ختم ہو رہی ہے، تو انہوں نے دوٹوک انداز میں کہا، "ہم جنگ میں نہیں ہیں۔1973 کے قانون کے مطابق صدر کو 60 دن کے اندر فوجی کارروائی ختم کرنی ہوتی ہے، جب تک کہ کانگریس سے باقاعدہ منظوری حاصل نہ ہو۔صدر ٹرمپ نے 2 مارچ کو کانگریس کو اس فوجی مہم سے متعلق باضابطہ اطلاع دی تھی، جس کے مطابق یکم مئی آخری تاریخ بنتی ہے۔

چونکہ اب تک اس کارروائی کے لیے منظوری حاصل نہیں کی گئی، اس لیے آئینی ٹکراؤ کے خدشات پیدا ہو گئے ہیں۔ اگرچہ قانون 30 دن کی توسیع کی اجازت دیتا ہے، تاہم یہ واضح نہیں کہ صدر اس اختیار کو استعمال کریں گے یا نہیں۔وائٹ ہاؤس کے قانونی مؤقف کا مرکزی نکتہ یہ ہے کہ موجودہ جنگ بندی وار پاورز کی مدت کو مؤثر طور پر روک دیتی ہے۔ امریکی وزیر دفاع پیٹ ہیگسیتھ نے سینیٹ کی سماعت میں کہا کہ فعال لڑائی کے رکنے سے قانونی تقاضے تبدیل ہو جاتے ہیں۔

انہوں نے کہا کہ میں اس معاملے میں وائٹ ہاؤس اور اس کے قانونی مشیروں کی رائے پر انحصار کروں گا۔ تاہم ہم اس وقت جنگ بندی کی حالت میں ہیں، جس کا مطلب ہماری سمجھ کے مطابق یہ ہے کہ 60 دن کی مدت رک جاتی ہے یا تھم جاتی ہے۔اس تشریح کی ڈیموکریٹک رہنماؤں نے مخالفت کی ہے، جن کا کہنا ہے کہ قانون ایسی کسی رعایت کی اجازت نہیں دیتا۔

سینیٹر ٹم کین نے کہا کہ مجھے نہیں لگتا کہ قانون اس کی حمایت کرتا ہے۔" انہوں نے مزید کہا، "میرا خیال ہے کہ 60 دن کی مدت شاید کل ختم ہو جائے گی، اور یہ انتظامیہ کے لیے ایک اہم قانونی سوال پیدا کرے گا۔پورے تنازع کے دوران صدر ٹرمپ کے بیانات میں بھی تضاد دیکھا گیا ہے۔ 28 فروری کو ابتدائی حملوں کے دوران انہوں نے کہا تھا کہ "بہادر امریکی فوجیوں کی جان جا سکتی ہے اور جانی نقصان ہو سکتا ہے، ایسا جنگ میں ہوتا ہے۔9 مارچ تک انہوں نے کہا کہ "جنگ تقریباً ختم ہو چکی ہے"، جبکہ بعد میں اس کارروائی کو کبھی "جنگ" اور کبھی "چھوٹا سا آپریشن" قرار دیا۔

مارچ کے دوران انہوں نے یہ بھی اشارہ دیا کہ وہ لفظ "جنگ" سے گریز کر رہے ہیں کیونکہ "اس کے لیے کانگریس کی منظوری درکار ہوتی ہے۔تاہم اپریل کے وسط میں انہوں نے کہا کہ مجھے جنگ میں جانا پڑا۔جمعرات کو نیوز میکس کو دیے گئے ایک حالیہ انٹرویو میں انہوں نے اسی مبہم انداز کو جاری رکھتے ہوئے کہا کہ اسٹاک مارکیٹ نے جنگ کے دوران، یا فوجی کارروائی کے دوران، جو بھی آپ اسے کہنا چاہیں، ریکارڈ سطح حاصل کی۔یہ تنازع 28 فروری کو امریکہ اور اسرائیل کے مشترکہ حملوں کے بعد شروع ہوا، جن میں تہران اور دیگر اہداف کو نشانہ بنایا گیا۔ اس کے جواب میں ایران نے امریکی اڈوں اور اسرائیلی ٹھکانوں پر حملے کیے اور آبنائے ہرمز میں سمندری نقل و حرکت کو متاثر کیا، جس سے عالمی تیل کی قیمتوں میں تیزی سے اضافہ ہوا۔

اپوزیشن قانون سازوں کا کہنا ہے کہ انتظامیہ ایک کمزور قانونی پوزیشن میں ہے۔ سینیٹر ایڈم شف نے کہا کہ 60 دن کی مدت مکمل ہونے کے ساتھ ہی کئی ارکان اس فوجی کارروائی کو ختم کرنے کی کوششوں میں شامل ہو سکتے ہیں۔

انہوں نے کہا کہ دو ماہ کی جنگ، تیرہ فوجیوں کی جانوں کے نقصان اور اربوں ڈالر کے خرچ کے بعد، اب وقت آ گیا ہے کہ ہم تسلیم کریں کہ ہم پہلے ہی بہت بھاری قیمت ادا کر چکے ہیں۔

ان اعتراضات کے باوجود، انتظامیہ کی کارروائیوں کو روکنے کی کسی بھی قانون سازی کو ریپبلکن کے زیرِ کنٹرول ایوانِ نمائندگان اور ممکنہ صدارتی ویٹو کا سامنا کرنا پڑ سکتا ہے۔