تہران

ایرانی ماہرِ تعلیم الہام کدخدائی نے امریکہ-ایران مجوزہ مفاہمتی یادداشت  پر محتاط رویہ اختیار کرنے کی اپیل کرتے ہوئے کہا ہے کہ اس پر "زیادہ پرامید ہونا ابھی قبل از وقت ہے" اور یہ کوئی مکمل امن معاہدہ نہیں بلکہ صرف ایک عارضی انتظام ہے جو جنگ بندی کو آگے بڑھانے اور ستقبل کے مذاکرات کے لیے گنجائش پیدا کرنے کے لیے بنایا جا رہا ہے۔

انہوں نے اے این آئی سے گفتگو کرتے ہوئے کہا کہ اس وقت زیرِ غور مفاہمت کو واشنگٹن اور تہران کے درمیان طویل عرصے سے جاری کشیدگی کے حتمی حل کے طور پر نہیں دیکھا جانا چاہیے۔

انہوں نے کہا کہ یہ کوئی معاہدہ نہیں ہے۔ یہ دراصل صرف ایک مفاہمتی یادداشت ہے، جس کا مطلب ہے کہ یہ پہلے سے طے شدہ جنگ بندی کو بڑھائے گی اور پھر فریقین کو ایک حقیقی معاہدہ بنانے کے لیے وقت فراہم کرے گی۔ یہ ایک عارضی چیز ہے، اور ایران میں لوگ اس کے بارے میں بہت محتاط ہیں۔کدخدائی نے مزید کہا کہ ایرانی مختلف ممکنہ حالات کے لیے تیار ہیں جو پیش آ سکتے ہیں۔ امریکہ اور ایران کے درمیان مسائل کے حل کے لیے کسی ممکنہ معاہدے کے حوالے سے ابھی پر امید ہونا بہت جلدی ہے۔

ان کے یہ ریمارکس ایسے وقت میں سامنے آئے ہیں جب مغربی ایشیا میں کشیدگی کے خاتمے کے لیے مفاہمتی یادداشت پر دستخط 19 جون کو سوئٹزرلینڈ کے علاقے برگن اسٹاک (کینٹن نڈوالڈن) میں ہونے کی توقع ہے۔

سوئٹزرلینڈ کی فیڈرل ڈیپارٹمنٹ آف فارن افیئرز کے مطابق امریکہ، ایران، پاکستان اور قطر کے ساتھ اس مجوزہ دستخط کے حوالے سے سفارتی مشاورت جاری ہے۔ سوئٹزرلینڈ اس عمل کو سفارتی اور لاجسٹک سہولیات فراہم کر کے آسان بنا رہا ہے۔کدخدائی نے امریکی صدر ڈونلڈ ٹرمپ کے اس دعوے کو بھی مسترد کیا کہ ایران کو جوہری ہتھیار حاصل کرنے سے روکنا اس معاہدے کی بڑی کامیابی ہے۔

انہوں نے کہا کہ ٹرمپ ایک طرح کی خیالی دنیا میں رہتے ہیں کیونکہ ایران ہمیشہ سے کہتا آیا ہے کہ ہمارا جوہری پروگرام صرف پرامن مقاصد کے لیے ہے۔ ہم جوہری ہتھیاروں کے خواہشمند نہیں کیونکہ ہمارے پاس بڑے پیمانے پر تباہی پھیلانے والے ہتھیاروں کے استعمال کے خلاف فتویٰ موجود ہے۔

انہوں نے مزید کہا کہ یہ واقعی وہ کامیابی نہیں ہے جسے وہ پیش کر رہے ہیں۔ انہیں اسے امریکی عوام کو بیچنے اور اس انداز میں پیش کرنے کی ضرورت ہے کہ انہوں نے بہتر معاہدہ کیا ہے۔

اس مجوزہ مفاہمت پر اسرائیل کے مؤقف کے حوالے سے کدخدائی نے کہا کہ اسرائیلی حکام نے صرف شکوک کا اظہار نہیں کیا بلکہ یہ اشارہ دیا ہے کہ وہ اس پر عمل نہیں کریں گے۔

انہوں نے کہا کہ اسرائیل نے یہ نہیں کہا کہ وہ اس مفاہمتی یادداشت کے بارے میں شکوک رکھتا ہے، بلکہ انہوں نے کہا ہے کہ وہ اس پر عمل نہیں کریں گے۔ انہوں نے کہا ہے کہ وہ لبنان میں موجود رہیں گے اور اپنی مرضی کے مطابق کارروائیاں جاری رکھیں گے۔

جنوبی لبنان کا حوالہ دیتے ہوئے انہوں نے الزام لگایا کہ ماضی کے جنگ بندی معاہدوں کی بار بار خلاف ورزی کی گئی ہے اور خبردار کیا کہ ایک محاذ پر معاہدے کی ناکامی پورے فریم ورک کو متاثر کر سکتی ہے۔انہوں نے کہا کہ ایران کا مؤقف ہے کہ تمام محاذوں پر امن یا بہتر طور پر کہیں تو جنگ بندی ہی ایک ایسا حل ہے جو کام کر سکتا ہے۔ لیکن اگر ایک محاذ پر یہ ٹوٹ جاتا ہے تو یہ پورے معاہدے کو تباہ کر دے گا۔

منجمد ایرانی اثاثوں اور پابندیوں میں نرمی کے معاملے پر کدخدائی نے کہا کہ تفصیلات واضح نہیں ہیں کیونکہ مفاہمتی یادداشت کا متن ابھی تک عوام کے سامنے نہیں آیا۔انہوں نے کہا کہ ہمارے پاس مفاہمتی یادداشت کا متن موجود نہیں ہے، اس لیے ہمیں تفصیلات معلوم نہیں، لیکن ایرانی نقطۂ نظر سے منجمد اثاثوں تک رسائی بہت اہم ہے کیونکہ یہ ایران کی ملکیت ہیں۔

انہوں نے کہا کہ ایران اپنے تجربات کی بنیاد پر اس معاملے کو دیکھ رہا ہے اور آئندہ معاہدے میں سخت ضمانتوں کا خواہاں ہے تاکہ یہ یقینی بنایا جا سکے کہ طے شدہ نکات واقعی نافذ ہوں۔

انہوں نے مزید کہا، "میرے خیال میں ایران اس معاملے کو پچھلے معاہدوں کے تجربے کے ساتھ دیکھ رہا ہے اور وہ اس بات کو بہت سنجیدگی سے لے رہا ہے کہ یہ مفاہمتی یادداشت اور بعد میں ممکنہ معاہدے کے نتیجے میں واقعی ضمانتیں موجود ہوں۔

اس سے قبل امریکی انتظامیہ کے اعلیٰ حکام نے تصدیق کی تھی کہ ٹرمپ اور جے ڈی وینس نے ایران کے ساتھ اس مفاہمتی یادداشت پر دستخط کیے ہیں، جو مستقبل میں تعلقات اور ایران کے جوہری پروگرام پر تعاون اور پابندیوں میں نرمی کے لیے ایک فریم ورک فراہم کرتی ہے۔

امریکی حکام کے مطابق یہ یادداشت دونوں ممالک کے درمیان تعلقات کی سمت طے کرنے کی بنیاد فراہم کرتی ہے۔