واشنگٹن ڈی سی ::امریکی وزیر جنگ پیٹ ہیگستھ نے ایران کو خبردار کرتے ہوئے کہا ہے کہ صدر ڈونلڈ ٹرمپ کی ہدایات کے مطابق پیر کے روز آپریشن فیوری کے آغاز کے بعد سے اب تک کے سب سے بڑے حملے کیے جائیں گے۔ انہوں نے کہا کہ اگر ایران نے جنگ کے خاتمے کے لیے معاہدہ نہ کیا تو اگلے دن حملوں کی شدت اس سے بھی زیادہ ہوگی۔

وائٹ ہاؤس میں صحافیوں سے گفتگو کرتے ہوئے ہیگستھ نے ایران کو متنبہ کیا کہ وہ دانشمندی سے فیصلہ کرے کیونکہ صدر ٹرمپ کسی قسم کی نرمی نہیں برتتے۔

انہوں نے کہا کہ صدر کی ہدایت کے مطابق آج حملوں کی سب سے بڑی تعداد دیکھی جائے گی اور کل اس سے بھی زیادہ کارروائی ہوگی۔ اس کے بعد ایران کے پاس فیصلہ کرنے کا موقع ہوگا۔

دوسری جانب صدر ڈونلڈ ٹرمپ نے ان اتحادی ممالک کو تنقید کا نشانہ بنایا جنہوں نے ایران کے خلاف جنگ میں امریکہ کا ساتھ نہیں دیا۔ انہوں نے کہا کہ جاپان آسٹریلیا جنوبی کوریا اور نیٹو نے امریکہ کی مدد نہیں کی۔

ٹرمپ نے مزید کہا کہ امریکہ جاپان میں 50000 اور جنوبی کوریا میں 45000 فوجی تعینات کیے ہوئے ہے تاکہ ان ممالک کو تحفظ فراہم کیا جا سکے۔

انہوں نے خلیجی ممالک کی تعریف کرتے ہوئے کہا کہ سعودی عرب قطر متحدہ عرب امارات بحرین اور کویت نے بہترین تعاون کیا ہے۔

صدر ٹرمپ نے یہ بھی کہا کہ ایران کو ایک ہی رات میں ختم کیا جا سکتا ہے اور یہ کارروائی جلد بھی ہو سکتی ہے۔

انہوں نے دعویٰ کیا کہ امریکی افواج نے حالیہ ہفتوں میں ایران کے خلاف وسیع فضائی مہم چلائی ہے جس میں 10000 سے زائد پروازیں کی گئیں اور 37 دنوں میں 13000 سے زیادہ اہداف کو نشانہ بنایا گیا۔

یہ بیانات اس تناظر میں سامنے آئے ہیں جب امریکہ نے ایران کو آبنائے ہرمز دوبارہ کھولنے کے لیے منگل کی شام 8 بجے تک کی ڈیڈ لائن دی ہے اور خطے میں کشیدگی مسلسل بڑھ رہی ہے۔