تل ابیب: اسرائیل بھر میں ووٹنگ مراکز کھولے جانے والے ہیں، جہاں وزیراعظم بینجمن نیتن یاہو کی جماعت لیکوڈ کے تقریباً 1 لاکھ 40 ہزار ارکان آئندہ قومی انتخابات کے لیے اپنی جماعت کے امیدواروں کی فہرست کا انتخاب کریں گے۔ دی ٹائمز آف اسرائیل کے مطابق اس مقابلے پر گہری نظر ہے، کیونکہ اگر اکتوبر میں نیتن یاہو کی حمایت کرنے والا اتحاد کامیاب ہوتا ہے تو یہ انتخاب آئندہ حکومت کی نوعیت پر گہرا اثر ڈال سکتا ہے۔

لیکوڈ تاریخی طور پر اپنے داخلی جمہوری عمل پر فخر کرتی رہی ہے اور یہ ان چند جماعتوں میں شامل ہے جو پرائمری انتخابات کے ذریعے اپنے امیدواروں کی فہرست منتخب کرتی ہیں۔ تاہم نیتن یاہو کی جانب سے کھلی نشستوں کو محدود کرنے کے لیے کی گئی تبدیلیوں نے اس سال کے مقابلے کو پارلیمنٹ میں قابلِ عمل نشستیں حاصل کرنے کے لیے انتہائی سخت بنا دیا ہے۔ دی ٹائمز آف اسرائیل کے مطابق یہ پرائمری انتخابات داخلی عدالتی چیلنجز کے بعد ہو رہے ہیں، جنہوں نے نیتن یاہو کی جانب سے اس عمل کو نظرانداز کرنے کی کوششوں کو ناکام بنا دیا تھا۔ یہ انتخاب اس بات کا بھی امتحان ہے کہ آیا نیتن یاہو کی قیادت میں لیکوڈ مزید دائیں بازو کی جانب جائے گی یا اعتدال پسند رہنماؤں کو آگے لائے گی۔

اس معاملے نے جماعت کے اندر بڑھتی ہوئی گروہی کشمکش کو بھی نمایاں کر دیا ہے۔ عام انتخابات میں تقریباً ڈھائی ماہ باقی ہیں اور نئے امیدوار موجودہ ارکانِ پارلیمنٹ کے مقابلے میں میدان میں ہیں۔ ان میں سے کئی موجودہ ارکان کے دوبارہ کنیسٹ میں پہنچنے کے امکانات کم نظر آ رہے ہیں۔ حالیہ سروے کے مطابق 27 اکتوبر کو ہونے والے انتخابات میں لیکوڈ کو 22 سے 24 نشستیں مل سکتی ہیں، جو اس کی موجودہ 32 نشستوں کے مقابلے میں نمایاں کمی ہوگی۔

حال ہی میں لیکوڈ کی مرکزی کمیٹی نے ایک ایسا فیصلہ کیا جس کے ذریعے امیدواروں کی فہرست پر نیتن یاہو کے اختیارات میں نمایاں اضافہ ہوگیا۔ اس کے تحت انہیں پہلے 29 امیدواروں میں سے آٹھ مخصوص امیدواروں کو محفوظ نشستیں دینے کا اختیار حاصل ہوگیا ہے۔

دی ٹائمز آف اسرائیل کے مطابق یہ قرارداد جماعت کے اندر غیر معمولی مخالفت کے باوجود منظور ہوئی۔ اس مخالفت کی قیادت کنیسٹ رکن ڈیوڈ بٹن نے کی۔ ان کا کہنا تھا کہ موجودہ ارکانِ پارلیمنٹ کو وزیراعظم کے پسندیدہ اور ان کے وفادار امیدواروں کے لیے فہرست میں نیچے دھکیلا جا رہا ہے۔ اپنی فہرست میں پہلے سے محفوظ نشست کے علاوہ نیتن یاہو کو تیسری، پانچویں، نویں، گیارہویں، پندرہویں، اٹھارہویں، چھبیسویں اور انتیسویں پوزیشنوں پر امیدوار نامزد کرنے کا اختیار حاصل ہے۔

وزیر خارجہ گیدون ساعر، لیکوڈ مرکزی کمیٹی کے چیئرمین حییم کاٹز اور سیاسی میدان میں نئے آنے والے اورن ڈوبرونسکی کو ان محفوظ نشستوں میں سے تین دی گئی ہیں، جبکہ وزیر دفاع اسرائیل کاٹز کو ایک اضافی، نویں محفوظ نشست ملی ہے۔ نیتن یاہو نے سابق اوتزما یہودیت کے رکنِ کنیسٹ الموگ کوہن کی بھی ایک مشترکہ ویڈیو کے ذریعے کھلے عام حمایت کی ہے۔ ان پابندیوں کے باعث لیکوڈ کے رکنِ کنیسٹ الیہو ریویو نے اعلان کیا کہ وہ دوبارہ انتخاب نہیں لڑیں گے۔ انہوں نے اس بات کو اجاگر کیا کہ موجودہ ارکان کے لیے فہرست میں قابلِ عمل مقام حاصل کرنا کتنا مشکل ہوگیا ہے۔ دوسری جانب معاریو کی جانب سے شائع کیے گئے اگام انسٹی ٹیوٹ کے ایک سروے میں کنیسٹ کے اسپیکر امیر اوہانا ارکان کی پسند میں سرفہرست رہے۔ ان کے بعد کنیسٹ رکن ٹالی گوٹلیو، بوعز بیسموت اور وزیر توانائی الی کوہن کا نمبر آیا۔ اسرائیل کاٹز 13ویں جبکہ حییم کاٹز 35ویں نمبر پر رہے۔

دی ٹائمز آف اسرائیل کے حوالے سے عبرانی میڈیا رپورٹس کے مطابق نیتن یاہو کی حکمت عملی کا مقصد گوٹلیو، شلومو کارہی اور مئی گولان جیسے سخت گیر نظریات رکھنے والے مقبول امیدواروں کو پرائمری میں کامیاب ہونے سے روکنا ہے، کیونکہ ان کی موجودگی اعتدال پسند ووٹروں کو جماعت سے دور کر سکتی ہے۔ اسی طرح محفوظ نشستوں کے ذریعے نیتن یاہو جماعت کے اندر اپنے ناقدین سے حساب بھی چکانا چاہتے ہیں، جن میں وزیر اقتصادیات نیر برکات بھی شامل ہیں۔

دی ٹائمز آف اسرائیل سے گفتگو کرتے ہوئے گوٹلیو نے ان خبروں کو مسترد کردیا کہ نیتن یاہو انہیں فہرست میں پیچھے کرنا چاہتے ہیں۔ انہوں نے اسے ’’وہم پر مبنی جعلی خبر‘‘ قرار دیا۔ گوٹلیو نے کہا، ’’وزیراعظم کے پاس ہمیشہ تین سے پانچ متفقہ محفوظ نشستیں رہی ہیں۔ اس پر ووٹنگ ہوتی ہے، جو اسے جمہوری بناتی ہے۔ مرکزی کمیٹی کے تمام ارکان نے محفوظ نشستوں کے حوالے سے ووٹ دیا اور اس پر اتفاق ہوا۔‘‘ انہوں نے مزید کہا، ’’مجھے توقع ہے کہ ووٹرز لیکوڈ کی فہرست میں مجھے زیادہ سے زیادہ اوپر رکھیں گے، کیونکہ فہرست میں میری پوزیشن کی اہمیت اس لیے ہے کہ اس سے مجھے عوام کا اعتماد حاصل ہوگا اور میں اسرائیل کی وزیر انصاف بن سکوں گی۔‘

‘ گوٹلیو نے یہ بھی کہا کہ جو امیدوار فوری طور پر کنیسٹ میں نشست حاصل کرنے میں ناکام رہیں، وہ ممکنہ طور پر بعد میں نارویجن قانون کے تحت پارلیمنٹ میں داخل ہوسکتے ہیں، اگر نیتن یاہو اگلی حکومت بنانے میں کامیاب ہوجاتے ہیں۔ دوسری جانب لیکوڈ کی سابق رکنِ کنیسٹ شارن ہاسکل نے دی ٹائمز آف اسرائیل کو بتایا کہ نیتن یاہو کا یہ اقدام جماعت کے اندر انتہائی مذہبی یہودی حلقوں کے بڑھتے ہوئے اثر و رسوخ کا مقابلہ کرنے کے لیے بھی ہوسکتا ہے۔

مقابلے کو مزید سخت بناتے ہوئے تل ابیب ڈسٹرکٹ کورٹ نے حال ہی میں ایک داخلی ٹریبونل کے اس فیصلے کو برقرار رکھا جس کے تحت موجودہ اور سابق ارکانِ پارلیمنٹ کو ان ضلعی نشستوں پر امیدوار بننے سے روک دیا گیا ہے جو روایتی طور پر نئے امیدواروں کے لیے مختص ہوتی ہیں۔

انتخابی عمل کے انتظامی مسائل پر تبصرہ کرتے ہوئے لیکوڈ مرکزی کمیٹی کے رکن گیدن ایریل نے دی ٹائمز آف اسرائیل کو بتایا کہ پرائمری انتخابات کے اعلان میں تاخیر کے باعث نئے امیدواروں کو ووٹروں کے سامنے اپنا تعارف کرانے کا بہت کم موقع ملا ہے۔ اس وجہ سے جماعت کے ارکان کے لیے پہلے سے معروف موجودہ ارکان کے بجائے نئے امیدواروں کی حمایت کرنا مشکل ہوگیا ہے۔